باژێرڤانیا دهۆكێ ب گوژمێ نێزیكی 11 ملیار دیناران پرۆژه ئه‌نجام داینه
دهۆك، نه‌وزاد هلۆری:
به‌رپرسێ راگه‌هاندنا سه‌رۆكاتیا باژێرڤانیا دهۆكێ د داخویانیه‌كێ دا هه‌موو داتا و هووركاریێن كار و چالاكی و پرۆژێن خوه د سالا 2021ێ دا بۆ ئه‌ڤرۆ دیار كرن، ب گوره‌ی داتایێن وان ژی ئه‌ڤ ساله 71 پرۆژه ب گوژمێ نێزیكێ 11 ملیار دیناران هاتینه دروستكرن.
ئیسماعیل موسته‌فا، به‌رپرسێ راگه‌هاندنا سه‌رۆكاتیا باژێرڤانیا دهۆكێ بۆ رۆژناما ئه‌ڤرۆ گوت: “ئه‌ڤ ساله سه‌رۆكاتیا باژێرڤایا دهۆكێ 71 پرۆژێن جودا ل سه‌نته‌رێ باژێرێ دهۆكێ ب گوژمێ نێزیكی 11 ملیار دیناران ئه‌نجامداینه”.
زێده‌تر گوت: “ئێك ژ گرنگترین وان پروژان ژی، پرۆژێ چێكرنا ئوڤه‌رپاسا نێزیكی قوتابخانا سه‌فین بوو، ب گوژمێ شه‌ش ملیار دیناران، كو راسته‌وخوه ژلایێ وه‌زاره‌تا باژێرڤانی و گه‌شت و گوزارێ ڤه هاتیه ئه‌نجامدان، دیسا ب گوژمێ پتری سێ ملیار دیناران ژی چه‌ندین جادده‌یێن ناڤخوه د ناڤا سه‌نته‌رێ باژێرێ دهۆكێ دا ل سه‌ر بودجا گه‌شه‌پێدانا پارێزگه‌ها دهۆكێ هاتینه دروستكرن، هه‌روه‌سا ب گوژمێ ئێك ملیار دیناران 26 پرۆژه ل سه‌ر داهاتێ باژێرڤانیێ هاتینه دروستكرن و 42 پرۆژه ژی ل سه‌ر پێشینه‌یێن هه‌یڤانه ب گوژمێ نێزیكێ 800 ملیۆن دیناران هاتینه چێكرن، كو زێده‌تر پرۆژێن بچووك بوون”.
ناڤبری د درێژاهیا ئاخڤتنێن خوه دا دیار كر ژی كو ب گوژمێ نێزیكێ 34 ملیار دیناران پرۆژه‌كێ نوو ل دهۆكێ د ئه‌ڤ ساله دا دێ هێته چێكرن و گۆت: “ئه‌و ژی؛ پرۆژێ چێكرنا ئوڤه‌رپاس و ئه‌نده‌رپاسا ترافیكا بناڤی یه، دیسا رازیبوون ل سه‌ر 22 پرۆژان هاتیه‌كرن و ل سالا نوو دێ هێنه چێكرن”.
به‌رپرسێ راگه‌هاندنا سه‌رۆكاتیا باژێرڤانیا دهۆكێ گۆتژی: “د سالا بۆری دا نێزیكێ 174 هزار ته‌نێن به‌رمایكان ل دهۆكێ هاتینه كۆمكرن، دیسا 517 كه‌پر و بیستان و په‌رجان هاتینه خراپكرن، كو ب زێده‌گاڤی ل سه‌ر مۆلكێن گشتی هاتبوونه چێكرن، هه‌ر دیسا هزار و 700 جهێن جودا ژ به‌ر سه‌رپێچیان هاتینه گرتن”.
ئیسماعیل مسته‌فایی ئاماژه ب وێ یه‌كێ كر ژی كو 533 مۆله‌تێن ئاكنجیبوونێ و 346 مۆله‌تێن بازرگانی و 16 مۆله‌تێن خزمه‌تگوزاری و 426 مۆله‌تێن جودا ب وه‌لاتی و جهێن گشتی و جودا هاتینه دان و گوت: “د سالا بۆری دا هزار و 312 كه‌س ل گورستانا شاخكێ كو مه‌زنترین گورستانه ل دهۆكێ هاتینه ڤه‌شارتن، ژ وان ژی 716 ژ ره‌گه‌زێ مێ و 596 ژی ژ ره‌گه‌زێ نێر بوون، پشكه‌كا هه‌ره زۆر ژی ئه‌و بوون یێن ب كۆرۆنایێ گیانێ خوه ژ ده‌ستدایی”.
