بتنێ مرن دشێت من ژكارێ راگەهاندنێ دوور بكەت
شاهۆ فەرید:
زەهرا بەرواری، پەیامنێرا شێخان پرێس، د دیدارەكێ دا بۆ رۆژنامەیا ئەڤرۆ گۆت: ئەڤە سێ سالن وەك خوەبەخش دناڤ راگەهاندنێ دا كاردكەم و گەلەك رێگری ل من هاتینەكرن، بەلێ بەرامبەر هەموو ئاستەنگان راوەستیایمە، چونكو ئەڤە حەزا منا زارۆكینێ بوویە و پشتەڤانا منا هەرە سەرەكی دایكا منە، بۆ من ب رۆلێ بابێ ژی رابوویە پشتی وەغەركرنا بابێ من، هەتا رادەیەكی جڤاك یێ هاریكارە بۆ كچێ و هەرتشتەكێ گرێدای راگەهاندنێ من حەزا بۆ هەی، لەورا كارێ پێشكێشكاریێ و یێ مەیدانی دكەم و پتریا جاران د ناڤ خەلكی دا مە و بەرنامەیێن هەمەرەنگ، كاركرن ل سەرخوە باشە دا تووشی شاشیان نەبی و پتریا خەلكی چاڤ ل سۆشیالێ نە و بتنێ مرن تێ نەبیت بشێت من ژ كارێ راگەهاندنێ دوور بكەت.
هەروەسا گۆت: من پێشكێشی گەلەك كەنالان كریە بەلێ چ بەرسڤ نەبووینە و بتنێ لقێ (20) یێ پارتی ل شێخان یێ هاریكارە ل گەل من، مە ژگەلەك تەلەفزیۆنا داخوازا كاركرنێ بۆ دەڤەرا شێخان و داخوازیامە رەدكرینە، مە ئەڤ گازندە هەیە و شێخان ژی مەزن بوویە و پێدڤیە هەموو دەزگەهان پەیامنێرێن خوە هەبن و خەلكێ شێخان ب خوە بن د خزمەتا قەزایا خوە بكەن.
