بایەک ژ کۆلانێن ئەشقێ
گرین نازی عبدولباقی
ئەڤرۆکە بایێ ئەشقێ
چانتکێ خوە یێ تژی مژ و تۆز کری
ب هەمی وێرەکیا خوەڤە
دەستێن سێویبوونێ یێ ماچ کری
مینا دەروێشەکێ ژ ڕێڤینگیا..!
وارێ غەریبنەزەرا یێ زڤری
ژ چپکەکێ بۆ بارانەکێ
و ژ بارانەکێ بۆ تۆفانەکێ
لێ:
ژوێڤە دەنگێ کزگریۆکا خەمەکێ هات..!
ب هەمی بێدەنگیا خوەڤە
دکەتە قێری و هەوار
هۆ رێڤینگۆ..
تو هاتیە چ..؟!
ئێدی تو ب خوە ژی
د چاڤێن خوەدا یێ هاڤییی
ئێدی د کۆلانێن ئاشقێن بێخوەدی دا ژی
مینا دیوارەکێ کەڤناری
هێژ شوینتبلێن زاڕۆیان
لسەر تە نەهاتینە ئاڤاندن
هێژ پەنجەرەیێن ئەڤی تاخی..!
ژ دیمەنێن هەرفتی بێزارنەبووینە
تو هاتیە چ؟!
هێژ هندەک داڤێن ڕەش
ستێرکا خوە ل سپیبوونێ نەگرتییە
ئەڤ حبرێ لسەر نامەیێن ئاشقان ژی
یێ دگەل پەیڤا دگڕنژیت،
دکەنیت، هێش نە گرییە!
لسەر ڕوویێن وی خوناڤەکە، هشک نەبوویە
تو هاتیە چ؟!
هێژ کاڤلدانکێن دلێ مە،
خوە دشکەفتێن پەیکەری دا نە تەڤاندینە
هەتا دارتاشێن ئەڤی تاخی ژی،
دارێن خوە..
ب هەستیکێن لەشێ مە ڤە نە خەملاندینە
تو هاتیە چ..؟!
هێژ کلێ چاڤێن ئاشقێن بێی وەغەر ژی
نەبوویە خوین، و
لسەر دیوارێن چاڤەرێبوونێ نە نەخشاندینە
تو هاتیە چ..؟!
هێژ برینێن زاڕۆکینیا ڤی تاخی
ب کەنییا ئێتیمەکێ سارێژ نەبووینە
ئەم د ساڤا بوونا خوەدا پیربووین
و هێژ کەس ژ مە ..
چ قولاچێن گەنجاتیێ ناسنەکرینە
تو هاتیە چ..؟!
ئەڤ تاخێ تو لێ دنێڕی..!
تەمەت گۆڕستانەکێ
تەرمێن هەستان لێ ڤەشارتینە
چەند تو ل دەرگەهێن وان ژی بدەی
نە هند وێرەکی مایە
تویەکێ بیانی د مالێن خوەدا بنڤینن
نە ژی هند هێز مایە خوە ژ بۆ تە
بدەن کوشتن و وان برینان دوبارە
د هەمبێزا تەدا ب ئازرینن..!
چەند ژ مرۆڤان ڕووڕەشتری
چەند ژ مرۆڤان بەدبەختتری
چەند ژ مرۆڤان بێکەستری
تو هاتیە چ..؟!
