باشترین چاره‌سه‌رى بۆ قه‌یرانا ل گه‌ل به‌غد!
دێران كتانى
ل سالا 1923 په‌یمانا سیڤه‌ر هاته به‌تالكرن و په‌یمانه‌ك نوو ب ناڤێ په‌یمانا لۆزانێ د ناڤبه‌را تركیا، بریتانیا، فره‌نسا، ئتالیتالیا و وه‌لاتێن دن ده هاته مۆهركرن، هه‌ر چه‌ند كو هه‌ری زێده كورد ب ڤێ په‌یمانێ را دئه‌له‌قه‌داربوون، لێ ئه‌و ب ته‌ڤاهی د وێ په‌یمانێ دا هاتن پاشگوهكرن! ئه‌و بێی وان جڤیان و په‌یمانا سیڤه‌ر، كو وان چه‌ند سال به‌ری وێ په‌یمانێ ب وان ڕا ئیمزه كربوو، به‌تال كرن! ئه‌وان هه‌بوونا كوردان به‌تال كرن و ئه‌ردێن وان ب بێهه‌مدی به‌لاڤكرن، دا كو باب ل وه‌لاته‌ك بیت و كور ژی ل وه‌لاته‌كێ دن! د ناڤبه‌را شه‌ڤه‌ك و رۆژه‌كێ دا باب بوو ئیراقی، مامێ بوو تورك، یێ دن سووری بوو، و ب ڤى ره‌نگى! ژ هینگێ ڤه، كورد چو جاران ئارام نه‌بوونه، و وان ب ئاوایێن جۆر و جۆر ده‌ست ب تێكۆشینێ كرن، نه‌مازه كوردێن باشوورێ كوردستانێ. چالاكیێن وان ژ پارچه‌یێن دن یێن كوردستانێ پرتر بوون، و د هه‌مان ده‌مێ دا ده‌رده‌رسه‌ریێن وان ژی ژ ده‌رده‌سه‌ریێن مایین یێن كوردان مه‌زنتر بوون، و یا هه‌ری خراب ژی كاره‌ساتا هه‌له‌بجه بوو! ژ وێ دیرۆكێ ڤه، باشوورێ كوردستانێ بوو باكۆرێ عیراقێ (شمال العراق)!، و ئه‌م، كورد هه‌رده‌م ژ مافێن خوه بێبه‌هر دبین ژبال هه‌می حوكمه‌تێن به‌غدایێ! حوكمه‌ت په‌نابا خوه دئیننه كوردان و ته‌نێ ده‌ما كو ئه‌و لاواز دبن داخوازا هاریكاریێ دكه‌ن و لێ هه‌ر ده‌مێ كو هێزا وان خورت دبیته‌ڤه، ئه‌و ڤه‌دگه‌رنه سه‌ر وێ نه‌هه‌قیا ل هه‌مبه‌رى مه دكه‌ن و دیسا مافێن مه ب ده‌ست خوه دئێخن! قه‌یرانا ڤێ داویێ ژى گرۆڤه‌یا هه‌ری باش یا گۆتنێن منه. حوكمه‌تا هه‌رێما كوردستانێ ژ ۲۰۰۳یان ڤه، پشتگریه‌ك خورت ژ بۆ حوكمه‌تێن به‌غدا كربوو! و هه‌ر ئه‌وبوو كو وێ ناڤۆكا حوكمه‌تا ئێكێ دانایى! هه‌ر كورد بوون خودانێن قه‌نجیێ د دامه‌زراندنا پرانیا حوكمه‌تێن پشتی وێ دا و هه‌ر ئه‌ون خوه‌دیى كریارا هه‌ری مه‌زن! هه‌ر كورد بوون كو سوننه و شیعه پێكدئینان و ل هه‌ڤ دئانین نێزیك و ناڤبژیانى د ناڤبه‌رێ دا دكرن و بۆچوونێن وان نێزیكى هه‌ڤ دكرن! لێ، مینا پێشیێن خوه، ئه‌و ڤه‌گه‌ریا شه‌ڕێ ب گه‌لێ كوردستانێ ڕا ب ده‌بارا خوه و بڕینا نانێ ژیارێ، لێ سه‌ره‌راى نه‌رمبوونه‌كا مه‌زن، ژ لایێ حوكمه‌تا كوردستانێ ڤه كو د هه‌یاما ڤێ داویێ دا ل گه‌ل حوكمه‌تا به‌غدایێ كرى، و سه‌ره‌رایی ڕووره‌شیێن وێ، جار بۆ جارێ ل هه‌مبه‌ر هه‌رێمێ، لێ هه‌رده‌م ناخوازیت كو یا دلسۆز و دادپه‌روه‌ر بیت ل هه‌مبه‌ر هه‌رێما كوردستانێ، ژ به‌ر ڤێ ئێكێ یا ئه‌ز دبینم وه‌كو باشترین و چێترین چاره‌سه‌ری ژ بۆ ڤان كریزێن دوباره دبنه‌ڤه، یان ڕاگه‌هاندنا سه‌رخوه‌بوونا باشوورێ كوردستانێ، و ئه‌ڤه یا كو هه‌ر كورده‌ك دلسۆز دخوازیت، لێ هه‌كه ئه‌ڤ چاره‌سه‌ریه ئه‌سته‌م بیت و نه گه‌نگاز بیت، و دێ ده‌ری ل به‌رامبه‌ر هێزێن ئیراقێ و توركى و ئیرانێ دا ڤه‌كه‌ت كو ل پێشچاڤێن وه‌لاتێن جیهانێ هێرشی كوردستانێ بكه‌ن، بێیی كو لڤینه‌ك ژ جیهانێ بهێته كرن، بلا ئه‌و چاره‌سه‌ریا دویه‌مینێ بجه بینن و دبیت كو نها ته‌نێ ئه‌و یا ل به‌ر ده‌سته! چاره‌سه‌ریا دویه‌مین ژى ئه‌وه كو ڕێكه‌فتنا حوكمه‌تا كوردستانێ ل گه‌ل حوكمه‌تا توركیێ یه، كو باشوورێ كوردستانێ ژی دێ ته‌ڤلى تركیێ بیت و چیته ب سه‌ر ڤه، و ل شوونا كو سه‌ر ب ئیراقێ ڤه یا گرێدایی بیت، ئه‌م دێ چینه سه‌ر ب تركیێ ڤه! ب مه‌رجه‌كى كو هه‌می ده‌ستكه‌فتیێن مه یێن نه‌ته‌وه‌یی بهێنه پاراستن، ئه‌ز باوه‌ر دكه‌م كو ئه‌ڤ گاڤه دێ پتر كوردستانێ ب هه‌ڤرا گرێده‌ت ل شوونا كو یا پرت و به‌لاڤ ببیت، و ل شوونا ل سه‌ر چار پارچه‌یان یان پارڤه‌كرى بیت، ئه‌و دێ بیته سێ پارچه و چو جوداهی د ناڤبه‌را چو داگیركاره‌كى دا نینه، چ ئیراقی بیت، توركى بیت یان بیانی، داگیركه‌ر و كۆلۆنیالیزم هه‌ر دێ مینیت داگیركار، ده‌ستێن وان هه‌میان دسۆرن ب خوینا باب و باپیرێن مه، و هه‌كه جوداهیه‌ك هه‌بیت ژى دێ ئه‌ڤ پێنگاڤه یا ئه‌رێنی بیت، ژ به‌ر كو دێ سه‌ر ب ده‌وله‌ته‌كا سه‌ربخوه ڤه بین و نه یا بنده‌ست وه‌كو ئیراقێ، كو ژ ئالیه‌كێ ڤه ئیران بۆ خوه برێڤه دبه‌ت و ژ ئالیه‌كێ دى ڤه توركیا بۆ خوه بێڤه دبه‌ت!
و/ ئه‌ڤرۆ
