باژێڕەكێ پیشەسازی بۆ دروستكرنا ئامیرێن كارەبایی ل هەرێمێ دێ هێتە دامەزراندن
دهۆك، دلۆڤان ئاكرەیی:
سەرۆكێ دەستەیا وەبەرهێنانێ ل كوردستانێ ئاشكرا كر، ئاڤاكرنا باژێڕێ پیشەسازیا ئامیرێن كارەبایی یێن ناڤمالێ، د پاشەرۆژەكا نێزیك دا دێ كەڤیتە د بیاڤێ بجهئینانێ دا و ئامیرێن ل وان كارگەهان دهێنە چێكرن، دێ ب هەمان براند و كوالیتیا كۆمپانیێن ب ناڤودەنگ یێن جیهانێ بن.
د. مەحەمەد شوكری، سەرۆكێ دەستەیا گشتی یا وەبەرهێنانێ ل كوردستانێ بۆ رۆژنامەیا ئەڤرۆ گۆت: «ل سەر بڕیارا سەرۆك وەزیرێن هەرێما كوردستانێ، ب مەرەما پشتەڤانیكرنێ ل كەرتێ تایبەت و پەیداكرنا دەلیڤەیێن كاری و بەرهەمئینانا بەرهەمێ ناڤخۆیی، دەستەیا وەبەرهێنانێ مۆلەتا ئاڤاكرنا باژێڕەكێ پیشەسازیا ئامیرێن كارەبایی یێن ناڤمالێ پەسەند كریە، كو ل سەر ڕووبەرێ دو هزار دۆنەمێن ئەردی و ب خەملاندییێ 288 ملیۆن و 469 هزار دۆلاران و د ماوێ دو سالان دا دێ هێتە بجهئینان».
باژێڕێ پیشەسازیا ئامیرێن كارەبایی یێن ناڤمالێ ب هەڤپشكیا كەرتێ تایبەتێ ناڤخۆیی و هەردو وەلاتێن كۆریا باشوور و توركیا دێ هێتە بجهئینان، نێزیكی 50 كارگەه د ناڤ دانە و شیانێن بەرهەمئینانا زێدەتر ژ 30 بەرهەمێن كارەبایی د چەند دەمژمێرەكان دا هەنە، ب ڤێ چەندێ دشێت سالانە، ب سەدان ئامیرێن كارەبایی ب براند و كوالیتیا بلند بێخیتە د ناڤ بازارێن هەرێما كوردستانێ دا».
