بالیۆزخانەیا ئەمریكا ل بەغدا داخوازا سزادانا فەرماندەیێن میلیشیایا حزبوللا یا ئیراقی دكەت
بالیۆزخانەیا ئەمریكا ل بەغدا د بەیاننامەیەكێدا كو ل تۆرا جڤاكییا ئێكس بەلاڤكری، راگەهاند» سەرەخوەشیێ ل كەسوكارێن قوربانییان دكەین ئەوێن ل سەر دەستێ چەكدارێن حزبوللا هاتینە كوشتن كو ئەوژی ژ ئالیێ ئەمریكاڤە ب رێكخراوەكا تیرۆرستی هاتیە هەژمارتن و ئێكە ژ میلیشیێن ب سەر حەشدا شەعبی ڤە».
بالیۆزخانەیا ئەمریكا رۆهنكر ژی كو وێ میلیشیایێ ل رۆژا 27/7/2025 ل فەرمانگەهەكا وەزارەتا چاندنێ ل بەغدا ئەو تاوانە ئەنجامدایە.
دوپاتكر ژی» خەمبارین ب ژ دەستدانا گیانان كو كارمەندەكێ پۆلیسێن فیدرالی و كەسەكێ سڤیل بێ تاوان بوون، هیڤییا چاكبوونا ب لەز ژی بۆ برینداران دخوازین».
بالیۆزخانەیا ئەمریكا ل بەغدا داخواز ژ حوكمەتا ئیراقا فیدرال كر پێرابوونان وەربگریت تاكو ئەو تاوانبار و سەركردەیێن وان بێی گیرۆبوون بهێنە رادەستكرن بۆ دادگەهێ.
دیاركر ژی» ئەڤ چەندە بابەتەكێ سەرەكییە بۆ پاراستنا سەروەرییا قانوونێ و رێگریكرن ل دوبارەبوونا كریارێن توندوتیژیێ».
ئەڤە د دەمەكیدایە كو ل رۆژا ئێكشەمبییا بۆری ل سەر گوهۆڕینا رێڤەبەرەكێ چاندنێ ل بەغدا، چەكدارێن میلیشیا حزبوللا یا ئیراقی شەڕەكێ مەزن ل بەغدا كر و چەندین كارمەندێن پۆلیسان و كەسێن سڤیل كوشتن و برینداركرن.
بالیۆزخانەیا ئەمریكا ل بەغدا داخوازا سزادانا سەركردەیێن میلیشیا حزبوللا ئیراقی كر و دیاركر كو ئەو میلیشیایە ب سەر حەشدا شەعبی ڤەیە و د لیستا تیرۆرێ یا ئەمریكا دایە.
