باپیر كه‌سێ ئێكێ بوو خوارنگه‌هه‌كا سه‌رۆ پێكان ل ئامێدیێ ڤه‌كری
دهۆك، شاكر ئه‌تروشی:
ل ده‌ستپێكا سالێن هه‌شتێیان كه‌سه‌كێ به‌رنیاسێ باژێرێ ئامێدیی، ب ناڤێ (عه‌بدولعه‌زیز) بۆ جارائێكێ خوارنگه‌هه‌كا چێكرنا سه‌رۆپێكان (پاچه) ل سیلاڤا ئامێدیێ ڤه‌كر و پشتی وه‌غه‌ركری هه‌ر سێ كوڕێن وی جهێ وی گرتن و هه‌تا نوكه ئه‌و خوارنگه‌ه ل جهێ خوه مایه.
نۆخیب ئامێدی، كوڕێ وی كه‌سی یه، بۆ رۆژناما ئه‌ڤرۆ گۆت: ئه‌و ب خوه ناڤێ بابێ من عه‌بدولعه‌زیزه، لێ ژبه‌ركو هێشتا زوو سه‌رێ وی سپی ببوو، خه‌لكی ناڤێ وی كره (باپیر) و هه‌تا نوكه ژی ئه‌م وه‌ك بنه‌مال ب وی ناڤی دهێینه نیاسین، بابێ من كه‌سێ ئێكێ بوو پاچه ل ئامێدیێ چێكرین و وی دگۆته مه ده‌مێ من ئه‌ڤ خوارنگه‌هه ڤه‌كری نه‌فه‌رێ پاچێ ب چه‌ند ده‌رهه‌مان بوو، لێ ل سه‌رده‌مێ مه نه‌فه‌ر گه‌هشته (75) دینارێن سویسری، بۆ زانین بابێ من ل سالا 1999 وه‌غه‌ركریه، لێ مه وه‌ك بنه‌مال به‌رده‌وامی ب كارێ وی دا و نوكه ئه‌م سێ برا ڤی كاری دكه‌ین، دو برایێن من ل جهێ به‌رێ ل سیلاڤا ئامێدیێ ماینه، من ژی تایه‌كێ وی خوارنگه‌هێ ل دهۆكێ ڤه‌كریه و گه‌له‌ك كه‌س هه‌نه پتری سیه سالان دهێنه ده‌ف مه پاچێ دخۆن، هنده‌ك ژی هه‌بوون ژ حه‌زژێكه‌رێن به‌رده‌وامێن خوارنا پاچێ بوون لێ نوكه نه‌ماینه و ل جهێ وان كۆڕێن وان دهێن دخۆن.
ل دووماهیێ گۆت: پاچێن به‌رخی گه‌له‌ك دباشن و هنده‌ك مال هه‌نه نه‌به‌س ل زڤستانێ، به‌لكو ل وه‌رزێن دی ژی حه‌ز ژ خوارنا پاچێ دكه‌ن و دبێژنه مه بۆمه چێكه‌ین، هه‌روه‌سا نوكه پتریا رۆژان خه‌لكه‌ك ژ زاخۆ و هه‌ولێرێ و هنده‌ك جاران ژ مووسل ژی دهێن پاچێ ب سه‌فه‌ری دبه‌ن و گه‌شتیار عه‌ره‌ه‌ب ژی هاتینه ده‌ف مه و دبێژن پاچێن دهۆكێ دبێ هه‌ڤڕكن و ئه‌م ل دووف ناڤێ وه هاتینه.
