باژێڕڤانیا دهۆكێ سەلكێن گلێشی ل سەر قوتابخانەیان بەلاڤ دكەت
سندس سالح سلێڤانەیی:
سەرۆكاتیا باژێرڤانیا دهۆكێ، دەست ب هەوەكا بەلاڤكرنا سەلكێن گلێشی ل سەر هەموو قوتابخانەیێن سنۆرێ پەروەردەیێن رۆژ هەلات و رۆژئاڤا ل سەنتەرێ باژێرێ دهۆكێ كریە و ل هەر قوتابخانەیەكێ ژی سمینارەك ل دۆر هەوا راگرتنا ژینگەهێ و پاقژیێ بۆ قوتابیان دهێتە پێشكێشكرن.
شێروان حەسەن، بەرپرسێ هوبا راگەهاندنێ ل سەرۆكاتیا باژێرڤانیا دهۆكێ بۆ رۆژنامەیا ئەڤرۆ گۆت: ئەڤە چەند رۆژن مە وەك سەرۆكاتیا باژێرڤانیا دهۆكێ دەست ب ڤێ هەوێ كریە و مەرەم ژ ڤێ هەوێ بلند راگرتنا ژینگەها قوتابخانەیان و پاقژیا وانە و هەر قوتابخانەیەكا تیمێن مە دچنێ هندەك سەلكێن گلێشی ب دیاری بۆ دبەن و هەكە دیتن گۆڕەپانا قوتابخانێ یان دەوربەرێن وێ پێدڤی ب پاقژكرنێ هەیە.
زێدەتر گۆت: ب هەڤكاریا كارگێریا قوتابخانێ ئەم ب هەوا پاقژیێ ژی رادبین، هەروەسا كارمەندەكێ باژێرڤانیێ سمینارەكێ ل دۆر پاقژیێ و پاقژ راگرتنا ژینگەها قوتابخانێ پێشكێشی قوتابیان دكەن و رێنما و شیرەتان ل دۆر پاقژ راگرتنا قوتابخانێ ئاراستەی قوتابیان دكەن و وان هایدار دكەت هەكە قوتابخانە یا پیس بیت كا چ زیانێن خۆ هەنە، هەروەسا هەكە بەردەوام بهێتە پاقژكرن دێ چ مفایێن خۆ هەبن و سوپاس بۆ هەموو رێڤەبەر و هاریكار و ماموستایێن هەموو قوتابخانەیان كو ل گەل تیمێن مە گەلەك د هاریكارن و ب هەڤكاریا هەردو لایەنان كار ب باشی و سەركەفتی دهێتە برێڤەبرن.
