بالیۆزخانەیا ئەمریكا ل ئیراقێ: هێزێن مە ب تمامی بەغدا چۆل ناكەن
بالیۆزخانەیا ئەمریكا ل بەغدا راگەهاند: ئەو راپۆرتێن باس ل وێ چەندێ دكەن كو هێزێن ئەمریكی هەر ژ رۆژا شەمبیێ 30/8/2025 دێ ب تمامی بەغدا چۆل كەن، د دروست نینن.
بالۆزخانەیا ئەمریكا ل بەغدا گوت ژی» ب گۆڕەی وێ بەیاننامەیا هەڤپشك ل رۆژا 27/9/2024 هاتیە بەلاڤكرن و تێدا خشتەیا دووماهیئینان ب ئەركێ سەربازیێ هەڤپەیمانییا نێڤدەولەتییا دژی داعشێ ل ئیراقێ هاتیە راگەهاند، هێزا ئەركێن هەڤپشك – ئۆپەراسیۆنا ئیرادەیا پیلایی، ل دووڤ وی خشتەیێ دەمكیی رێككەفتن ل سەر هاتیە كرن كار بۆ ڤەگوهاستنا هێزێن هەڤپەیمانان دهێتە كرن، ئەڤە ژی د چارچۆڤەیێ دووماهی ئینان ب ئۆپەراسیۆنێن سەربازی ل ئیراقێ».
ئەڤە د دەمەكی دایە، ل رۆژا 29/8/2025 دو ژێدەرێن ئەمنی یێن بلند ل ئیراقێ د داخۆیانیێن رۆژنامەڤانیدا راگەهاندبوو» هەر ژ رۆژا شەمبیێ 30/8/2025 هێزێن ئەمریكی ل چەند دەڤەران ل بەغدا دێ دەست ب ڤەكێشانێ كەن، هەروەسا شیرەتكارێ لژنەیا ئاسایش و بەرگریێ ل جڤاتا پارێزگەها ئەنبارێ ژی گوتبوو «هێزێن ئەمریكی دێ خوە ژ بنگەهێ عەینولئەسەد ل ئەنبار ڤەكێشن».
ب گۆڕەی وان هەردو ژێدەرێن ئەمنی یێن ئیراقی یێن بلند» ڤەكێشانا هێزێن ئەمریكی دێ ژ دەڤەرا كەسك ل بەغدا، فرۆكخانەیا بەغدا یا نێڤدەولەتی و بنگەهێ فەرماندەیا ئۆپەراسیۆنێن هەڤپشك ل بەغدایێ بیت».
ژ ئالیێ خوەڤە عەبدوللا جغێفی، شیرەتكارێ لژنەیا ئاسایش و بەرگریێ ل جڤاتا پارێزگەها ئەنبارێ د داخۆیانییەكا رۆژنامەڤانیدا راگەهاندبوو» ل دووڤ پێزانینان، ڤەكێشانا هێزێن ئەمریكی دێ بنگەهێ عەینولئەسەد ل پارێزگەها ئەنبارێ ژی ڤەگریت».
هێزێن هەڤپەیمانییا نێڤدەولەتییا دژی داعشێ ژ سالا 2014 ل سەر داخوازییا فەرمییا حوكمەتا ئیراقێ و ب مەرەما روو ب رووبوونا رێكخراوا تیرۆرستییا داعشێ ل ئیراقێ د جهگیرن و پێكهاتەیا سەرەكییا وێ هێزێ ژی ژ لەشكرێ ئەمریكییە.
ژ ئالیێ خوەڤە بەرپرسەكێ وەزارەتا بەرگرییا ئەمریكی (پنتاگۆن) بۆ كەنالی (حەدەس عەرەبیە) راگەهاند» وەزارەتا بەرگرییا ئەمریكی یا پێگیرە ب دووماهیئینانێ ب ئەركێ هەڤپەیمانییا نێڤدەولەتی ل ئیراقێ ل مەها ئیلۆنا 2025، بەلێ ل بنگەهێن سەربازی ل ئیراقێ دێ پشتەڤانییا ئۆپەراسیۆنێن دژی داعشێ كەن ل سووریێ هەتا ئیلۆنا 2026».
وی بەرپرسێ وەزارەتا بەرگرییا ئەمریكی دوپاتكر ژی» د وی دەمی دا دێ لەشكرێ ئەمریكی بەردەوام پێداچوونێ و گوهۆڕینێ د هێزێن خوە دا ل ئیراقێ كەت».
