بسپوره‌كێ ده‌روونی: نه‌خوشێن ئوتیزمێ ل وه‌لاتێن بیانێ فێرگه‌هێن تایبه‌ت هه‌نه
هه‌ولێر، سولین سلێمان:
نه‌خوشیا ئوتیزمێ ل ده‌ف زارۆكان نه‌خوشیه‌كا ئالوزا مێشكیه و كارتێكرنێ ل سه‌ر گه‌شه‌یا ئه‌قلێ زارۆكی دكه‌ت، بسپوره‌كێ ده‌روونی ژی دبێژیت: ئه‌ڤ نه‌خوشیه ل ده‌ف هنده‌ك زارۆكان ل ژیێ سێ سالیێ ده‌ردكه‌ڤیت و دبیته ئه‌گه‌رێ وێ چه‌ندێ كو ئه‌ڤ جوره زارۆكه د ئاخفتنا نه‌گه‌هن و زێده‌تر شیانا تێگه‌هشتنا په‌یڤان هه‌یه و نه‌شێن گوهێ خوه ب ده‌نه كه‌سێن ده‌وروبه‌ر و ب ئاماژه هنده‌ك جاران تێدگه‌هن د بیاڤێ جڤاكیدا د لاوازن.
دكتور كه‌ریم شه‌ریف قه‌ره‌چه‌تانی ماموستایێ زانكویێ و بسپور د بوارێ ده‌روونی
دا، بو روژناما ئه‌ڤرۆ دیار كر كو هنده‌ك پزیشك دبێژن ئه‌ڤ جوره زارۆكه د قوناغا ده‌سپێكا تووشبونا وان ب ڤێ نه‌خوشیێ دهێنه ده‌ستنیشانكرن و پێدڤیه زوو بهێته چاره‌سه‌ر كرن داكو مێشكێ وان باشتر گه‌شێ بكه‌ت وه‌ك كریار و په‌یوه‌ندیێن جڤاكی.
قه‌ره‌چه‌تانی زێده‌تر گۆت: (ده‌ستنیشانكرنا ئه‌ڤان جوره نه‌خوشیا لده‌ف زاروكان پێدڤی ب چاره‌سه‌ریه‌كا راسته‌وخو هه‌یه ب رێكا كه‌سێن بسپۆر د بیاڤێ نه‌خوشیا ئوتیزمێ دا، هه‌روه‌سا دایك و بابا روله‌كێ گه‌له‌ك گرنگ هه‌یه د په‌روه‌رده‌كرنا وان دا، ژبه‌ركو زارۆكێن ئوتیزم هه‌ی پێدڤی ب چاڤدێریه‌كا باشن).
بسپورێ ده‌روونی ئاشكرا ژی كر كو نوشدارێن تایبه‌ت ب نه‌خوشیا ئوتیزمێ دشێن ده‌ستنیشان بكه‌ن كا زاروكی ئه‌ڤ نه‌خوشیه هه‌یه یان نه و گۆت: (نیشانێن ڤێ نه‌خوشیێ ژی ئه‌ڤه‌نه كۆ ب ره‌نگه‌كێ گران تێكه‌لیێ و په‌یوه‌ندیێن جڤاكی دكه‌ن و د لاوازن و دیسا وه‌ك زارۆكه‌كێ لال ره‌فتارێ دكه‌ن حه‌ز ژ فێربونێ ناكه‌ن و لڤینێن وانا زۆرن و زۆر جاراژی حه‌ز دكه‌ت ب تنێ بمینیت و تێكه‌لیا ده‌وروبه‌را نه‌كه‌ت و هنده‌ك نیشانێن دیتر ژی).
دكتوری به‌حسێ چاره‌سه‌ریا توشبوویێن نه‌خوشویا ئوتیزمێ كر و گۆت: (ڤه‌كولینان ئه‌و چه‌ندا سه‌لماندی كۆ باشترین چاره‌سه‌ری ژ بۆ وان جوره زارۆكان ئه‌وه به‌ری ژیێ سێ سالیێ هنده‌ك چاره‌سه‌ری ژ بۆ بهێنه كرن ئه‌وژی پتریا وانا په‌یوه‌ندی ب ره‌فتارێن وانڤه یا هه‌ی ب گشتی ژی هه‌تا نۆكه ده‌رمانه‌كێ تایبه‌ت بو ڤێ نه‌خوشیێ نه‌هاتیه دروست كرن، چونكی هنده‌ك جاران پێدڤیه راهێنانێن تایبه‌ت ب ڤان زاروكا بهێنه كرن، داكو ئه‌و ب خوه خوارنا خوه ب خون و خوه پاقژ بكه‌ن).”
د. كه‌ریم قه‌ره‌چه‌تانی د ئاخفتنا خوه یا دووماهیێ دا گۆت: (ل هنده‌ك وه‌لاتان فێرگه‌هێن تایبه‌ت بۆ ڤان جوره زارۆكان دهێنه دروست كرن داكو خواندنا خوه تێدا به‌رده‌وام بكه‌ن و
ژلایێ كه‌سێن پسپۆرڤه راهێنان ب وان دهێنه كرن و چاڤدێریه‌كا باش ل وان دهێته كرن).
