باوەشا هیڤییەك وەغەركری
چیای محەمەد سەعید
رۆژەكا زەر ب سەر ژیێ مندا هات
ژیان یا ب لێدانێن دلێ من دكەنیت
ئەو باش دزانیت ئەڤە وەغەرە و دێ من كۆژیت
د ئێڤارەكا درەنگ دا
خەریبیێ ئەز د لاشێ خۆدا هەلاندم
دبن هندەك عەڤرێن تاری
ل هنداف زیر و پەسارا ئەز گێراندم
وێ بەحسێ بێ عاریا خۆ دكر
ژیێ من دبن غەزەبا وێڤە رێهدینا من كرە بەفر
پەرێ رۆژێ خاتر ژمە خواست
و شەڤێ دەستێ من گرت
ئەی هەوارە دێ چ ل ڤێ تارستانێ كەم
تاییێن بێیتەبوونێ بسەر گیانێ مندا هاتن
دلێ من یێ خاترێ ژ من و تە دخوازیت
رەنگە مرن سەفەرەكا خۆش بیت!
چونكی هەتا نوكە هەركەسێ چووی نەڤەگەریایە
هەمی پرسیار ژڤێ وێستگەهێ بێی بەرسڤ مان!
بۆچی ئەز جارەكێ ژی بخۆ نەژیایمە؟
و هەتا نوكە ئەز یێ ژبەر تە دژیم !
ژیێ من تێرا خەمێن من ناكەتن
ڤەرێژا خوشییێن من
دڤێتن ببیتە كەڤالێ بەختەوەرییێ
ژ كووراتیا هیڤیان ژتە بگەریت
و ژڤالیتیا ژیێ تنێ بیریا هەبوونەكێ ژتە دكەت
تو ئەو پەیڤا پر بهای
یا كو هەمی كونجێن دلی پردكەی!
نوكەژی بیە باكۆزیركەك نێرینێن تە ئەز تێكدا سۆتم
هەستێن تەژی یێ خۆلیا من ددەنە بای
ژمن باوەربكە ئەز یێ گازی خەما دكەم
بلا بهێن و ل سەر برینێن من دادەن!
ژبەركو هەر ئازارەكا ئەز دكێشم
هەست ب دیتنەكێ ژتە دكەم
تو و بیرهاتن ئەو پارچا ڤالانە ژمن
ئەگەر سەدجار بمرم و دیسا ساخ ببمەڤە
هەر دێ بێژم ئەی جوانترین قەدەر
ئەڤ دنیا مەزن بێی هەبونا وە دۆزەخە!
ئەز هێشتا نزانم كا دەردێ بەفرێ چییە؟
یا جوانە وەكی خودێ تو ئافراندی
یا وێرانە وەك وی ژڤانێ تە خاتر ژمن خواستی
باوەربكە ئەڤە تو چووی
ئەز یێ ژبۆ بیرهاتنێن خۆ دگریم
تو نزانی كا چەند بێی تە د رەزیل و بێی خودانن
ژ هنگی وەرە هەر بیرهاتنەكا تە بۆ من دئینیت
خەریبی چاڤێن من دكەنە سیلاڤ!
وێنێ تە د رۆندكێن مندا دگەریت
د كەڕەسیها دلێ خۆدا
ب ئارامی یێ دگەل وێنێ تە دئاخڤم
من نەڤێتن كەسێ گوهـ ل من ببیتن
بشێوەیەكێ یێ وێران بوویم
شوینوارێن من كاڤل ژی نەماینە
دەنگێ چوونا شوین تبلێن مرنێ یێن د گیانێ مندا بری
هەمیا باركر بێهنا قیامەتێ یێ ژمن دهێت
دلێ من ژی جهنەمەكا دژوارە
خەیالێن من
ب دارێ سێدارێڤە وەكی ئالایێ بێی شانسیێ یارینە د دەستێن بای دا
پەیڤێن من یێن بووینە عەبد
سوجدا بۆ ڤی زمانێ لال دبەن
ژاری یا دگەل رۆندكێن من دباریت
هەر تشتەكێ بێهنا تە ژێ دهێت
یێ من ژێ تافیل دكەت
ئێدی سیتافكێ ژی دەست ژمن بەردان
هەرچنەبیت تو دبیرهاتنێن مندا بمینە
تو نزانی دلێ من یێ شكەستی
یێ د خەیالێن تەدا خۆ دقوتیت
چەند یێ خۆ ژتە ڤالا دكەت
دیسا ژتە تژی دبیتەڤە
ئها هوسا چەند یا ب ژانە
باوەشا هیڤیەك وەغەركری!
