بریتانیا جارەکا دی سەبارەت حوسییان هۆشداریێ ددەتە ئیرانێ
وەزیرێ دەرڤە یێ بریتانیا راگەهاند، جارەکا دی حوسیێن یەمەنێ ب چەکێ ئیرانێ ئێرشی گەمیەکا بازرگانی یا وان کرینە و زیانێن مەزن ژی گەهشتینە گەمیێ، دڤێت ئیران رێ نەدەت حوسیێن یەمەنێ ئێدی ئێرشی گەمیان بکەن، هەکە ئیران یا پێدڤی نەکەت ئەو دێ ل گەل ئەمریکا و وەلاتێن دی دەست ب ئیرشێن نوو و دژوار ل دژی حوسییان کەن و دێ هەموو بنگەهێن حوسییان ل یەمەنێ ژناڤ بەن.
دێیڤید کامیرۆن ئەو یەک ژی دیار کر، بەری نها وەکو بریتانیا وان داخواز ژ ئیرانێ کرینە ئێدی چەکی نەدەتە حوسییان، چونکی بەرپرسێن ئیرانێ ژی باش دزانن ب چەکێ وان ئێرشی گەمیێن بازرگانی ل دەریا سۆر دهێتە کرن و دڤێت ئیران ئێرشێن حوسییان بدەتە راگرتن، هەکە نە ئەو ئیرانێ ژی وەکو بەرپرسیارەکێ سەرەکی د وان ئێرشان دا دبینن.
ل ئالیێ دی ناسر کەنعانی پەیڤدارێ وەزارەتا دەرڤە یا ئیرانێ ژی راگەهاند، وەکو ئیران ئەو چەکی نادەتە حوسییان و حوسی هێزەک مەزن و کاریگەرن ل یەمەنێ و ئەو نها بەرەڤانیێ ل وەلاتێ خوە دکەن، مخابن ئەمریکا و بریتانیا ل هەموو دەڤەرێ ئالۆزیان دروست دکەن، وەکو ئیران ئەو ئێرشێن بریتانیا و ئەمریکا یێن ل سەر حوسییان ژی ب توندی شەرمزار دکەن، چونکی ئەو یەک دبیتە ئەگەرێ ئالۆزیێن نوو ل دەڤەرێ.
