بسپۆره‌كێ تورك: سه‌ره‌دانا ئه‌ردۆغانی بۆ رۆسیا بێی ئه‌نجام بوو
ئه‌ڤرۆ:
بسپۆره‌كێ كاروبارێن سیاسی یێ تورك دیار دكه‌ت كو سه‌ره‌دانا ئه‌ردۆغانی یا بۆ رۆسیا و هه‌ڤدیتنا وی ل گه‌ل پوتینی چو ئه‌نجامێن خوه نه‌بووینه، چونكو هه‌ڤدیتنا وان گه‌له‌ك كورت بوویه و هه‌روه‌سا پشتی هه‌ڤدیتنێ ژی چو پرێس كۆنفرانس نه‌هاتنه كرن و ئه‌و یه‌ك ژی نیشا دده‌ت ره‌وش بۆ توركیا باش نینه.
فه‌هیم تاشته‌كین بسپۆرێ كاروبارێن رۆژهه‌لاتا ناڤین بۆ ده‌زگه‌هێن راگه‌هاندنا توركیا دیار كر كو سه‌ره‌دانا ئه‌ردۆغانی و هه‌ڤدیتنا وی یا ل گه‌ل پوتینی بۆ توركیا چو ئه‌نجامێن خوه نه‌بووینه، چونكو یا ئێكێ هه‌ڤدیتنا وان نێزیكی دو ده‌مژمێران ڤه‌كێشیا كو بێگومان پشكه‌ك زێده بۆ وه‌رگێرانێ بوویه، خالا دی پشتی كو هه‌ڤدیتن ب دووماهی هاتی چو پرێس كۆنفرانسێن هه‌ڤپشك نه‌هاتنه ساز كرن، ئه‌و یه‌ك ژی نیشا دده‌ت كو رۆسیا چو داخوازیێن توركیا ل دۆر سووریێ قه‌بوول نه‌كرینه و داخواز ژ ئه‌ردۆغانی ژی هاتیه كرن كو دڤێت توركیا هه‌موو هێزێن خوه ژ ئاخا سووریێ ڤه‌كێشیت.
هه‌مان بسپۆرێ تورك ئه‌و یه‌ك ژی دیار كریه كو د ره‌وشا نها دا توركیا گه‌له‌ك ته‌نگاڤ بوویه، چونكو ژ ئالیه‌كێ ئه‌مریكا داخواز ژ توركیا كریه كو ده‌ستان ژ كڕینا سیسته‌مێ موشه‌كی یێ رۆسیا به‌رده‌ت و ل ئالیێ دی ژی نها رۆسیا داخواز ژ توركیا دكه‌ت كو هه‌موو هێزێن خوه ژ سووریێ ڤه‌كێشیت، ژ به‌ر هندێ ژی نها توركیا گه‌له‌ك ته‌نگاڤ بوویه و دڤێت توركیا بریارا خوه یا دووماهیێ بده‌ت و گۆت: (بێگومان بابه‌تێ سووریێ بۆ توركیا گه‌له‌ك گرنگه، لێ دڤێت ئه‌ردۆغان ژی باش بزانیت كو ئێدی رۆسیا بریار یا دای كو ره‌وشا سووریێ ئارام بیت، ئانكۆ رۆسیا دڤێت شام جاره‌كا دی حوكمێ ل هه‌موو سووریێ بكه‌ت و پرسا كوردی ژی د چارچۆڤێ دستوورێ نوو یێ سووریێ دا بهێته چاره‌سه‌ركرن، ئانكۆ ب كورتی دێ توركیا ده‌ست ڤالا ژ سووریێ ڤه‌گه‌ریت و ئه‌و یه‌ك ژی بێگومان شكه‌ستنه‌كا گه‌له‌ك مه‌زنه بۆ توركیا).
فه‌هیم تاشته‌كین ئه‌و یه‌ك ژی دیار كر كو هنده‌ك ژ جه‌نه‌رالێن سه‌ربازی یێن توركیا به‌ری حه‌فتیه‌كێ داخواز ژ ئه‌ردۆغانی كربوون هه‌كه رۆسیا هێزێن خوه ل سه‌ر سنۆرێ توركیا و سووریێ بجه بكه‌ت و سۆز بده‌ت كو دێ سنۆری پارێزیت وی ده‌می توركیا دشێت هێزێن خوه ژ سووریێ ڤه‌كێشیت كو ئه‌و یه‌ك ژی ب دلێ ئه‌ردۆغانی نه‌بوویه، چونكو ئه‌ردۆغان وه‌سا دبینیت كو توركیا ژ بۆ خه‌لكێ سووریێ گه‌له‌ك قوربانی داینه و نابیت وه‌سا ده‌ستان ژ سووریێ به‌رده‌ت، لێ د ره‌وشا نها دا رۆسیا ژی به‌رهه‌ڤ نینه چو رێككه‌فتنێن نوو ل گه‌ل توركیا بكه‌ت و به‌ری نها ژی وه‌زیرێ ده‌رڤه یێ رۆسیا دیار كربوو كو هه‌ڤكاریا وان یا ل گه‌ل توركیا د چارچۆڤێ شه‌رێ ل دژی تیرۆرێ بوویه و دڤێت نها توركیا هه‌موو هێزێن خوه ژ ئاخا سووریێ ڤه‌كێشیت و پشته‌ڤانیێ ل گرۆپێن تیرۆرستی ژی نه‌كه‌ت.
ناڤهاتی د دووماهیا ئاخڤتنا خوه دا ئه‌و یه‌ك ژی نه‌ڤه‌شارت كو د ره‌وشا نها دا توركیا تووشی شكه‌ستنه‌كا مه‌زن ل سووریێ هاتیه، چونكو هه‌كه ئه‌مریكا هێزێن خوه ژ سووریێ ڤه‌كێشیت ژی رۆسیا رێ ناده‌ت كو توركیا ئاخا سووریێ داگیر بكه‌ت، چونكو رۆسیا دڤێت شام و كورد پرسێن خوه چاره‌سه‌ر بكه‌ن و رۆسیا به‌رهه‌ڤه دانپێدانێ ب رێڤه‌به‌ریا خوه‌سه‌ر یا باكورێ سووریێ ژی بكه‌ت، ئانكۆ رۆسیا دبێژیته توركیا ئێدی ده‌م یێ هاتی هوون هه‌موو هێزێن خوه ژ سووریێ ڤه‌كێشن.
