برینا به‌ری كاڤلانێ
ئه‌مین بۆتانی
23/11/2021
هه‌ی ئافه‌رین بۆ ته خه‌نجه‌ر،،!!!
ئافه‌رین بۆ ته خه‌نجه‌ر،،!!
به‌س بێژه من
تو رۆژێ چه‌ند برینا ژ به‌ر دكه‌ی؟!
ما كۆلانێن خوینێ بۆچی زوو ب زوو
ڤان زێمارا ژبیر دكه‌ن؟!
ئه‌ز نزانم
ته ئه‌ڤ هه‌می ئێش و ژانه
چه‌وا ل خۆ كۆم كرن؟!
به‌ختێ خودێ
ب ده‌ستێ ڤالا من نه‌زڤڕینه،
دڤێت تشته‌كی ل خۆ بزانم؛
نه‌خۆ ئه‌ڤ هه‌می هێتیم و سێوییه
دێ ب لۆما من خۆن..
ل بیرا ته‌یه وێ رۆژێ
ده‌ما كیخایێ نه‌خری
نهالێن له‌زێ
دكرنه ناڤ چۆكێن بارۆڤێ دا،
گورێن تێهنی
ب چاڤ نقاندنه‌كێ
دگه‌هشتنه سه‌ر پاتكا مه و
ل سه‌ر هلما گولگولی مه‌خه‌ل دبوون..
ته خه‌م پێ نه‌بیت
ئه‌ز دێ سترانێن خۆ
بۆ ته‌رمه‌كێ دی هه‌لگرم،،
به‌س بێژه من
ته دڤێت ڤالاهیێ بۆ كێ تژی بكه‌ی؟!
نێ ده‌ڤ و لێڤێن ته
ژه‌نگا ئولفه‌تێ
ژ حه‌فكێن خه‌ونا دڕه‌نن،،
ده‌مارێن دوینده‌یان
ب هه‌ڕكینێ به‌ترمه دكه‌ن.
هێێێی گزیرا ماقوول
ل ته پیرۆز بیت؛
ل ته پیرۆز بیت
ئه‌ڤ هه‌می دلمان و ده‌بار
ئه‌ڤ هه‌می خرقێن و كه‌بار،،
م دڤێت بزانم
ڤێ كه‌سابه‌تا حه‌لال بۆ كێ دكه‌ی؟!
ل قسووری یا من نه‌نێڕه ئه‌ز خولام
مالی ئاڤا
مالی ئاڤا؛
مالی ئاڤا تو ڤێڕا دگه‌هی
ل دووڤ ده‌ما حه‌سره‌تێ؛
موهرا خۆ
ل كاغه‌زا خاترخواستنێ بده‌ی،
مالی ئاڤا تو ڤێڕا دگه‌هی
ل دووڤ ده‌ما كالبوونێ
جحێلینیێ
به‌رده‌یه گێولێ دره‌نگیێ،،
نه‌هه‌رێ ێ ێ
تازه یا ژ خوه‌یه!!
رۆژا ته‌نگه‌زاران
ل پشت هه‌فت چیایان ئاڤا بوو،،
نه‌هه‌رێ تازه دلناهێلم
برینه‌كا ساڤا
ژ ڤێ قه‌ده‌را سۆر ڤه‌ده‌م،،
ما خۆ نه ئه‌و
ژ گرۆتنا په‌زێن نه‌چاریێ بێتره!!!
دێ بلا ئه‌و ژی
د ناڤ ڤێ سوحبه‌تا كه‌ڤنار دا بگه‌ڤزیت..
دێ بڕێسه
بڕێسه ته‌شیا ڤێ مامكا كه‌سنه‌زان،
بڕێسه
ژ هریا خه‌مگینی یا مه؛ بڕێسه!!!
شه‌رمه‌كا ستوور
ژ پیستێ گای
بۆ روویێ فه‌له‌كێ ڤه‌هینه،
نه‌قله‌كا دی یا سه‌ردابرنێ
بۆ مه ڤه‌گێڕه؛
هشیار بی
وه‌ختێ به‌حسی چرمسینا گوله‌كێ دكه‌ی
هوور و مویرێن چ گولدانا تێكڤه‌نه‌ده!!
ره‌حمێ ب ئاگری داببه
وه‌ختێ دگه‌هیه سۆتنا هناڤا،،
هشیار بی
كو دگه‌هیه له‌هی و لێسه‌را
كه‌س هزره‌كا خراب ژ بارانێ نه‌كه‌ت،،!!!
ره‌حمێ ب ئاڤێ داببه
وه‌ختێ دگه‌هیه بهوژتنا حه‌یایێ..
ڤێ گاڤێ
ئه‌ز وه‌كی قوربانیه‌كێ جاش دبێژمه ته؛
هشیار بی هه‌تكا من نه‌به‌ی،
كه‌سێ ب نامووسا مه یا له‌وتی نه‌حه‌سینی..
پا دێ ڤێجا بلا پاشی
ئه‌ڤ عه‌رز و عه‌یالێ هه‌شپێوه‌ر
هه‌ر كه‌تیكانێ بكه‌ن و
هه‌تا هه‌تا به‌ركێن وان
ب ڤێ حه‌نه‌كا تامسارڤه زه‌عێر ب بن،،،!!!
