باژێرڤانیا شێلادزێ پێدڤی ب بودجەکا تایبەتە
ئه‌ڤرۆ نيوز:
سەرۆکێ باژێرڤانیا ناحیا شێلادزێ راگەھاند، باژێرڤانیا شێلادزێ پێدڤی ب بودجەکێ تایبەتە کو بۆ بھێتە دابینکرن، شێلادزێ ب پێشینەیەکا 10 ملیونی ناھێتە ئاڤاکرن. چونکو شێلادزێ بەردەوام دھێتە ئاڤەدانکرن و زوو ب زوی بەرفرەە دبیت و پێشکەفتنێن یلەز ب خوەڤە دبینیت و ئەڤ باژێرە پێدڤی ب خزمەتەکا بلەزە ژی.
ئەندازیار ھەژار محەمەد سەرۆکێ باژێرڤانیا ناحیا شێلادزێ بۆ ئەڤرۆ دیار کر: سنوورێ ناحیا شێلادزێ ژ رووبارێ شین تا کو گوندێ رەشاڤا ب خوەڤە دگریت، نێزیکی 50 ھزار کەسان ل ناحیا شێلادزێ دژین و گۆت: ل سنورێ قەزا ئامێدیێ وەکو باژێرڤانی ب پلە دوو دھێتە ھژمارتن، لێ وەک کەس ژ ھەمی باژێرڤانیێن دی زێدەترە. ل سالا 2001 باژێرڤانیا شێلادزێ یا ھاتیە دامەزراندن، دوو کۆمەلگەھان و ب دەھان گوندان ب خوەڤە دگریت، لێ ئەڤە ھەموو دکەڤنە سنورێ باژێرڤانیا شیلادزێ دا ب گوند ناھێنە ب ھژمارتن، ژ بەر کو ب پلانەکا زورا ب رێک و پێک ھاتینە دروستکرن و ب دەھان گوند دنھا دا د چولکرینە کو دکەڤنە سنورێ ناحیا شێلادزێ.
ھەژار محەمەد گۆت ژی: شێلادزێ ژ وان باژێرانە یێن بەردەوام بەرفرەە دبیت و خەلکەکێ زور قەستا ڤی باژێری دکەت ئاوارە و ھەم خەلکێ باشورێ کوردستانێ ژی ل شێلادزێ ئاکنجی دبن، ھەروەسا ئەو پرۆژێن بەری قەیرانێ ھەموو ھاتینە دروستکرن، ب تنێ ئێک نەبیت ئەو ژی ل کومەلگەھا سیریێ یە یێ چێکرنا رێک و جادێن وێ کومەلگەھێ و بەشەک ژ وی کاری ھاتیە ئەنجامدان و یێ دی ژی ھاتیە راوەستاندن ژ بەر قەیرانا دارایی، بەلێندەری داخوازا خوە ڤەکێشانێ یا کری ل دووڤ وان رێنمایێن ژ وەزارەتێ دەرکەفتی و ئەڤا مایی حوکمەت دێ ب تمامکرنا وێ رابیت، لێ سەرەرای ھەبوونا قەیرانێ ژی ئەم د بەردەوامین ل سەر خزمەتکرنا وەلاتیان ب دروستکرنا رێک و بانا و ھەموو خزمەتگوزاریان ژ بۆ دەڤەرێ وەک جوتسایدێ دناڤبەرا شێلادزێ و سیریێ و ئاڤاشین و ڤەکرن و تێکەلکرن و زفتکرن و چێکرنا سولێنێن ئاڤرێژیێ بخوەڤە دگریت ل سەر پێشینەیا ھەیڤانە یا باژێرڤانیێ د ھاتنە چێکرن.
ئەندازیاری زێدەتر گۆت: زۆر ئاستەنگ بۆ مە دھێنە پێش، ژ بەر کو بەری باژێرڤانی بھێتە شێلادزێ، ب شێوێ گوند خانی لێ ھاتیە دروستکرن، ژ بەر کو دەما ئەم دەست ب دروستکرن و چێکرنا جادا دکەین زور خانی و شیر و زەڤیێن وەلاتیان دکەڤنە بەر پلانامە دبنە ئاستەنگ و بەربەست ژ بۆ ئەنجامدانا وی کارێ مە ل ھندەک دەڤەرێن دەسنیشانکری کو ئەم نەشێین خزمەتا وێ دەڤەرێ بکەین، ل شێلادزێ چو باخچە نینن بۆ بھێنڤەدان و دەم بۆراندنا وەلاتیان، لێ ئێک باخچە ژ بۆ زارۆیان ھاتبوو چێکرن ب رێیا وەبەرھێنانێ، لێ مە وەکو باژێرڤانی ژبەر ھەبوونا قەیرانێ مە نەشیایە چو باخچا چێکەین کو بکەڤنە د خزمەتا وەلاتیان دا، ھەردەما بودجەک بۆ باژێرڤانیا شێلادزێ ھاتە دابینکرن مە ئەرد ژی یێ ھەی و دێ دەست ب چێکرنا باچەی کەین.
خویاژی کر کو پێشینەیا ھەیڤانە یا باژێرڤانیا ناحیا شێلادزێ 10 ملیون دینارن، ئەو ژی بۆ ب سەخبێرکرنا ئالیاتان و مەزاختنا ریڤەبەریا باژێرڤانیێ و گەھاندنا خزمەتێ بۆ وەلاتیان، باژێرڤانیا شێلادزێ پێدڤی ب بودجەکێ تایبەتە کو بو بھێتە دابینکرن، ژ بەر کو شیلادزێ زۆرا مەزنە، چونکو شێلادزێ ب پێشینا ناھێتە ئاڤاکرن، لەوما ژی ئەم داخواز دکەین بودجەکێ تایبەت بۆ بھێتە دابینکرن، دا کو خزمەتگوزاریان بگەھینینە وەلاتیان و ھەمی دەڤەرێن سەر ب ناحیا شێلادزێ ڤە، شێلادزێ باژێرەکێ زورێ مەزنە جوگرافیا وێ ژی یا بەرفرەھە و خەلکێ وێ ژی ژ یا ھەموو باژێرڤانیێن دی یێن قەزا ئامێدیێ پترە، لەوما ژی پێدڤی بۆ پێشنیەیا وێ ژی ژ یا ھەموو باژێرڤانیێن دی ژی پتربایە و ل وڤ رێژەیا خەلکی و بەرفرەھیا باژێری سەرەدەری دگەل ھاتباکرن ژلایێ حوکمەتا ھەرێما کوردستانێ ڤە، شێلادزێ بەردەوام دھێتە ئاڤەدانکرن و زوو ب زوو بەرفرەە دبیت و پێشکەفتنیێن لەز ب خوەڤە دبینیت و ئەڤ باژێرە پێدڤی ب خزمەتەکا بلەزە ژی.
