بزاڤێن دهۆكێ و زاخۆ بۆ خوە قورتالكرنێ د بەردەوامن
ئەڤرۆ
چاڤەڕێ یە ل ئەینیا بهێت دەمژمێر سێیێ ئێڤاری حەفت یاری ژ گەڕا26ێ یا خولا كوردستانێ بۆ یانەیێن پلا نایاب یا تەپا پێی بهێنە ئەنجامدان، هەردو یانەیێن دهۆك و زاخۆ دێ بزاڤێن بەردەوام خوە دووركرن و قۆرتالكرنێ ژ رێزبەندیێن دووماهیێ كەن و ئاكرێ دێ بزاڤێ كەت ئەنجامێن خوە یێن سەركەفتنێ ڤەگەڕێنیت.
ل یاریگەها خوە تیما یانەیا دهۆك دێ مێڤانداریا یانەیا چارقۆرنە كەت د تاقیكرنەكا ب هێز بۆ ئەلهۆیێن چیا دا، لێ سەركەفتنا یاریا بۆری دگەل شەقلاوە ژەمەكا بهێز دایێ بۆ ڤێ یاریێ كو بەردەوامیێ بدەتە ئەنجامێن باش و خوە قۆرتالكرن ژ رێزا دووماهیێ و داكەفتنێ بكەت ئەوا نوكە 22خال كۆمكرین و رێزا15ێ و دووماهیێ دهێت، بەرانبەر دا تیما مێڤان 31 خال كۆمكرینە و رێزا حەفتێ دهێت، د قۆناغا ئێكێ دا یانەیا چارقۆرنە شیابوو ب دو گۆلان سەركەفتنێ ل سەر دهۆكێ بینت، لەوما بۆ یاریا ڤێ گەڕێ دێ بزاڤێن تۆلڤەكرنێ و خوە قۆرتالكرنێ بیت.
ژلایەكێ دووڤە تیما یانەیا زاخۆ دێ ل باژێرێ سلێمانیێ بیتە مێڤانا یانەیا شێروانە د ئەركەكێ بزەحمەت دا، كوڕێن خابووری ژی د هێلا مەترسیا داكەفتنێ دانە ئەوێن وەكو دهۆكێ 22 خال كۆمكرین ب جووداهیا گۆلان رێزا 14ێ و بەری دووماهیێ دهێت، د قۆناغا ئێكێ دا زاخۆ و شێروانە ب دو گۆلان وەكهەڤبوون، لێ بۆ ڤێ یاریێ تیما ئیدارا سەربەخوەیا زاخۆ چو بژاردە نینن ژبلی سەركەفتنێ پێخەمەت دووركەفتن ژ رێزبەندیا مەترسیێ.
یانەیا سێیێ یا پارێزگەها دهۆكێ و بەهدینان تیما ئاكرێ یە ئەوا دێ ل یاریگەها ئاشتی باژێرێ سلێمانیێ بیتە مێڤانا سیروانی نوو، ئاكرێ 31 خال كۆمكرینە و رێزا دەهێ دهێت بەرانبەر دا سیروانی نوو بتنێ سێ خالان كێمترە و رێزا13ێ دهێت، ئانكو یاریەكا ئاگرینە و شەڕی بۆ رێزبەندیێ كەن، ئاكرێ ئەوا لڤێ دوووماهیێ ئەنجامێن وێ وەكو دەستپێكا خولی نەبووینە دێ بزاڤێ كەت سەركەفتنا خوە یا قۆناغا ئێكی دووبارە بكەتڤە.
ژ یاریێن دی، سۆران- برایەتی، دەربەندیخان- چەمچەمال، هندرین -شەقلاوە، سەیدسادق- ئارارات، پێشمەرگەیا هەولێر دێ یا چاڤەڕێكری بیت.
