ببە خـودانـێ خـەونـەكـێ
داڤین زاویتەی
هەر ئێك ژ مە، ژ دەمەكی بۆ دەمەكێ دی خەونەك دهێتە سەر هزرا وی، هندەك ژ مە خەونا ب خانیەكێ بەرفرەهڤە دبینن، هندەك ترومبێلەكا نوو، دیسا هندەك ژ مە حەز دكەن باوەرنامەكا زانستی یان كۆمپانیەكا سەركەڤتی دابمەزرینن ئەڤە هەموو خەونن. ژ خەونان جوانتر نینە! دەمێ ئەم دكەینە هێز و وزەیا ژیانا خو و پالدەرەك بەرەڤ پێشكەڤتن، سەركێشی و پێشەنگیێڤە. دا كو خەونێن مە ببنە راستی، هندەك پێنگاڤێن پراكتیكیێن هەین، دڤێت بەرچاڤ وەربگرین، دێ بیرا خو ل شیرەتەكێ ئینین، كو زانایێن دەروونی شیرەتان پێ ل مە دكەن!. ئەو شیرەتان ل مە دكەن هەر ئێك ژ مە خەونا خوە بدانیتە بەر سینگێ خۆ، وێنەیێ خانی، ترومبێلێ یان پرۆژەیێ چاڤەرێكری دابنینە بەرچاڤێن خۆ. ل سەر دیوارێن ژۆرێن خۆ بهەلاویسین، دابنینە سەر شاشێن كۆمپیوتەرێن خۆ یان دابنینە سەر وان خۆدیكان یێن ئەم هەر رۆژ سپێدێ تێدا بەرێ خۆ ددەینە خۆ. زانایێن دەروونی دوپاتیێ ل سەر گرنگیا نڤیسینا خەونێ و بەردەوام بینینە بەر چاڤێن خۆ دكەن!. ئەڤێ چەندێ ژی بو هندێ ڤەدگەرینن، كو مێشكێ ڤەشارتی سەرەدەریێ ل گەل وێنێن ب راستی یان ئاشۆپی ب شێوەكێ رۆهنتر دكەت، دەمێ مرۆڤ ئارمانجا خۆ وێنە دكەت یان دنڤیسیت و بەردەوام بەرێ خۆ ددەتێ، مێشكێ ڤەشارتی هانددەت كو بەردەوام مێشكێ مرۆڤی چالاك بكەت و ڤێ ئارمانجێ بینیتە بیرا وی، چونكی دبیت د قەرەبالغیا روودانێن رۆژانە دا، ئەم ژ خەونا خۆ دوور بكەڤین، د گێژەلۆكا ژیانێ دا ئەم ئارمانجێن خوە بۆ دەمەكئ ژبیربكەین، لێ هەكە مە ئارمانجێن خوە ب شێوەكێ نڤیسی یان وێنەكری دانانە بەر سینگێ خوە، وی دەمی دێ د بەرهەڤ بین بۆ بیرئینانا مێشكی ب كار و ئەركێن وی یێن سەرەكی و هەلكرنا ئاگرێ گەرم و گۆریێ هەكە ڤەمری. هەمی كارێن مەزن، د رۆژێن خۆ دا، د مێشكێ خۆدانێن وان دا ب تنێ خەون بوون. ئەدیسۆنی گلۆپ ڤەدیت. هەردو برا رایتێ فرۆكە ڤەدیت و هنری فوردی ترومبێل ڤەدیت. بەری هەر ئێك ژ وان دەست ب پێنگاڤەكێ ژی بكەت!. چ تشتەكی ژی ئەو پالنەدان و نەلڤاندن، ژبلی وێ خەونا رازانا وان نەخوش كری و تۆفانا هیڤیێن دژوار ناخێ وان ئازراندی. ژبەر هندێ خەونا خۆ وێنە بكە و رەنگ بكە و پیڤەرەكێ مەزن بۆ دیوارێ ژۆرا خۆ ژێ دروست بكە، و دانەیەكا بچووك ژێ بۆ نڤیسینگەها خۆ، ل سەر خۆدیكێ بنڤیسە، دا كو سپێدەهیان ببینی و دیسا ل سەر جهێن خۆ ژی بنڤیسە دا كو بەری بنڤی سلاڤێن شەڤێ ل تە بكەت. بەلێ پشتراستبە خەون گرێدای هێز و شیانێن خۆدانێن خۆنە.
