باشتره وره‌گرتنا ڤاكسینێ ل سه‌ر مامۆستا و فه‌رمانبه‌رێن په‌روه‌ردێ بیته فه‌رمان
ئه‌ڤرۆ، سالار محه‌مه‌د دۆسكی:
نوژداره‌كێ تایبه‌تمه‌ندێ چاره‌سه‌ری یا كۆرۆنایێ ل پارێزگه‌هێ ئاشكراكر، هه‌كه رێنمایێن ساخله‌میێ بدروستی ل قوتابخانا بهێنه وه‌رگرتن گرنگه ئه‌ڤ ساله بدروستی ده‌رگه‌هیچن قوتابخانا بهێنه‌ڤه‌كرن چنكو ب شێوازێ سالێن بوری گه‌له‌ك زیان ب قوتابیان كه‌فت.
د. شه‌هرام عزیز، تایبه‌تمه‌ندێ چاره‌سه‌ركرنا نه‌خوشیا كورونایێ ل پارێزگه‌ها دهۆك بۆ رۆژناما ئه‌ڤرۆ گۆت: گرنگه ئه‌ڤ ساله ده‌رگه‌هێن قوتابخانا ب دروستی بهێنه‌ڤه‌كرن، ب مه‌رجه‌كی رێنمایێن ساخله‌می ل هه‌می قوتابخانان بهێنه بجه ئینان، جهێن روینشتنێ بواهی دناڤبه‌را وان دا هه‌بیت، قوتابی ماسكا بكه‌نێ و به‌رده‌وام پاقژی بهێته پاراستن.
هه‌مان نوژدارێ، كۆرونایێ گۆتژی: هه‌تا نوكه چ زارۆك ب كۆرونایێ ساخله‌می یا وان تێك نه‌چوویه یان كه‌فت بیت و بتنێ زارۆك ڤایرۆس ڤه‌دگوهێزن هه‌كه ئه‌و ڤایرۆسێ كۆرۆنایێ ل دایك یان باب یان ژ ئه‌ندامه‌كێ خێزانێ بیت و ئه‌و ڤایرۆسی هه‌لگریت و بینته قوتابخانی، له‌وما گرنگه دایك و بابێن قوتابیان ڤاكسینی وه‌ربگرن داكو ئه‌و ڤایرۆس نه‌هێته ڤه‌گوهاستن بۆ ناڤ قوتابخانێ و قوتابخانه نه‌بیت جهه‌كێ به‌لاڤبوونا ڤایرۆسی و هه‌مان ده‌م گرنگه مامۆستا ژی بگشتی ڤاكسینێ وه‌ربگرن چنكو هه‌ه مامۆستایی ڤاكسین نه وه‌رگربیت ره‌نگه قوتابی هه‌لگرێ ڤایرۆسی بیت و ژ مال بۆ مامۆستایێ خوه ڤه گوهێزیت.
د.شه‌هرام عه‌زیزی ئه‌و ژی گۆت: هه‌كه رێنمایێن ساخله‌میێ بهێنه بجهئینان ده‌رگه‌هێن قوتابخانا دشێن ئاسایی بهێنه‌ڤه‌كرن چنكو سالێن بوری گه‌له‌ك كارتێكرن ل قوتابیان هاته‌كرن و قوتابی چ فێرنه‌بووون و گه‌له‌ك قوتابی ده‌ربازبووینه و هه‌تا نوكه پیتا نوزان بخوینن و ئه‌ڤێ چه‌ندێ ژی دێ كارتێكرنه‌كا مه‌زن ل سه‌ر قوتابی هه‌بیت هه‌تا دگه‌هیته ئاستێ زانكۆیێ، ل گرنگه ئه‌ڤ ساله ئه‌و چه‌نده ل به‌رچاڤ بهێته وه‌رگرتن و لدووف رێنمایێن ساخله‌میێ ده‌رگه‌هێن قوتابخانا بهێنه ڤه‌كرن و ئێدی قوتابی و مامۆستا ژی بگه‌هه وێ باوه‌ریێ كو دڤێت خوه فێركه‌ن و ل گه‌ل كه‌تواری خوه ب گونجینن و فێربن دێ چه‌وا خوه ژ په‌ژیكا كۆرونایێ پارێزن.
هه‌مان نوژدارێ كۆرۆنایێ ل پارێزگه‌ها هۆكێ گۆت: بتنێ چاره‌سه‌ری ئه‌وه هه‌می مامۆستا و دایك و بابێن قوتابیان خوه تۆمار بكه‌ن و ڤاكسینێ وه‌ربگرن و هه‌مان ده‌م رۆژانه هه‌می رێكارێن خوه پاراستن ژ ڤایرۆسێ كورونایێ ل قوتابخانێ بهێنه وه‌رگرتن و دێ باشتر بیت وه‌زاره‌تا په‌روه‌ردێ ل سه‌ر هه‌می مامۆستا و فه‌رمانبه‌رێن فه‌رمانگه‌هێن حوكمی ببیته فه‌رمان كو دڤێت ڤاكسینێ وه‌ربگرن دا خوه ب پارێزن چنكو گه‌له‌ك كه‌س هه‌نه ڤاكسینێ نا وه‌رگریت چنكو ل ماله و چ ده‌واما ناكه‌ت، گرنگه كارگێریێن قوتابخانا ژی گه‌له‌ك ب هشیاری سه‌رده‌ریێ ل گه‌ل زارۆكان بكه‌ن و هه‌ر قوتابیه‌كێ نه‌خوش بیت یا پلێن گه‌رمێ له‌شێ وی بلند ببن هه‌ر ئێكسه‌ر بۆ نه‌خوشخانێ بهێنه ره‌وانه‌كرن دا چاره‌سه‌ریه‌كا بله‌ز بۆ بهێته دیتن.
ل دور ڤه‌كرنا ده‌رگه‌هێن زانكۆیان ژی، هه‌مان نوژدارێ كۆرۆنایێ گۆت: زێده‌تر مه‌ترسیا ڤایرۆسیچ كۆررۆنایێ ل زانكۆیان هه‌یه ژ قوتابخانێن په‌روه‌ردێ چنكو قوتابیێن زانكۆیێ دمه‌زنن و مه‌ترسی زێده‌تر هه‌یه ژ زارۆكێن سه‌ره‌تایی هه‌یه.
هادی مامۆستایێ قوتابخانا كه‌ڤله‌سنه ل په‌روه‌ردا دهۆك یا رۆژهه‌لات، ل دور وه‌رگرتنا ڤاكسینێ گۆت: هه‌تان وكه من باوه‌ری ب وه‌رگرتنا ڤاكسینێ نینه چنكو هزر دكه‌م ئه‌و ڤاكسینا ل ئه‌مریكا دهێته‌دانان نه‌هه‌مان ڤاكسینا ل ڤێره دهێته‌دانان وه‌ك مامۆستایه‌ك باوه‌ری هه‌تا نوكه بوومن دروست نه‌بوویه ئه‌ز ڤاكسینێ وه‌ربگرم.
هاڤین حسێن، دایكا قوتابیه‌كی یه قوناغا بنه‌ره‌ت، ل دور وه‌رگرتنا ڤاكسینێ بۆچوونه‌كا جوداتر هه‌بوو ژ مامۆستا هادی گۆت: وه‌رگرتنا ڤاكسینێ گه‌له‌ك یا باشه خێزانا مه هه‌ر هه‌میان ڤاكسین وه‌رگرتینه و ئه‌ڤه بتنێ چاره‌سه‌ری یه بۆ خوه‌پاراستنێ ژ په‌ژیكا كورونایێ له‌وما گرنگه هه‌می دایك و بابێن زارۆكان و هه‌ر هه‌می وه‌لاتی ڤاكسینێ وه‌ربگرن، دا ئه‌ڤ ساله ژی نه‌بیت قوربانی ڤایرۆسێ كۆرۆنایێ.
