باشنڤیسەكێ كورد مەزنترین قورئان ب دەستی نڤیسی
رەمەزان زەكەریا
باشنڤیسەكێ كورد، كو خەلكێ دەڤەرا ڕانیا یە، پشتی شەش سالێن بەردەوام ژ كاركرنێ، شیا پڕۆژەیەكێ مەزن یێ نڤیسینا قورئانا پیرۆز ب قەبارەیەكێ مەزن ل ئیستەنبول ب دووماهی بینیت.
باشنڤیس (عەلی زەمان) د دیدارەكێ دا بۆ رۆژنامەیا ئەڤرۆ گۆت: هەر دەمێ ئەز وێ قورئانێ دبینم یا من ب دەستی نڤیسی، هەستەكێ گەلەك خۆش ل دەف من پەیدا دبیت كو خودێ ژی دایە من كو كارێ خۆ ب دووماهی بینم، د ژیێ دوزازدە سالیێ دا حەزا ڤی هونەری ل دەف من پەیدا بوویە.
ناڤبری گۆت: نوكە دەستنڤیس د ناڤ سندوقێن مزگەفتا لێ هاتییە نڤیسین د پاراستی نە، هیڤی خوازم ئەڤ كارێ هونەری یێ تایبەت ل مۆزەخانەیەكا تایبەت یان جهەكێ ژ هەژی بهێتە نیشادان، دا كو وەلاتی و حەزژێكەرێن باشنڤیسیێ بشێن ببینن و وەك دەستكەفتەكێ دەستی یێ دەگمەن بهێتە هژمارتن، بۆ زانین ئەو قورئانا پیرۆز ل سەر (302) لاپەرەیێن دولایەنی هاتیە نڤیسین، كو درێژیا هەر لاپەرەیەكێ چار مەترن و پانیا وێ پێنج مەترە، ئەوا ڤی كاری جودا دكەت كوالێتی و جۆرێ لاپەرەیانە، ئەڤ لاپەرە ب رەنگەكێ تایبەت هاتینە بەرهەمئینان و كەرەستەیێن وەك هێك و نیشاستەیا گەنمە شامیێ تێدا هاتینە بكارئینان دا كو بۆ سەدان سالان بمینن و تێك نەچن.
