بجهاتنا خه‌ونا مه‌زن. . قه‌یران نامینن
به‌هایێ هه‌ر دینه‌كا ژیرانه دكه‌ڤیته كه‌توارێ بجهئینانا چارچوَڤێ به‌رژه‌وه‌ندیا گشتی یا ملله‌تی دا، بلا قوَربانی دانا وێ چه‌ندا مه‌زنبیت و چه‌ندا بهابیت، هنده‌ك ده‌ما دگه‌هیته قوَربانیدانا گیانی كو پیروَزترین و بهاترین تشته لنك مروَڤی لێ پاراستن و بدستڤه‌ئینانا ئارمانجه‌كا مه‌زنتر ژ وێ رێكێ دده‌ته مه، مروَڤی خوه قوَربانی به‌رژوه‌ندیا گشتی دكه‌ت.
دبیت كه‌له‌گ كه‌س هزر د ڤێ ئاخفتنێ دا بكه‌ن و بێژن، ماموَ “ئاڤێ به‌ر ئاش برن تو یێ به‌حسێ كه‌نگرپه‌ران دكه‌ی”، به‌لێ راسته و مه ئاگه‌ه ژێ هه‌یه، قه‌ده‌را مه ملله‌تێ كورد ئه‌م كه‌فتینه د ناڤبه‌را دوو به‌رئاشان دا هه‌ر ب درێژاهیا دیروَكێ و هه‌تا نها یێ مه دهێرن بوَ روَژێن ره‌ش و مه دكه‌نه نانێ ل سه‌ر سێلان ده‌مێ برسی دبن! ئه‌م دبینه سفرا میرا بتنێ یا بوَ مه ژێ دمینت روَندك و ڤه‌خوارنا ئاڤێن سویره، د ناڤ ته‌حلاتیا ژیانه‌كا ب ڤی ره‌نگی دا مروَڤ د ناڤ ئاڤێن شیلی دا و به‌ر ب خه‌ندڤینی ڤه دچیت، هه‌ر ده‌لیڤه‌كا وی ژ ڤێ ته‌نگاڤیێ قوَرتال بكه‌ت، دێ ده‌ستێ خووه بوَ درێژكه‌ت و بده‌ڤ و ددانان خوه پێڤه‌گریت. چه‌ندێن سالن ملله‌تێ كورد خه‌ونان ب وه‌لاته‌كێ ئازاد ڤه دبینیت و ب هه‌زاران قوَربانی و خوه گوڕیكرن پێشكێشی ئاخا وه‌لاتی كرینه، بێی جاره‌كێ ژی هزرا خوه تێدا بكه‌ت كا دێ قازانجێ وی به‌رانبه‌ری وێ خوه گوَریكرنێ ج بیت، لێ جهێ داخیه د هه‌موو شوَڕه‌شان دا، هنده‌ك مروَڤێن دینه‌مێر دبنه قوَربان و مروَڤێن داڤدوَز دبنه بازرگانێن شوَڕه‌شێ و مروَڤێن لێبوَك ژی بتنێ ده‌ستان دقوَتن ودبنه خودان پوَستێن مه‌زن.
د ناڤبه‌را ڤێ سیناهیا روَژێ دا بتنێ ئازادی و سه‌رفرازی و سه‌روه‌ریا وه‌لاتی هه‌موو پیروَزی و باهیێن دیتر ژبیرا مروَڤی دبه‌ت و د ناڤ هه‌ناسه‌یا سینگێ وه‌لاته‌كێ ئازاد دا كو خوَدان بڕیار و خوَدان سنوور و خوَدان ئالا و خوَدان كه‌سایه‌تی یا خوه بیت، وی ده‌می مروَڤی بهایێ خوه هه‌یه و دشێت هه‌موو ماف و ئێش و ئازار و گلی و گازندێن خوه ب هه‌ر رێیه‌كا هه‌بیت ده‌ر بكه‌ت و ده‌ردێن خوه ده‌رمان بكه‌ت، له‌ورا تشته‌كێ مه‌حاله مروَڤ د روَناهیا روَژێ نه‌گه‌هیت و قه‌ستا تاریێ بكه‌ت.
به‌لێ راسته په‌لاتینك ده‌مێ قه‌ستا روَناهیێ دكه‌ت دزانیت دێ هێته سوَتن و دێ ژیانا خوه ژ ده‌ستده‌تن، به‌لێ هه‌ر به‌رده‌وام قه‌ستا روَناهیێ دكه‌ت و تاریێ ب جه دهێلیت، له‌ورا یا پێدڤی ل سه‌ر مللێن مه هه‌موویان ئه‌م خوه ل ملله‌تێ خوه بكه‌ینه خودان و بهیچ ره‌نگه‌كی هه‌لم و بێهنا تاریێ و چه‌كچه‌كیلێن شه‌ڤێ نه‌هل كێشین، سه‌راری وێ قه‌ریران و ته‌نگاڤیا ئه‌م هه‌موو تێدا دژین و به‌رگیریێ و به‌رڤانیێ ژێ دكه‌ین بلا باوه‌ریا مه ب ملله‌تێ مه و وه‌لاتێ مه یا مكۆم بیت و چ جاره‌كێ رێ بوَ دوژمن و نه‌حزێن ملله‌تێ كورد نه‌هێته دان و قه‌یران وته‌نگاڤیان بوَ خوه ب ده‌لیڤه بزانن و دژی به‌رژوه‌ندیێن گشتیێن ملله‌تێن مه بكاربینن.
بلا ئارمانجا مه‌زنا ملله‌تی هه‌رده‌م ل به‌ر چاڤێن مه‌بیت، خوه گوَریكرنا ملله‌تی ل سه‌ر رێكا گه‌هشتنا ڤێ رۆژێ ژبیر نه‌كه‌ین و شانازیێ ب رێباز و خه‌باتا وان بكه‌ین، ده‌مێ ئارمانجه‌كا مه‌زن ته هه‌بیت قه‌یران خوه ل به‌ر سینگێ ته ناگرن و دێ به‌رب نه‌مانێ ڤه چن و بلا ئه‌م ژی ئه‌ڤرۆ وه‌كو شۆڕه‌شڤانێن خوه ل به‌ر هه‌وێن داگیركه‌ر و ئه‌نفالێن ره‌ش گرتین و ب سه‌ركه‌ڤتین، خوه ل به‌ر ڤێ قه‌یرانێ بگرین و بارێ حوكمه‌تا خوه زێده‌ی هێزا وێ لێ نه‌كه‌ین.
