بایدن: رۆسیا پیلانێن خوه بۆ داگیركرنا ئوكرانیا ته‌مام كرینه
ب، سه‌رجان مه‌حمود:
جۆ بایدن سه‌رۆكێ ئه‌مریكا ل كۆچكا سپی بۆ رۆژنامه‌ڤانان دیار كر كو سه‌رۆكێ رۆسیا بریارا داگیركرنا ئوكرانیا دایه و دێ حه‌فتیا بهێت ده‌ست ب داگیركرنا ئوكرانیا كه‌ت و گۆت: (ل دووڤ زانیاریێن ل به‌ر ده‌ستێ مه رۆسیا پیلانێن خوه بۆ داگیركرنا ئوكرانیا ته‌مام كرینه و د حه‌فتیا بهێت دا دێ ده‌ست ب داگیركرنێ كه‌ت و پیلانا یه‌كه‌م یا مۆسكۆ ئێرشكرنا سه‌ر باژێرێ كیێڤ یێ پایته‌ختێ ئوكرانیا یه و دخوازیت ب ئێرشێن دژوار كیێڤی بێ باندۆر بكه‌ت و دڤێت هه‌ر زوو رۆژهه‌لاتێ ئوكرانیا داگیر بكه‌ت).
سه‌رۆكێ ئه‌مریكا هه‌روه‌سا راگه‌هاند ژی كو رۆسیا د هه‌ر واری دا ده‌ستكاریان ل ئوكرانیا دكه‌ت و هه‌ول دده‌ت هێزێن ئوكرانیا به‌رێ خوه بده‌نه هه‌رێما دۆمباسێ و گۆت: (رۆسیا هه‌رێما دۆمباسێ ب رێیا میلیشاتێن ل وێ هه‌رێمێ كریه ژێر كۆنترۆلا خوه و ب ده‌ستێ میلیشاتان ده‌ست ب پیلانێن خوه ل ئوكرانیا دكه‌ت و دخوازیت له‌شكرێ ئوكرانیا راكێشیته مه‌یدانا شه‌ری و پاشی بۆ رایا گشتی ژی ئوكرانیا وه‌ك تۆمه‌تبار بده‌ته خوه‌یا كرن و ب ڤی ره‌نگی ژی كار بۆ داگیركرنا ئوكرانیا دكه‌ت، ئانكۆ رۆسیا ب هه‌موو ره‌نگه‌كێ كار دكه‌ت دا د ئاستێ جیهانی دا ژی كه‌س دژبه‌ریا وێ نه‌كه‌ت).
د دووماهیا ئاخڤتنا خوه دا ژی سه‌رۆكێ ئه‌مریكا راگه‌هاند كو د ره‌وشا نها دا 150 هزار سه‌ربازێن رۆسیا ل سنۆرێ بیلارۆسیا و ئوكرانیا و ل ده‌ریا ره‌ش بجه بووینه و رۆژ ب رۆژێ رۆسیا هژمارا سه‌ربازێن خوه زێده‌تر دكه‌ت و گۆت: (ئه‌ڤ هه‌موو ئاماده‌كاریێن رۆسیا ب تنێ ڤێ یه‌كێ دده‌ته نیشا دده‌ت كو پیلانا داگیركرنا ئوكرانیا ته‌مام بوویه و نه دووره حه‌فتیا بهێت شه‌ر و داگیركرن ده‌ستپێ بكه‌ت، بێگومان ئه‌و یه‌ك دێ مه‌ترسیێ ل سه‌ر ژیانا پتر ژ سێ ملیۆن وه‌لاتیێن سڤیل ل ئوكرانیا دروست كه‌ت و دێ بیته ئه‌گه‌رێ روودانا كاره‌ساتێن گه‌له‌ك مه‌زن، مه به‌ری نها ژی هۆشداری دایه رۆسیا و جاره‌كا دی دۆپات دكه‌ین كو هه‌ر شه‌ره‌ك روو بده‌ت دێ زیانا خوه بۆ رۆسیا ژی هه‌بیت).
