برازایێ هونه‌رمه‌ند (عه‌بدلواحد زاخۆیی) به‌حسێ وان سترانبێژان دكه‌ت یێن نانێ خوه ب ئافكا مامێ وی دخون
ئه‌ڤرۆ، هه‌رهین محه‌مه‌د:
سترانبێژێ گه‌نج نه‌شوان عومران د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: نوكه ئه‌ز مژوولی چێكرنا كلیپه‌كێ مه، به‌لێ من نه‌ڤێت ناڤێ وی َدیاركه‌م و حه‌ز دكه‌م ببیته سوپرایز و ژڤانه ل جه‌ژنا قوربانی به‌لاڤ كه‌م.
ناڤهاتی گۆت: به‌رده‌وام دچمه ده‌واتان و سترانێن مامێ خوه یێ هونه‌رمه‌ند (عه‌بدلواحد زاخۆیی) ژی دبێژم و گه‌له‌ك جاران ب ستایلی وی سترانان دبێژم و هه‌موو سترانبێژان ژی ماف هه‌یه سترانێن مامێ من بێژن، به‌لێ وه‌كو وی بێژیت و ده‌ستكاریێ تێدانه‌كه‌ت و مافێ وێ بده‌تێ و دشێن ل ده‌واتان بێژن، به‌لێ حه‌زناكه‌م ل به‌رنامێن ته‌له‌ڤزیونی بێژن و گه‌له‌ك كه‌سان سترانێن مامێ من گۆتینه پشتی مامێ من هاتیه تیرۆركرن و زارڤه‌كرنا ده‌نگێ مامێ من دكه‌ن و ب خێرا مامێ من ژیانا وان خوه‌ش بوویه و نانێ خوه ب ئافكا وی دخون و بۆ مه ئافك نه‌هێلایه و نوكه ئه‌ز نانێ خوه ب ترسی دخۆم و حه‌زناكه‌م ئه‌و سترانێن مامێ من بێژن، چونكو ده‌نگێ وان نه نێزیكی یێ عه‌بدلواحدی یه وان بتنێ به‌رژه‌وه‌ندیا خوه دڤێت و یا دیاره ژی كا من به‌حسێ كێ یه و نوكه بخێرا مامێ من دبه‌رنیاسن.
نه‌شوانی گۆت: عه‌بدلواحدی گه‌له‌ك زه‌حمه‌ت بر هه‌تا كو گه‌هشتیه وی ئاستی و هه‌تا نوكه نابینم تشته‌ك بۆ مامێ من هاتیه‌كرن و بتنێ یا مه ئه‌وه پاركه‌ك یان جاده‌ك بناڤێ وی بهێته چێكرن و هه‌ر دیسان داخوازا من بۆ كه‌نال و رادیویێن مه ئه‌وه هونه‌رێ عه‌بدلواحدی نه‌هێته ژبیركرن و به‌رده‌وام په‌خش بكه‌ن.
