بزڤڕە ڤە

شیان مەهدی کانیسارکی

سۆزبیت ببم زارۆک و
چ جاران ل دویف تە نەکەم گری و
ئارام ڕوینم..

بزڤڕەڤە، سۆزبیت
چاڤێن من ژ چاڤێن تە ڤەنەبن،
د هەمی پەیڤێن تە بگەهم.

بزڤڕەڤە، سۆزبیت
هەر رۆژ ئەرکێن قوتابخانێ
دوبارە و سێبارە بخوینم
و ئێکەم دەربچم.

بزڤڕەڤە، سۆزبیت
خەمێن تە هەمیان هەلگرم
سۆزبیت مویەکێ پرچێ تەژی
سپی نەکەم…

بزڤرەڤە، دا حەفت
گەوافێن تەمام ل دۆر
وێ خالا ڕەشا ل گەردەنا تە بکەم..

ئەو کۆلانێن من و تە ئاڤاکرین
نوکە د هەڕفتینە، د بێ بانن
د بێ دیوارن، بزڤڕەڤە دا
دوبارە ئاڤاکەین..

تە گۆتبوو من:
ژیانا من هەمیێ بنڤیسە و بکە پەرتووک،
تو ب خودێ بزڤڕەڤە دا بنڤیسم..

تە ڕێکا من..
گەلەک یا درێژکری،
ڕێکا من کورت بکە و
بزڤڕەڤە.. یان جهێ من لدەف خوە بکە.

ژ زارۆکینی تە فێری هەیڤێ کرم،
ب زڤڕەڤە دا پێکڤە ل هەیڤێ ب نێڕین
و برینێن خوە دەرمان بکەین..

بزڤڕەڤە، سۆزبیت
ڕۆندکێن خوە هەمیان
سەرژێکەم..
بکەم قوربان و
لبەر پێ یێن تە بدەم..

ب تنێ.. بزڤڕەڤە!

کۆمێنتا تە