بانكێن بازرگانی دێ هێنه كێمكرن
هه‌ولێر، قائید میرۆ:
هژماره‌كا زۆر یا بانكێن بازرگانی ل هه‌رێما كوردستانێ هه‌نه و رێڤه‌به‌رێ گشتیێ بانكێن بازرگانی ژی ل هه‌رێما كوردستانێ دبێژیت: مه پلان یا هه‌ی هنده‌ك بانك بهێنه تێكه‌لكرن و هژمارا وان دێ هێته كێمكرن.
مه‌ولوود سابر، رێڤه‌به‌رێ گشتیێ بانكێن بازرگانی ل هه‌رێما كوردستانێ بۆ رۆژناما ئه‌ڤرۆ دیار كر، ل هه‌رێما كوردستانێ 90 بانكێن بازرگانی هه‌نه و رۆژانه كاروبارێن بازرگانی ب ڕێڤه دبه‌ن و گۆت: “ئه‌ڤان بانكێن بازرگانی رۆله‌كێ به‌رچاڤ هه‌یه و به‌رده‌وامن ل سه‌ر ئه‌ركێ خوه، به‌لێ حوكمه‌تا هه‌رێما كوردستانێ پلان هه‌یه پێداچوونێ د كاروبارێن بانكێن بازرگانی دا بكه‌ت و هنده‌ك ژ وان بانكێن بازرگانی دێ هێنه كێمكرن، ئانكو ل هنده‌ك جهان دێ دو بانك هێنه تێكه‌لكرن و بنه ئێك بانك”.
مه‌ولوود سابر خویا ژی كر، بڕیاره بانكه‌كا نشتیمانی ل هه‌رێما كوردستانێ بهێته ڤه‌كرن و ئه‌و بانكه مینا بانكێن ره‌شید و رافیده‌ین دێ كار بۆ دانا پێشینه‌یان كه‌ت وه‌كی پێشینه‌یێن چاندنێ و پیشه‌سازی و هه‌موو پێشینه‌یێن دیژی، چونكو قه‌بارێ سه‌رمایێ ئه‌ڤێ بانكا نشتیمانی دێ گه‌له‌ك بیت و گۆت: “نوكه وه‌زاره‌تا دارایی و ئابووری مژوولی دامه‌زراندنا ئه‌ڤێ بانكا نشتیمانیه، هه‌تا سه‌رۆكایه‌تیا جڤاتا وه‌زیران ژی رازیبوونا خوه دیاركریه و د ده‌مه‌كێ نێزیك دا دێ هێته ڤه‌كرن”.
