باژێره‌كێ ئاكنجیبوونێ بۆ هونه‌رمه‌ندان دێ هێته دروستكرن
ئه‌ڤرۆ، ره‌مه‌زان هه‌رنی:
كار ل سه‌ر دروستكرنا پرۆژه‌كێ ئاكنجیبوونێ بۆ هونه‌رمه‌ندێن كوردستانێ دهێته كرن كو ب تنێ هونه‌رمه‌ندان دێ ماف هه‌بیت؛ وان خانی و ڤله‌یان بكرن، ژ به‌ركو تایبه‌تن ب هونه‌رمه‌ندێن كوردستانێ ڤه.
هونه‌رمه‌ند و ده‌رهێنه‌ر پشتیوان عه‌بدولا، سه‌رپه‌رشتیارێ پرۆژێ دروستكرنا خانیێن هونه‌رمه‌ندان بۆ رۆژناما ئه‌ڤرۆ گوت: “ئێك ژ وان ده‌ستكه‌فتێن گرنگێن حكومه‌تا هه‌رێما كوردستانێ كو نوكه كار ل سه‌ر دهێته كرن، داكو بكه‌ڤیته د وارێ ب جهئینانێ دا، دروستكرنا پرۆژێ باژێرێ ئاكنجیبوونێ یه بۆ هونه‌رمه‌ندان، ئه‌ڤ پرۆژه ل هه‌ولێرێ ب هه‌ڤكاریا ده‌سته‌یا وه‌به‌رهێنانێ و سه‌ندیكا هونه‌رمه‌ندان و پارێزگه‌رێ هه‌ولێرێ دێ هێته دروستكرن، پرۆژه ژلایێ كۆمپانیا سالار هولدینگ گروپ و ب هه‌ڤكاریا كۆمپانیه‌كا ئیتالی ب جوانترین دیزانێ هونه‌رێ باژێرێ ئاكنجیبوونا هونه‌رمه‌ندان دێ هێته ئاڤاكرن”.
گوتژی: “پرۆژێ باژێرێ ئاكنجیبوونا هونه‌رمه‌ندان ژ 500 خانیێن 250 مه‌تری و 100 ڤلایێن 450 مه‌تری پێكهاتیه، رێژا هه‌ره زۆرا پرۆژه‌ی دێ كه‌سكاتی بیت و هولا سینه‌مایێ و شانۆ و موزیك و ستۆدیۆیه‌كا مه‌زنا به‌رهه‌مئینانا هونه‌ری ل خوه گریت، دگه‌ل موتێل و رێستورانت و كافیتریا تێدا هه‌نه و بۆ ڤیسته‌ڤالێن هونه‌ری دێ هێنه ب كارئینان”.
ناڤهاتی ئاشكرا ژی كر، د ناڤ باژێری دا ئۆفیس بۆ كۆمپانیایێن هونه‌ری دێ هێنه ڤه‌كرن، موزیك لایف و ئاهه‌نگ دێ ل باخچه‌یێن باژێری هێنه سازكرن و سینه‌ما به‌رده‌وام كاركه‌ت و سیسته‌مه‌كێ پێشكه‌فتی یێ به‌رهه‌مئینانا كاره‌بێ ب تیشكا رۆژێ دێ هێته دروستكرن بێ كو وایه‌ر دیار بن، كاره‌ب و غاز دێ 24 كاتژمێران هه‌بن.
هونه‌رمه‌ند و ده‌رهێنه‌ر پشتیوان عه‌بدولا خویا كر، خانی و ڤله ب شێوه‌یێ قستێ شه‌ش سالان بۆ هونه‌رمه‌ندێن ئه‌ندامێن سه‌ندیكایێ یان پشته‌ڤانیا سه‌ندیكایێ هه‌بیت دێ هێنه فرۆتن، پرۆژه ب مه‌زنترین دیزاین و روناهیا ئیتالی دێ هێته دروستكرن و پرۆژه دێ پشته‌ڤانیا چالاكیێن هونه‌ریێن سه‌ندیكایێ بۆ ده‌مێ پێنج سالان كه‌ت.
