بریسیێ سێ پێشمەرگە ل دێرەلۆكێ برینداركرن
ئامێدیێ، مەحمود نهێلی:
ژ ئەنجامێ هنگاڤتنێ ب بریسیێ دوهی 3/10/2023 سێ پێشمەرگە ل گەلیێ رەشاڤە ل سنوورێ ناوچەداریا دێرەلۆكێ برینداربوون و ئێكسەر بۆ نەخۆشخانێ هاتنە ڤەگوهاستن.
مەسعود تاهر بۆتی، هاریكارێ رێڤەبەرێ ساخلەمیا دەڤەرداریا ئامێدیێ بۆ رۆژناما ئەڤرۆ دیار كر، دوهی نیڤرۆ دو كەس گەهاندنە نەخۆشخانا ئامێدیێ، كو ژ ئەنجامێ لێدانا بریسیێ ل گەلیێ رەشاڤە ل ناوچەداریا دێرەلۆكێ بریندار ببوون گۆت: «د وێ روودانێ دا سێ پێشمەرگە بریندار ببوون، كو ئێكی ژ وانا هەر دو دەستێن وی شكەستینە و ئێكسەر هاتیە ڤەگوهاستن بۆ نەخۆشخانا هەوارهاتنێ ل دهۆكێ و دویێن دی ژی ب سڤكی بریندار ببوون، ئێك ژ وانا سۆتن هەبوو، یێ دی ژی ژ بەر دەنگێ وێ هەرشی بوو، پشتی گەهاندینە نەخۆشخانا ئامێدیێ و چارەسەریێن دەسپێكی بۆ هاتینە كرن، ل سەر داخوازیا وان هەر دو بۆ نەخۆشخانێ ل دهۆكێ هاتنە ڤەگوهاستن».
ناڤهاتی ئاشكرا ژی كر، ژییێ وان پێشمەرگەیان د ناڤبەرا ٣٠ بۆ ٤٠ سالیێ دا بوو، سەر ب هێزا زێرەڤانیێ ڤەنە و خەلكێ هەولێرێ نە.
