باكوور و ره‌وشا نوو
حوكمه‌تا ئاكه‌پێ ژ سالا 2013ان دا ئاماده‌كاریا خوه یا كو ل ناڤچه‌یێن باژارێن باكوورێ كوردستان ئۆپه‌راسیۆنا پێك بینه كر بوو. چه‌ند رۆژ به‌رێ د ئاخافتنا سه‌رۆكێ ئه‌‌وله‌هیێ ئێ گشتی و د ئاخافتنا سه‌رۆك وه‌زیر دا ئه‌ڤه هاته ئاشكه‌را كرن. یانی ئه‌ڤه تێ چ واته‌یێ? سه‌رێ 2 مه‌ها یه كو ل باكوورێ كوردستان قه‌تلیعام و وێرانكرن چێدبت نه ژ بۆ به‌رسڤا خوه‌رێڤه‌بریێ یه. حوكمه‌تا ئاكه‌پ ل 18 ناڤچه‌یێن باژارێ باكوورێ كوردستان داخوازا ئۆپه‌راسیۆنان كریه و ژ بۆ ڤێ داخوازا خوه ژی خه‌بات كریه. د هه‌لبژارتنا 7ێ خزیرانێ دا ئارمانجا وان تێك چوو و ژ بۆ وێ ژی سه‌رۆك كۆمار ئه‌‌ردۆگان دوباره‌كرنا هه‌لبژارتنا ئانی زمان. د 45 رۆژان دا ژ بۆ كو حوكمه‌ت نه‌یێ ئاڤاكرن داود ئۆگلوَ وه‌خت ده‌رباس كر. ئارمانجا وان ئهو بوو كو 45 رۆژ ب داوی ببت و ل سه‌ر بریارا ئه‌‌ردۆگانی دووباره بچن هه‌لبژارتنێ. وه‌ك كو ون ژی دزانن د دوباره‌كرنا هه‌لبژارتنێ دا ئاكه‌پ هه‌ر كارێ خوه هشت و دژاتیا هه‌ده‌پێ و كوردان كر. ب ڤێ ئارمانجا خوه سه‌ركه‌فتن ب ده‌ستڤه‌ئینا.
ئێدی هه‌ر تشت راسته راست خوه‌یا دكه‌ت و نه سه‌رۆك وه‌زیر داود ئۆگلو نه ژی كه‌سه‌كی دن نا ڤه‌شێرن كو ئارمانجا وان چیه! ئهو دبێژن كو ڤان ئۆپه‌راسیۆنا وێ ل باكوورێ كوردستان به‌رده‌وام بكه‌ن و ئه‌گه‌ر خه‌نده‌ك و پاراستنا گه‌ل وه‌ره شكه‌ناندن ژی وێ له‌شكه‌رێ تورك و تانك و تۆپێن وان وێ ل ناڤچه‌یان بمینن. یانی وه‌ك مژووكرنا جیهه‌كی وێ ئهو سوپایێ تورك ل ور بن.
د ئاخافتنێن سه‌رۆك وه‌زیر ئه‌حمه‌د داود ئۆگلو دا تشته‌ك بالا مرۆڤی دكشینت كو ئێدی داود ئۆگلوی پرۆفیسۆریا خوه ژ بیر كریه و وه‌ك له‌شكه‌ره‌كی دئاخڤت. یانی ل سه‌ر ره‌وشا كوردان ده‌ما دئاخڤت خوه ژ بیر دكه و وه‌ك كو ل هه‌مبه‌رێ دوژمنێ خوه باخڤت و داخوه‌یانیان دده‌ت. ئهو ئاخافتنا كو “مال ب مال وێ وه‌ره پاقژكرن” ژی ئه‌ڤه‌یه. یانی كوشتنا كوردا و داخازێن كوردان ئێ ده‌مۆكراتیك وه‌ك پاقژیێ دبینن! ئه‌‌ڤ ژ بۆ كوردا تشته‌ك غه‌ریب نینه. د ده‌ما سه‌رهلدانا سه‌ید رزا ژی دا حوكمه‌ت ب ڤی ره‌نگی دئاخڤت و هه‌موو رۆژنامه‌یێن د بن كۆنترۆلا وان دا پاقژكرنا كوردا ژ خوه ره ب كار دئانین. بالكێشه كو دیسا رۆژنامه‌یێن د بن كۆنترۆلا ئاكه‌پێ دا تشتێ وسان دنڤیسن و پارڤه دكن!
سه‌لاحه‌ددین ده‌میرتاش ل ئامه‌دێ د جڤینه‌كێ دا ئانی زمان كو “ئهو كه‌سێن به‌حسێ پاقژیێ دكن، دكارن توالێتێن ڤێ ئاخێ پاقژ بكن” ژ ئالیێ گه‌لێ باكوورێ كوردستان ڤه هات عه‌جباندن. هه‌ده‌پ، ده‌به‌په و كه‌جه‌ده ئاماده‌كاریا كۆنگره‌یا ب له‌زگینی دكن و وێ بریاره‌ك بدن ل سه‌ر داخوازا خوه‌رێڤه‌بریێ. دیاره كو پشتێ كۆنگره‌یێ وێ ژ بۆ پاشه‌رۆژا كوردا بریارێن گرنگ وه‌رن داین. ژ به‌ر وێ به‌ریا كۆنگره‌یێ هه‌ڤدیتنا ده‌میرتاش و لاڤرۆڤ (وه‌زیرێ كارێ ده‌رڤه یێ روسیا) ژی گه‌له‌ك گرنگ بوو. به‌ریا سه‌رێ سالێ ئان ژی د سه‌رێ 2016ان دا ژ بۆ كوردا ده‌مه‌ك نوو ده‌ستپێ دكه‌ت.
