بسپۆره‌ك: پێدڤیه توركیا هه‌م رۆسیا و هه‌م ژی ئه‌مریكا رازی بكه‌ت
ئه‌ڤرۆ:
بسپۆره‌كێ كاروبارێن سیاسی دیار دكه‌ت كو توركیا هه‌تا نها ژی بزاڤان دكه‌ت كو كۆبانێ، تل رفعه‌تێ و منبجێ كۆنترۆل بكه‌ت و ژ بۆ هندێ ژی پێدڤیه هه‌م ئه‌مریكا و هه‌م ژی رۆسیا رازی بن لێ هه‌تا نها هه‌ر دو وه‌لاتێن زلهێزێن جیهانێ ژی رازی نینن.
فه‌هیم تاشته‌كین بسپۆرێ كاروبارێن سیاسی راگه‌هاند كو توركیا هه‌موو به‌رهه‌ڤیێن خوه بۆ ده‌ستپێكرنا ئۆپه‌راسیۆنه‌كا سه‌ربازی ل رۆژئاڤایێ كوردستانێ كریه، لێ هه‌تا نها ژی نه ئه‌مریكا و نه ژی رۆسیا رازی نینن، هه‌ر دو وه‌لاتێن زلهێزێن جیهانێ ژی هنده‌ك ئه‌گه‌رێن خوه هه‌نه كو ژ به‌ر هندێ رازی نینن و گۆت: (یا ئێكێ رۆسیا دڤێت هه‌موو هێزێن بیانێ ژ ئاخا سووریێ ده‌ركه‌ڤن، چونكی رۆسیا دڤێت جاره‌كا دی شام حوكمێ ل هه‌موو ئاخا سووریێ بكه‌ت، پۆتین باش دزانیت هه‌كه رێ بده‌ت و توركیا هنده‌ك ژ ده‌ڤه‌رێن دی ل باكورێ سووریێ داگیر بكه‌ت وی ده‌می دێ ره‌وش گه‌له‌ك ئالۆزتر لێ هێت، ژ به‌ر هندێ ژی هه‌تا نها رۆسیا رازی نینه و رۆسیا ده‌ست ب هنده‌ك بزاڤێن جودا یا كری ب تایبه‌تی ژی رۆسیا دڤێت به‌رێ كوردان بده‌ته شامێ دا وه‌سا هه‌ر دو ئالی ل سه‌ر هنده‌ك خالان رێككه‌ڤن دا جاره‌كا دی هێزێن سووریێ ڤه‌گه‌رنه ڤه ده‌ڤه‌رێن سنۆری یێن ل گه‌ل توركیا).
سه‌باره‌ت ب هه‌لوه‌ستێ ئه‌مریكا ژی بسپۆرێ كاروبارێن سیاسی دیار دكه‌ت كو ئه‌مریكا ژ بهێزبوونا توركیا یا دلگرانه، چونكی ئه‌مریكی باش دزانن هه‌كه توركیا ل رۆژهه‌لاتا ناڤین پێگه‌هێ خوه بهێزتر لێ بكه‌ت دێ گه‌له‌ك ئاریشێن نوو بۆ ئه‌مریكا و هه‌ڤپه‌یمانێن وێ دروست بكه‌ت، ژ به‌ر هندێ ژی هه‌تا نها ئه‌مریكا رازی نینه و گه‌له‌ك یا ب زه‌حمه‌ته ژی كو ئه‌مریكا رازی بیت توركیا ده‌ست ب ئۆپه‌راسیۆنه‌كا نوو بكه‌ت و گۆت: (ئه‌مریكا به‌ری ده‌مه‌كێ سه‌باره‌ت ب عه‌فرینێ ژی هۆشداری دابوو توركیا كو نابیت چه‌كدارێن رێكخستنا ته‌حریر شام ل عه‌فرینێ بمینن و نها ژی ئه‌مریكا ل دژی هندێ یه كو توركیا هنده‌ك ده‌ڤه‌رێن دی ب تایبه‌تی ژی جهه‌كێ وه‌كو كۆبانێ و منبجێ داگیر بكه‌ت، دیاره ئه‌مریكا دێ گه‌له‌ك كارتان ژی ل دژی توركیا بكار ئینیت، لێ ئه‌و یه‌ك رامانا هندێ ناده‌ت كو توركیا دێ ده‌ستان ژ بزاڤێن خوه یێن بۆ كۆنترۆلكرنا كۆبانێ، تل رفعه‌تێ و منبجێ به‌رده‌ت، چونكی به‌ری ده‌مه‌كێ فه‌رمانداره‌كێ له‌شكرێ توركیا ژی دیار كر كو ئه‌و ده‌ڤه‌ر گه‌له‌ك ستراتیژی نه و توركیا دێ هه‌موو بزاڤان كه‌ت دا بشێت وان ده‌ڤه‌ران ژ ده‌ستێ یه‌په‌گێ و هێزێن سووریا دیموكرات ده‌رخینیت، لێ ئه‌و یه‌ك ژی ب ساناهی نابیت چونكی نها گه‌له‌ك سه‌ربازێن ئه‌مریكا ژی ل وان ده‌ڤه‌ران هه‌نه و ئه‌و یه‌ك ژی بۆ توركیا دێ بیته ئاسته‌نگیه‌كا مه‌زن).
