بسپۆره‌كێ ئابووری: دۆلار دێ ڤه‌گه‌ڕیته بهایێ به‌رێ
هه‌ولێر، قائید میرۆ:
بهایێ دۆلاری ناكۆكی ئێخستینه دناڤا حوكمه‌ت و لایه‌نێن عیراقی و پشتی بزاڤێن زۆر یێن سه‌رۆك وه‌زیرێن عێراقێ، نه‌شیا بهایێ دۆلاری بۆ بهایێ به‌رێ ڤه‌گه‌ڕینیت. بسپۆره‌كێ ئابووری ژی ئاشكراكر، حوكمه‌ت و په‌رله‌مانێ عیراقێ هه‌موو بزاڤه‌كێ دكه‌ن بۆ جێگیركرنا بهایێ دۆلاری ب رێیا پڕۆژه قانوونا بودجه‌ی. هه‌روه‌سا دبێژیت: دۆلار دێ ڤه‌گه‌ڕیت بۆ بهایێ و به‌رێ و هژماره‌ك ژ به‌نكێن دی دێ كار بۆ كڕینا دۆلاری كه‌ن.
پڕۆفیسۆر خالید حه‌یده‌ر، بسپۆرێ ئابووری بۆ رۆژناما ئه‌ڤرۆ دیار كر “ل گوره‌ی زانستێ ئابووری دا، ده‌مێ بهایێ هه‌ر كه‌لوپه‌له‌كی بهێته‌كرن ئێكسه‌ر دڤێت به‌حسێ بازاڕی بكه‌ین، چونكه بهایێ هه‌ر تشته‌كی گرێدایی خواست و فرۆتنێ بزانین چه‌ند خواست ل سه‌ر ڤی كه‌لوپه‌لی هه‌یه، بۆ دۆلاری ژی هه‌مان تشته، نوكه دۆلار كێمتر دهێته د بازاڕی دا و خواسته‌كا زۆر ل سه‌ر هه‌یه، به‌نكا ناڤه‌ندی دۆلار كێمكریه بۆ بازاڕی، ئه‌ڤه بوویه ئه‌گه‌ر بهایێ دۆلاری ل هه‌مبه‌ر دینارێ عێراقی بلندببیت.
زێده‌تر گۆت: هه‌شت به‌نك ئێخستینه دناڤا لیستا ره‌شدا، ب ئه‌گه‌رێ ڤێ چه‌ندێ ئه‌و به‌نك دۆلاری دبنه ئیرانێ و توركیا، ئه‌ڤه ژی هه‌موو ئه‌و به‌نكن یێن دۆلاری ل به‌نكا ناڤه‌ندیا عێراقێ دكڕن و ئه‌و هه‌شت به‌نك هاتینه ده‌ركرن ل فرۆتنا دۆلاری، واته ئه‌و به‌نك هاتینه بێ به‌هكرن ل كڕین و فرۆتنا دۆلاری، به‌لێ هێشتا چه‌ندین به‌نكێن دی و كه‌سێن زۆر وه‌ك بازرگان ماینه بۆ كڕینا دۆلاری ل به‌نكا ناڤه‌ندی، هه‌روه‌سا به‌نكا ناڤه‌ندی دۆلاری د فرۆشیته وه‌به‌رهێنه‌ر و گه‌شتیار و بازرگانان.
ئاماژه ب هندێ ژی دا، شانده‌كێ وه‌زاره‌تا داراییا عێراقێ دێ سه‌ره‌دانا ئه‌مریكا كه‌ت ب مه‌ره‌ما چاره‌سه‌ركرنا ئاریشا بلندبوونا بهایێ دۆلاری و چاره‌سه‌ركرنا ڤێ ئاریشێ، هنده‌ك به‌نكێن دی ل جهێ به‌نكێن هاتینه ده‌ركرن دێ ده‌ست بكاربن، به‌لێ ده‌مێ 15 رۆژان پێدڤیه بۆ په‌سه‌ندكرنا ناڤێن وان به‌نكێن نوو، ئه‌ڤه ژی دێ بیته ئه‌گه‌ر بهایێ دۆلاری داكه‌ڤیت، ب تایبه‌تی د ده‌مێ نوكه دا ب بڕیارا به‌نكا ناڤه‌ندی فرۆتنا دۆلاری زێده‌كریه.
پڕۆفیسۆر خالید حه‌یده‌ر ئاماژه كر “پێشبینی دكه‌م ل ده‌مه‌كێ زۆر نێزیك بهایێ دۆلاری ڤه‌گه‌ڕیته بهایێ به‌رێ، ب تایبه‌تی پشتی په‌سه‌ندكرنا بڕیارا به‌نكا فیدڕالا ئه‌مریكا و رێكه‌فتنا لایه‌نێن سیاسی، ژ به‌ر كو لایه‌نێن سیاسی كاریگه‌ریێن زۆر ل سه‌ر سیاسه‌تا به‌نكا فیدڕال هه‌یه، هه‌ر چه‌نده دڤێت به‌نكا ناڤه‌ندی ده‌زگه‌هه‌كێ بێلایه‌ن بیت، لێ مخابن ئه‌ز وه‌سا دبینم ده‌زگه‌هه‌كێ بێلایه‌ن نینه، دینارێ عیراقێ دێ بهێز كه‌ڤیت و بهایێ دۆلاری ڤه‌گه‌ڕیته بهایێ به‌رێ.
پڕۆفیسۆر خالید حه‌یده‌ر دیار كر، ل هه‌مبه‌ر دینارێ عیراقی سه‌رۆك وه‌زیرێن عێراقێ به‌ری نوكه زۆر ب دژواری هێرش دكره سه‌ر سه‌رۆك وه‌زیرێن به‌رێ یێ عێراقێ، دێ شۆڕشا خه‌لكێ برسی هێته ده‌ستپێكرن و دژی بلندبوونا بهایێ دۆلاری، به‌لێ دهه‌مان ده‌م دا سه‌رۆك وه‌زیران نه‌شیا رێگریێ ل بلندبوونا بهایێ دۆلاری بگریت، حوكمه‌ت و په‌رله‌مانێ عێراقێ یێ هه‌موو بزاڤه‌كێ دكه‌ن بهایێ ئێك دۆلار هه‌مبه‌ر ئێك هزار و 465 دیناران بهێته جێگیركرن و ب ڤێ چه‌ندێ ژی ئه‌ز باوه‌رم دێ بهایێ دۆلاری هێته ئه‌رزانكرن و ڤه‌گه‌ڕیته بهایێ به‌رێ، هه‌ر چاوابیت ئه‌و بهایێ نوكه ل سه‌ر دۆلاری بهایه‌كێ جێگیر نینه و دێ هه‌ر داكه‌ڤیت بۆ بهایێ به‌رێ.
