بزانه هه‌ژارترین سه‌رۆك داخوازا دابینكرنا چ ئوتێله‌كێ ل توركیا كریه
ئه‌ڤرۆنیۆز، ئه‌یاد به‌روارى:
ل ڤان رۆژان سه‌رۆكێ به‌رێ یێ وه‌لاتێ ئورۆگوای ( خوسێه موخیكا) یێ به‌رنیاس ب هه‌ژارترین سه‌رۆك ل جیهانێ، یێ ل توركیا ل دووڤ داخوازه‌كا پارتا گه‌ل یا كوماری و مه‌رجێ وی بۆ قه‌بوولكرنا وێ سه‌ره‌دانێ یێ سه‌یر بوو ل ده‌ڤ توركان ئه‌وژی ئه‌و و هه‌ڤژینا خوه ل ئه‌رزانترین ئۆتێل بمینن.
ل دووڤ سایتێ (مه‌لاتیا هه‌به‌ر) یێ توركی، خوسێه موخیكا ل رۆژا پێنج شه‌مبی 29 ڤێ مه‌هێ یێ گه‌هشتیه ستانبولێ و ل ئۆتێلا ( تاكسیم هیل) دمینیت كو بهایێ ژۆره‌كا دو نه‌فه‌ری (90) دولارن و دێ بۆ ده‌مێ 10 رۆژان مینیت.
ل دووڤ وی سایتێ توركی، سه‌رۆكێ به‌رێ یێ ئورۆگوای بۆ ڤه‌گوهاستنا خوه دناڤ ستانبولێ دا، داخوازا ترۆمبێله‌كا (فولگس واگن) یا وه‌كو وی هه‌ی ل ئورۆگوای كو مودێلا وێ یا سالا 1987 یه.
خوسێه موخیكا ژ سالا 2010 هه‌تا ئادارا 2015 سه‌رۆكێ ئورۆگوای بوو، ل ده‌مێ سه‌رۆكاتیا خوه‌دا، كۆچكا سه‌رۆكاتیێ بجه هێلا و ل گه‌ل هه‌ڤژینا خوه ل گونده‌كی ل ده‌رڤه‌ى (مونتیفیدیو) یا پایته‌خت ئاكنجی بوو كو ڕێیا مالا وی ئاخ بوو. ل ده‌مێ د پۆستێ سه‌رۆكاتیێ دا و هه‌تا نوكه ژی 90% ژ مووچێ خوه كو 12 هزار دولارن د به‌خشی بۆ وان رێكخراوێن خێرخواز ئه‌وێن وی دامه‌زراندین بۆ هاریكاریا هه‌ژاران و كێم ده‌رامه‌تان و پشتی باجێ تنێ گوژمێ 775 دولاران بۆ وی دمان كو ئه‌و كوژمه دبیته رێژا داهاتیێ مه‌هانه ل ئورۆگواى و پشتى ده‌مێ سه‌رۆكاتیا وی ب دووماهی هاتی تنێ 1800 دۆلار هه‌بوون ل گه‌ل ترۆمبێلا (فولگس واگن) یا مودێل 1987 و خانیێ وی ل گونده‌كی كو ل وێرێ ئه‌و و هه‌ڤژینا خوه كارێ چاندنێ دكه‌ن و تنێ دو سه‌رباز و سه‌یه‌ك زێره‌ڤانیێ لێ دكه‌ن.
