بزاڤێن ئەدەبی
زوهێر كورەماركی
رۆژ بۆ رۆژێ دهۆك یا كراسێ خۆ بەرەو باشتر دگوهۆڕیت و خۆ ب كراسێن نوو یێن ئەدەبی و رەوشەنبیری د پێچیت و بەرەڤ پێشڤە یا دچیت. بزاڤێن ئەدەبی یێن خۆرت یێن ل باژێرێ منێ جوان دهۆكا دەلال دهێنە گێران مینا ڤیستەڤالا دهۆكێ یا سالانە و دیدارا نەورۆزێ و یاسالانە و دیدارا ئەدەبێ ژنان پشتی چەند رۆژەكێن دی دێ دیدارا خانی ٢هێتە گێران، كو بدیتنا مە ئەڤە ئاماژێن جوان و دلخۆشكەرن كو دێ دهۆكێ بەرەو ئاستێن باشێن پێشڤەچوونێ بەن و دێ گەهینە ئاستێن باژێرێن پیشكەفتی؛ چونكێ دڤان نیمچە ڤیستڤالادا یان دیدارادا گەلەك ئەدیب و رەوشەنبیرو نڤێسەر و ژ دەرڤەی كوردستانێ و ناڤخۆیا كوردستانێ دهێنە گازیكرن یان ڤەخواندن، ئەڤە ژی دێ بیتە هۆیەك زاراڤە و كەلتوور و زمان تێكەل ببن و قازانج و مفای ژ ئێك دوو ببینن، پەیڤەك ل ڤێرە پەیڤەك ل وێراهە، دیتنەك و هزرەك ل ڤێرە و ئێك ل وێراهە دێ هێدی هێدی لێتێگەهشتن و هەڤنیاسینەكا باش و هزرێن باش هێنە پێش و دێ هەمی لایەنێن جڤاكی ژێ مفادار بن چونكی ژ بلی مەسەلێن رەوشەنبیری و كەلتووری ئابۆری ژی دێ مفای ژێ بینن هوتێل و خارنگەه و دكاندار و هەتا تەكسی ژی .
ئەڤە نیشانێن دلخۆشكەرن كو دهۆك نە دهۆكا جارایە، بەلكو یا هێدی هێدی دكەڤیتە سەر سكێ دورستێ ژیانێ و دێ پتر بەرێ خەلكێ وێ كەڤیتە سەر خواندن و نڤێسینێ و دێ ئەدیب و رەوشەنبیرو نڤێسەرێن نوو هێنە گۆرەپانێ و دێ گوهۆرینێن ریشەیی دهەمی سكتەرێن ژیانێ پەیدا بن و خەلكێ وێ دێ پتر هشیار بیت و ئەرك و ماف دێ پتر هێنە زانین وخەلك دێ پتر بەرەو تشێن شارستانی مەدەنیڤە چیت دێ دەست ژهندەك كارێن كرێت و خراب هێنە بەردان و خەلك دێ ب زمان و چاڤ كەڤیت و دێ ئاخڤیت، دێ باژێرێ مە پتر ئالاڤێن مەدەنیەتێ هەمبێز كەت و دێ رامان و تاما ژیانەكا سەردەمیانە پەیدا بیت، ئەم نابێژین هەمی تشت دروست و بوون چ نەمان نەخێر هێشتا گەلەك سكتەرێن ماین. وەلێ ئەڤە ئاماژێن جوانن و رامانێن دلخۆشكەرن، رۆژ بۆ رۆژێ دهۆك یا گەشەیێ بخۆڤە دبینیت و یا بەرەو پێشڤە پێنگاڤا دهاڤێژیت هیڤیا مە ئەڤە ئەوە پێنگاڤێن دیراسەكری بن و هەمی تشتێ كرێت و نەشارستانی و خراب كو دگەل داب و نەریتێن مە یێن جوان نەگونجن رادەتە گیفكێ دیرۆكێ.
