بانكا فیدرالی مۆهلەت ب بانكێن «هەژمارا من» دایە
هەولێر، قائید میرۆ:
بسپۆرەكێ ئابووری ئاشكراكر، ئەو بانكێن د پڕۆژەیێ (هەژمارا من) دا پشكدارن، هەموو ژ لایێ بانكا ناڤەندی یا ئیراقێ ڤە مۆهلەت وەرگرتیە و دبێژیت: ژ لایێ قانوونی چو جوداهی د ناڤبەرا تەوتین و هەژمارا من دا نینە.
دكتۆر ئەرشەد تەها، بسپۆرێ ئابووری بۆ رۆژناما ئەڤرۆ دیاركر، رێككەفتن د ناڤبەرا هەردو حوكمەتێن هەرێم و فیدرال دا ل دۆر پڕۆژەیێ (هەژمارا من) هەیە و گۆت: «هەموو بانكێن پشكدار د پڕۆژەیێ هەژمارا من دا ژ لایێ بانكا ناڤەندیا ئیراقێ ڤە هاتینە تۆماركرن و مۆهلەت وەرگرتیە، لەوڕا هەژمارا من چو ئاریشەیێن قانوونی نینن و دادگەها فیدڕال ژی دانپێدان ب ئەڤان بانكان كریە یێن د هەژمارا من دا پشكدارن، چو جوداهی د ناڤبەرا تەوتین و هەژمارا من دا نینە و هەردو د قانوونینە».
دكتۆر ئەرشەد تەها گۆتژی: «یا گرنگە رێككەفتنا د ناڤبەرا هەرێم و بەغدا دا بهێتە بجهئینان بۆ هنارتنا مووچەیێ فەرمانبەرێن هەرێما كوردستانێ، چونكی یا گرنگ بۆ فەرمانبەری ئەوە مووچەیێ وی د دەمێ خوە دا بهێتە بەلاڤكرن، ڤێجا ب هەر رێكەكا بیت، لێ بۆ سەروەریا هەرێما كوردستانێ یا گرنگە مووچە ب رێیا هەژمارا من بهێتە بەلاڤكرن، نوكە رێككەفتن هەیە و ئاریشە ل هەمبەر هنارتنا مووچەیێ فەرمانبەران نەماینە».
