باژێرێ دهۆكێ به‌ربژاره بۆ مێڤانداریكرنا فوتسالا ئیراقێ
قەیس وەیس:
لژنه‌یا ئافره‌تان ل فیدراسیۆنا فوتبۆلا ئیراقێ راگه‌هاند ل تیرمه‌ها بهێت دێ هه‌ڤڕكیێن قاره‌مانیا فوتسالێ ل سه‌ر ئاستێ كچان یێن پێشكه‌فتیان هێته كرن و پارێزگه‌ها دهۆكێ به‌ربژارا سه‌ره‌كی یه بۆ مێڤانداریكرنێ.
د داخویانیه‌كێ دا ره‌شا تالب سه‌رۆكا لژنه‌یا ئافره‌تان و ئه‌نداما فیدراسیۆنا فوتبۆلا ئیراقێ دیار كر بۆ وه‌رزێ ئه‌ڤ ساله یێ قاره‌مانییا فوتسالێ ل سه‌ر ئاستێ كچان مه داخواز ژ چه‌ندین یانه‌یێن ل سه‌ر ئاستێ ئیراقێ و كوردستانێ كربوون ژ وانا یانه‌یا ئافره‌تێن دهۆك، زاخۆ كو هه‌كه حه‌زا پشكداریێ د قاره‌مانییا فوتسالێ ل سه‌ر ئاستێ پێشكه‌فتیان دا هه‌بیت دشێن ب نڤێسارێن فه‌رمی بۆ مه فرێكه‌ن و پشتی ب دووماهی هاتنا ژڤانێ ده‌ستنیشانكری چو داخوازی نا هێنه وه‌رگرتن ژبه‌ركو دێ ده‌ست ب دانانا به‌رنامه و پلانان هێته كرن.
هه‌روه‌سان ناڤهاتی گۆت: ژڤانێ قاره‌مانیێ دێ ل مه‌ها ته‌مووزا بهێت ده‌ستپێكه‌ت و پێشبینێ بۆ وێ چه‌ندێ دچت كو دێ ل پارێزگه‌ها دهۆكێ هێته كرن، پشتی مه دگه‌ل به‌رپرسێن وه‌رزشی یێن باژێرێ دهۆكێ گه‌نگه‌شه كریه ئه‌وێن هه‌ڤكارییا خوه دیاركری، پێنه‌ڤێت هه‌كه چو گوهۆڕین د به‌رنامه‌یێ مه دا نه‌هێته كرن ل دووڤ پلانا مه بیت دێ قاره‌مانی ل پارێزگه‌ها دهۆكێ هێته كرن، ئه‌ڤه ژی نه چارا ئێكێ یه دهۆك مێڤانداریێ دكه‌ت و باش دزانین دێ یا سه‌ركه‌فتی بیت له‌وما مه دهۆك هه‌لبژارتییه، لێ هه‌بوونا داخوازییان ژ یانه‌یێن دی یێن ئیراقێ تایبه‌ت ل به‌غدا دوور نینه قاره‌مانی نه هێته دهۆكێ، سه‌رباری حه‌ز دكه‌ین بهێته كوردستانێ و پارێزگه‌ها دهۆكێ.
