بالیۆزێ بەرێ یێ ئەمریکا ل سووریێ هۆشداریێ ددەتە ئیدارا بایدنی
بالیۆزێ بەرێ یێ ئەمریکا ل سووریێ دیار دکەت، نها رەوشا رۆژهەلاتا ناڤین گەلەک یا هەستیارە و ب تایبەتی ژی ل سووریێ رەوش گەلەک جودایە، هەکە ئەمریکا نها هێزێن خوە ژ سووریێ ڤەکێشیت ئەو یەک دێ کاریگەریەکا گەلەک خراب ل بەرژەوەندیێن ئەمریکا ل رۆژهەلاتا ناڤین کەت.
رۆبرت فۆرد بالیۆزێ بەرێ یێ ئەمریکا ل سووریێ بۆ دەزگەهێن راگەهاندنا ئەمریکا دیار کر، دەمەکە بەحسێ ڤەکێشانا هێزێن ئەمریکا ژ ئیراقێ و سووریێ دهێتە کرن، ل ئیراقێ رەوشەکا هندەک جودا هەیە، لێ رەوش ل سووریێ گەلەک خرابە، چونکی داعش ل گەلەک دەڤەران ل سووریێ خوە ب رێکخستن کریە، ل ئالیێ دی ژ بەر شەرێ نها د ناڤبەرا ئسرائیلێ و حەماسێ دا گرۆپێن هشكباوەر ل گەلەک دەڤەران بەرهەڤی بۆ ئێرشێن نوو کرینە، د دەمەکێ وەسا دا هەکە ئەمریکا بڤێت هێزێن خوە ژ سووریێ ڤەکێشیت دێ رەوش گەلەک خرابتر لێ هێت و گۆت: (ب نەمانا هێزێن ئەمریکا ل سووریێ دێ داعش و گرۆپێن دی یێن هشکباوەر دەست ب ئیرشێن نوو کەن، ئەو یەک دێ سووریێ بەر ب پاشەرۆژەکا نەدیار ڤە بەت، ل ئالیێ دی شام ژی گەلەک لاوازە و نەشێت کۆنترۆلا هەموو ئاخا سووریێ بکەت، ژ بەر ڤێ یەکێ ژی دڤێت جارێ هێزێن ئەمریکا ل سووریێ بمینن و ئەو یەک د بەرژەوەندیا هەموو سووریێ و دەڤەرێ دایە).
ناڤهاتی ئەو یەک ژی دیار کر، رەوشا رۆژهەلاتا ناڤین گەلەک یا ئالۆزە و دژبەرێن ئەمریکا ژی یێ کار دکەن دا جارەکا دی ئالۆزیان د بەرژەوەندیا خوە دا بکار بینن و پێگەهێ ئەمریکا لاواز بکەن، ژ بەر ڤێ یەکێ ژی دڤێت ئەمریکا جارێ ل سووریێ و هەتا ل ئیراقێ ژی بمینیت، نها رەوش بۆ ڤەکێشانا هێزێن ئەمریکا ژ ئیراقێ ژی یا گونجای نینە، دڤێت ئەمریکا فشارێن خوە ل سەر ئیراقێ زێدەتر لێ بکەت دا حوکمەتا ئیراقێ نەچار بیت جارێ بەحسێ بابەتێ ڤەکێشانا هێزێن ئەمریکا نەکەت.
بالیۆزێ بەرێ یێ ئەمریکا ل سووریێ بەحسێ رۆژئاڤایێ کوردستانێ ژی کریە و دیار دکەت، هەکە ئەمریکا هێزێن خوە ژ سووریێ ڤەکێشیت تورکیا ب بەهانا شەرێ ل دژی تیرۆرێ دێ ئێرشی باکورێ سووریێ کەت، وی دەمی دێ ب هزاران کەس ئاوارەی دەڤەرێن دی یێن سووریێ بن، ل سووریێ چەند ملیۆن کەس ئاوارە بووینە، رەوشا ئابووری یا خەلکی گەلەک خرابە، نها پێدڤیا سووریێ و ب تایبەتی ژی یا رۆژئاڤایێ کوردستانێ ب ئارامیێ و گەشەپێدانا ئابووری هەیە، دڤێت ئەمریکا رێ نەدەت جارەکا دی تورکیا ئێرشی باکورێ سووریێ بکەت، ئەو یەک دێ بیتە ئەگەرێ ئالۆزیێن نوو و دێ کاریگەریەکا گەلەک خراب ل رەوشا کوردان کەت و دێ بیتە ئەگەر کورد خوە ژ ئەمریکا دوور بکەن.
