بسپۆره‌كێ په‌یوه‌ندیێن نێڤده‌وله‌تی:توركیا دێ ده‌ست ب ئۆپه‌راسیۆنه‌كا نوو ل رۆژئاڤایێ كوردستانێ كه‌ت
دیدار، هۆشه‌نگ تاجر:
بسپۆره‌كێ په‌یوه‌ندیێن نێڤده‌وله‌تی راگه‌هاند كو توركیا بازاره‌كا باش ل دۆر بابه‌تێ ئه‌ندامه‌تیا هه‌ر دو وه‌لاتێن سوید و فنله‌ندا بۆ ناڤ رێزێن ناتۆیێ دكه‌ت و ئه‌و بازار ژی مخابن ل دۆر كوردانه و ئه‌ز وه‌سا دبینم دێ دیسان كورد بنه قوربانی.
د. ئه‌كره‌م ئۆنه‌ن بسپۆرێ په‌یوه‌ندیێن نێڤده‌وله‌تی د دیداره‌كا تایبه‌ت دا بۆ رۆژناما ئه‌ڤرۆ دیار كر كو توركیا ب هه‌موو ره‌نگه‌كێ كارتا ئه‌ندامه‌تیا هه‌ر دو وه‌لاتێن فنله‌ندا و سویدێ بۆ ناڤ رێزێن ناتۆیێ د به‌رژه‌وه‌ندیا خوه دا بكار دئینیت، بێگومان نها ره‌وش گه‌له‌ك جودایه و ئه‌مریكا ژی نه‌چاره هنده‌ك داخوازیێن توركیا قه‌بوول بكه‌ت هه‌روه‌سا ناتۆ ژی نها نه‌چاره و به‌ری چه‌ند رۆژان ژی سكرتێرێ گشتی یێ ناتۆ ب ره‌نگه‌كێ ئاشكرا دیار كر كو هنده‌ك داخوازیێن توركیا د جهێ خوه دانه و ئه‌و به‌رهه‌ڤن وان داخوازیێن قه‌بوول بكه‌ن و گۆت: (بۆ هه‌ر كه‌سه‌كێ ژی ئاشكرایه كو داخوازیێن توركیا چنه، نها توركیا دڤێت هه‌رێمه‌كا ئارام ل سه‌ر سنۆرێ خوه ل گه‌ل سووریێ ئاڤا بكه‌ت، ئانكۆ ب كورتی دڤێت هنده‌ك ده‌ڤه‌رێن دی یێن رۆژئاڤایێ كوردستانێ ژی داگیر بكه‌ت، ئه‌و ده‌ڤه‌رێن كو نها توركیا دڤێت وان داگیر بكه‌ت ئه‌و ده‌ڤه‌رن كو هێزێن ئه‌مریكی لێ نه، مخابن وه‌سا دیاره كو ئه‌مریكا دێ داخوازیێن توركیا قه‌بوول كه‌ت، ئه‌ز وه‌سا دبینم كو دێ دیسان كورد ل رۆژئاڤایێ كوردستانێ بنه قوربانی، جیهانا ئه‌ڤرۆكه جیهانا به‌رژه‌وه‌ندیا نه و كه‌س ژ بۆ چاڤێن ره‌ش یێ كه‌سێ سیاسه‌تێ ناكه‌ت، هه‌ر كه‌سێ به‌رژه‌وه‌ندیێن خوه دڤێت و مخابن كورد دێ دیسان بنه قوربانیێن به‌رژه‌وه‌ندیێن هێزێن جیهانی).
د. ئه‌كره‌م ئۆنه‌ن ئه‌و یه‌ك ژی دیار كر كو ئه‌و پێشبینی دكه‌ت توركیا دێ د دووماهیێ دا ل دۆر ئه‌ندامه‌تیا فنله‌ندا و سویدێ رازی بیت و ل هه‌مبه‌ر دا ئه‌مریكا و ناتۆ ژی دێ داخوازیێن توركیا قه‌بوول كه‌ن، توركیا ب هه‌موو ره‌نگه‌كێ خوه بۆ ئۆپه‌راسیۆنه‌كا نوو ل رۆژئاڤایێ كوردستانێ به‌رهه‌ڤ كریه، دیاره توركیا ژی باش دزانیت دێ ئه‌مریكا و ناتۆ داخوازیێن وێ قه‌بوول كه‌ن، ژ به‌ر هندێ ژی چه‌ند رۆژن ئه‌ردۆغان و به‌رپرسێن دی یێن توركیا ب ره‌نگه‌كێ ئاشكرا دبێژن كو ئه‌و دێ ئێرشی رۆژئاڤایێ كوردستانێ كه‌ن و گۆت: (رۆسیا ژ به‌ر شه‌رێ ئۆكرانیایێ نها گه‌له‌ك مژووله و دژبه‌ریا توركیا یا ل هه‌مبه‌ر ئه‌ندامه‌تیا سوید و فنله‌ندا ژی د به‌رژه‌وه‌ندیا رۆسیا دایه، رۆسیا ژی دیاره نها ل دژی ئۆپه‌راسیۆنا توركیا نینه، ژ به‌ر هندێ ژی دڤێت كوردێن رۆژئاڤایێ كوردستانێ خوه بۆ هه‌ر ئه‌گه‌ره‌كێ به‌رهه‌ڤ بكه‌ن، چونكو وه‌كو من گۆتی ئه‌مریكا و ناتۆ ب ره‌نگه‌كێ راسته‌وخوه نه‌بیت ژی ل پشت په‌رده‌ی داخوازیا توركیا قه‌بوول كرینه و توركیا ژی ب هه‌موو ره‌نگه‌كێ خوه بۆ ئۆپه‌راسیۆنه‌كا نوو به‌رهه‌ڤ كریه).
ناڤهاتی ئه‌و یه‌ك ژی دیار كر كو نها ره‌وشا به‌رژه‌وه‌ندیێن وه‌لاتێن رۆژئاڤایی وه‌سا دڤێت كو ل دژی داخوازیێن توركیا نه‌بن، توركیا ره‌نگه نها بشێت هنده‌ك تشتان بده‌ستڤه بینیت لێ ئه‌و یه‌ك رامانا هندێ ناده‌ت كو دێ توركیا بیته سه‌ركه‌فتیا ره‌وشا نها، چونكو توركیا د ناڤ ناتۆیێ دا گه‌له‌ك ئاریشه دروست كرینه، په‌یوه‌ندیێن توركیا و وه‌لاتێن ئه‌ندامێن ناتۆیێ ژی باش نینن، ره‌نگه رازیبوونا ئه‌مریكا و وه‌لاتێن ناتۆیێ بۆ هندێ بیت كو توركیا تووشی شه‌ره‌كێ نوو و ئاریشێن مه‌زنتر بكه‌ن و گۆت: (لێ نها بۆ ئه‌مریكا و ناتۆیێ بابه‌تێ ئه‌ندامه‌تیا سویدێ و فنله‌ندا گه‌له‌ك گرنگه و دیاره د جیهانا نها یا به‌رژه‌وه‌ندیان دا هه‌ر وه‌لاته‌كێ به‌رژه‌وه‌ندیێن خوه دڤێت، ره‌وشا نها ژی نیشا دده‌ت كو توركیا پتر ژ كوردان بۆ ئه‌مریكا و وه‌لاتێن رۆژئاڤایی گرنگه، ژ به‌ر هندێ ژی وه‌كو من گۆتی ئه‌ز وه‌سا دبینم دێ ئه‌مریكا و وه‌لاتێن ناتۆ داخوازیا توركیا یا ژ بۆ ده‌ستپێكرنا ئۆپه‌راسیۆنه‌كا نوو ل رۆژئاڤایێ كوردستانێ قه‌بوول كه‌ن).
بسپۆرێ په‌یوه‌ندیێن نێڤده‌وله‌تی د دووماهیا ئاخڤتنا خوه دا ئه‌و یه‌ك ژی دیار كر كو دڤێت كورد ل رۆژئاڤایێ كوردستانێ خوه بۆ هه‌ر پێشهاته‌كێ به‌رهه‌ڤ بكه‌ن، مخابن وه‌كو من گۆتی ره‌وش د به‌رژه‌وه‌ندیا كوردێن رۆژئاڤایێ كوردستانێ دا نینه، لێ كورد ژی دشێن ب رێیا په‌یوه‌ندیێن خوه یێن ل گه‌ل ئه‌مریكا، رۆسیا و وه‌لاتێن دی هنده‌ك تشتان بكه‌ن، كورد ژی دشێن وه‌سا بكه‌ن كو كاریگه‌ریا ئۆپه‌راسیۆنا توركیا كێمتر لێ بهێت، توركیا دێ بزاڤا هندێ كه‌ت كو هه‌موو رۆژئاڤایێ كوردستانێ داگیر كه‌ت و گۆت: (لێ ئه‌مریكا و وه‌لاتێن رۆژئاڤایی ژی هه‌موو داخوازیێن توركیا قه‌بوول ناكه‌ن، لێ بێگومان كورد دشێن هه‌م ب رێیا به‌رخوه‌دانه‌كا دیرۆكی و هه‌م ژی ب رێیا كارتێن دی یێن سیاسی و دبلۆماسی وه‌سا بكه‌ن كو زیانا ئۆپه‌راسیۆنا نوو یا توركیا كێمتر لێ بهێت، لێ هه‌ر چاوا بیت دێ توركیا ده‌ست ب ئۆپه‌راسیۆنه‌كا نوو ل دژی رۆژئاڤایێ كوردستانێ كه‌ت).
