بایرن میۆنخ و مانچستەر یۆنایتد د كۆپیتكا یاریێن ئەڤرۆ یێن چامپیۆنز لیگایێ دا
دهێتە چاڤەڕێ كرن ئەڤرۆ ژی هەشت یاریێن دی ژ چارچووڤێ دەستپێكرنا وەرزێ نوو 2023-2024 یا هەڤڕكیێن قارەمانییا یانەیێن ئۆرۆپا قارەمانێن خولا چامپیۆنز لیگا ژ یاریێن ئێكێ و چوونێ یا قۆناغا كۆما ل چەند یاریگەهێن یانەیێن كێشوەرێ ئۆرۆپا بهێنە كرن.
كۆما ئێكێ
ئێك ژ یاریێن ب هێز و دهێتە هژمارتن كۆپێتكا یاریێن ئەڤرۆ دا دێ دناڤبەرا هەردو یانەیێن بایرن میۆنخ یا ئەلمانی و مانچستەر یۆنایتد یا ئنگلتەرایێ كو پێشبینی دهێتە كرن یارییەكا ب ئاست و تەكتیك بیت و دهێتە هژمارتن ژ یاریێن كلاسیكی ژی ژبەر ئەو یارییا دووماهیێ یا بەرنیاس ل 1999ێ د یاریگەها كامب نو ل بەرشەلۆنا، ئەوا یانەیا ئنگلتەرایێ شیایی ناسناڤێ چامپینزێ بۆ جارا دویێ د دیرۆكا خوە دا بینن د دەمەكی دا یانەیا بایرن میونخ هەتا خولەكا 90 یا سەركەفتی بوو، لێ د خولەكێن 91 و 93ێ یانەیا مان یۆنایتدێ شیا دو گۆلان بینت و ناسناڤی ژی بدەستڤە بینت، هەرچەندە یانەیا ئەلمانی شیا تۆلێن خوە ڤەكەت لێ د یارییا دووماهیێ دان، د چامپیۆنزێ دا 11 جاران بەرانبەر ئێك بووینە، چار سەركەفتن بۆ مان یۆنایتدێ، دو بۆ بایرن میۆنخ و پێنچ یارییا وەكهەڤبووینە، پشتگەرمییا یانەیا ئنگلتەرایێ دێ ل سەر ماركۆس راشفۆرد، كرێستیان ئیركسن، برۆنۆ فێرنادێز، ئارۆن بیرا و كاسمێرۆ، ژلایێ خوەڤە راهێنەرێ بایرن میۆنخ تۆخێل دێ پشتگەرمییا ستێرێن خوە هاری كین، لیرۆی سانی، ماتیاس تێل، جەمال،مۆسیلا ئالفۆنسۆ داڤیز، لیۆن جۆریتزكا و تۆماس مۆلەری، د بەرانبەر دا ئەو یاریزانێن هنگافتی دێ كارتیكرنا خوە هەبیت یێن مان یۆنایتدێ رافائێل ڤاران، لۆك شاۆ، ماسۆن ماۆنت، یێن بایرنێ هەر ئێك ژ كینجسلی كۆمان، رافائێل جیریرۆ، تارق بۆتچمان و گۆلپارێز مانوێل نویێری، بۆ زانین ئەڤ یارییە دێ ل دەمژمێر 10شەڤ ل یاریگەها ئالیانز ئارینا ل ئەلمانیا هێتە كرن، د یارییا دویێ یا ڤێ كۆمێ دا یانەیا گالاتا سارایی یا توركی دێ ل یاریگەها خوە مەركەب عەلی مێڤاندارییا كۆبنهاگن یا هۆلەندی كەت، دو جاران د قۆناغا كۆمان یا چامپیونزێ بەرانبەری ئێك بووینە و هەر ئێك سەركەفتنەك ئینایە، یارییا وان دێ ل دەمژمێر 7:45 شەڤ هێتە كرن.
كۆما دویێ
ل دەمژمێر 10 شەڤ یاریگەها ئیمارات ل پایتەختێ ئنگلتەرایێ لەندەن دێ مێڤاندارییا خودانێن ئەردی ئارسنال و یانەیا ئایندهۆڤن یا هۆلەندی كەت، هەرچەندە دیدارێن هەردو یانەیان بتنێ د قۆناغا كۆمان دا بوون و هەشت جاران بەرانبەر ئێك بووینە سێ بۆ ئارسنال دو بۆ ئایندهۆڤن و سێ وەكهەڤی بووینە لێ بۆ ڤێ یاریێ راهێنەرێ یانەیا ئنگلتەرایێ میكێل ئارتیتا ئەڤان ئەنجامان هەلسەنگاندنێ بوو ناكەت و دیاركر ئەوی هزرا قۆناغێن دووماهیێ یا كری، بەرانبەر دا تیما هۆلەندی ئەوا چار سەركەفتن ل دووڤ ئێك د خولا وەلاتێ خوە دائینایی ب تۆماركرنا 13 گۆلان بتنێ گۆلەك ل سەر بوویە تیمەكا ب سانەهی نابیت بەرانبەر ئارسنالێ، د هەمان كۆم دا یانەیا لانس یا فرەنسی دێ بیتە مێڤانا یانەیا سیڤییا یا ئسپانی ل دەمژمێر 10 شەڤ ل سەر ئەردێ یاریگەها رامۆن سانچێز، ئەڤ یارییە دبیتە دیدارا ئێكێ یا هەردو یانەیان.
كۆما سێیێ
یاریگەها سانتیاگۆ بێرنابیۆ ل مەدرێدێ دێ بیتە پێنگاڤا ئێكێ یا یانەیا ریال مەدرید ئێك ژ بەربژارێن سەرەكی یێن ناسناڤێ ئەڤ سالە دەمێ ل دەمژمێر 7:45 شەڤ مێڤاندارییا مێڤانا خوە یۆنیۆن بەرلین یا ئەلمانی، وەكو دیار یانەیا ریال ئەوا هەر سال پشكدارییا وێ بۆ ناسناڤی یە و شیاییە هەتا نوكە مەزنترین رێژەییا ناسناڤێن چامپیۆنزێ دەستڤەبینت ئەوا 14 جاران، جەماوەرێ یانەیا ئسپانی ل سەر ئاستێ جیهانێ گەشبینن د وەرزێ ئەڤ سالە دا یانەیا وان بگەهیتە ناسناڤێ 15 تایبەت پشتی هاتنا ستێرێ ئنگلتەرایێ جۆد بیلینگهام ئەوێ د پێنچ یاریێن خولێ دا شیایی پێنچ گۆلان تۆماربكەت لێ دووركەفتنا ڤێنێسیۆس ژبەر هنگاڤتنێ دێ بەردەوامبیت، ژلایێ خوەڤە یۆنیۆن یا ئەلمانی ئەنجامێن د خولێ دا ژ چار یارییان شەش خال هەنە و رێزا هەشتێ دهێت، لێ د چامپیۆنزێ دا پێشبینییا هەر ئەنجامەكی دهێتە كرن، دیرۆكا دیدارێن هەردو یانەیان ئەڤە بۆ جارا ئێكێ یە، یارییا دویێ یا ڤێ كۆمێ دێ دناڤبەرا خودانێن ئەردی سپۆرتینگ براگا یا پۆرتۆگالی و مێڤانا وێ ناپۆلی یا ئیتالی، خودانێن ئەردی پشتی بۆرینا 10 سالان دوبارە ڤەگەڕیا چامپیۆنزێ، هەرچەندە ئەڤە دبیتە یارییا ئێكێ یا چامپیۆنزێ لێ یانەیا ناپۆلی ب هیڤییە دەستپێكەكا سەركەفتی ب سەركێشییا گۆلكەرێ خوە یێ نێجیر ئۆسیمین ژ دەرڤەیی یاریگەها خوە بینت.
كۆما چارێ
د یارییا ئێكێ یا ڤێ كۆمێ دا یانەیا ئەنتەر میلان یا ئیتالی دێ بزاڤێ كەت سەركەفتنێ ل سەر خودانێن ئەردی یانەیا ریال سوسیداد یا ئسپانی كەت و دەستكەفتێ وەرزێ بۆری ڤەگەڕینت دەمێ گەهشتییە یارییا دووماهیێ و دگەل مان ستی خوسارەت بوو، لێ بەرانبەر دا خودانێن ئەردی و جەماوەری ناهێلین چو خالان ژ دەست بدەن، ژلایەكی دووڤە بەنفیكا یا پۆرتۆگالی ب ژڤانە د یارییا ئەڤ شەڤە دا دناڤ ئەرد و جەماوەرێ خوە مێڤاندارییا یانەیا رێدبۆل سالزبۆرگ یا نەمسایێ كەت، هەردو یاریێن ڤێ كۆمێ دێ ل دەمژمێر 10 شەڤ هێنە كرن.