باژێرڤانیا سەرسنکی نێزیکێ 100 کولێن ئاژەلی ژ ناڤ باژێرێ دەرخستن
ئەڤرۆ نیوز، مەحمود نھێلی:
سەرۆکێ باژێرڤانیا سەرسنکی، بۆ ئەڤرۆ نیوز دیارکر، کو ئەو نوکە یێن مژیلی راکرنا کول و نەھێلانا ئاژەلی نە، ل ناڤ باژێری، و بۆ ڤێ مەبەستێ لژنەیەک ھاتیە پێک ئینان.
سەرجون خوشابە، سەرۆکێ باژێرڤانیا سەرسنکێ، بۆ ئەڤرۆ نیوز دیارکر، کو ئەڤە ھەیامەکە ئەو مژوولی راکرنا کولێن ئاژەلی نە ل ناڤ باژێری، بتایبەتی ژی ل تاخێ ئازادی و گۆت: ( بۆ ڤێ مەرەمێ لژنەیەک ھاتیە پێک ئینان، ئەڤ لژنەیە بەردەوام یێ دووڤچوونا وان کولان دکەت یێن ناڤ باژێری، و ھەروەسا یێن سەر جادا سەرەکی. تا نوکە نێزیکێ 100 کولان ھاتینە راکرن).
دەربارەی دیتنا چارەسەریەکێ بۆ جھێن کولان یێن کو دڤێن بەردەوام ئاژەلی خودان بکەن، و ژیانا وان ل سەر خودانکرنا ئاژەلی ناڤھاتی دیارکر، نوکە وان جھەک دەست نیشانکریە، یێ دوورێ سەنتەرێ باژێریە. ب ھەڤکاری ل گەل رێڤەبەریا ناحیا سەرسنکی، و ب نڤیسار رێڤەبەریا گشتی ئاگەھدار کریە، و وان ژی رازبوونا خوە ل سەر دیار کریە.
تەکەز کر، ددەمەکی نێزیک دا ، ھەموو کولێن ناڤ باژیرێ دێ ھێنە راکرن و دێ بو وی جھی ھێنە ڤەگوھاستن ئەوێ ھاتیە دەست نیشانکرن.
