بایدن و پوتین دێ سه‌باره‌ت ب ئوكرانیا كۆمبن
ئه‌ڤرۆ:
كۆچكا سپی یا ئه‌مریكا راگه‌هاند سوباهی رۆژا سێشه‌مبیێ سه‌رۆكێ ئه‌مریكا و سه‌رۆكێ رۆسیا دێ ب رێیا ڤیدیو كۆنفرانسه‌كێ سه‌باره‌ت ب ئالۆزیێن د ناڤبه‌را رۆسیا و ئوكرانیا دا ئاخڤن و سه‌رۆكێ ئه‌مریكا دێ ب ره‌نگه‌كێ ئاشكرا داخواز ژ رۆسیا كه‌ت كو ده‌ست ب چو بزاڤێن مه‌ترسیدار ل سه‌ر سنۆرێ ئوكرانیا نه‌كه‌ت، چونكو هه‌كه رۆسیا بڤێت ئوكرانیا داگیر بكه‌ت ئه‌و یه‌ك دێ رێ بۆ شه‌ره‌كێ نوو ڤه‌كه‌ت و ئه‌مریكا ل هه‌مبه‌ر بزاڤه‌كا وه‌سا بێده‌نگ نابیت و دڤێت رۆسیا خوه ژ كاره‌كێ وه‌سا دوور بكه‌ت، هه‌روه‌سا سه‌رۆكێ ئه‌مریكا دێ داخواز ژ پوتینی كه‌ت كو پرسێن هه‌ی ل گه‌ل ئوكرانیا ب رێیێن دانوستاندنان چاره‌سه‌ر بكه‌ن.
ل ئالیێ دی سیرگێی لاڤرۆڤ وه‌زیرێ ده‌رڤه یێ رۆسیا ژی راگه‌هاند كو ده‌مه‌كه ئه‌مریكا و وه‌لاتێن ناتۆ به‌حسێ هندێ دكه‌ن كو رۆسیا دڤێت ئوكرانیا داگیر بكه‌ت، مه به‌ری نها ژی دیار كریه كو چ تشتێن وه‌سا نینن، لێ ئه‌مریكا و وه‌لاتێن ناتۆ دخوازن بابه‌تێ ئوكرانیا ل دژی رۆسیا بكار بینن و وان دڤێت بنگه‌هێن سه‌ربازی ل نێزیكی سنۆرێ رۆسیا دروست بكه‌ن، ئه‌و یه‌ك ژی ب چو ره‌نگه‌كێ ناهێته قه‌بوولكرن و گۆت: (مه گه‌له‌ك جاران داخواز ژ ئوكرانیا كریه كو پرسێن هه‌ی چاره‌سه‌ر بكه‌ت و رێ نه‌ده‌ت ناتۆ و ئه‌مریكا ده‌ستێوه‌ردانێ بكه‌ن، چونكو ده‌مه‌كه ئه‌مریكا و وه‌لاتێن دی یێن ئه‌ندامێن ناتۆ دخوازن بابه‌تێ ئوكرانیا وه‌كا كارته‌كێ ل دژی وه‌لاتێ مه بكار بینن، وان دڤێت بنگه‌هێن سه‌ربازی ل نێزیكی سنۆرێ مه دروست بكه‌ن و وان دڤێت چه‌كێن مودێرن ل نێزیكی سنۆرێ رۆسیا بجه بكه‌ن، ئه‌و یه‌ك ژی ب چو ره‌نگه‌كێ ناهێته قه‌بوولكرن و دڤێت ئوكرانیا رێ نه‌ده‌ت ئه‌مریكا ده‌ست ب كاره‌كێ وه‌سا ب مه‌ترسی بكه‌ت، هه‌كه ئوكرانیا ل سه‌ر سیاسه‌تا خوه یا نها به‌رده‌وام بیت هه‌ر ئالۆزیه‌ك روو بده‌ت ئه‌م وه‌كو رۆسیا ژێ به‌رپرس نینین).
