بسپۆرەک: ئەمریکا نەچارە سیاسەتا خوە ل سووریێ بگوهۆڕیت
ب، سه‌رجان مەحمود:
بسپۆرەکێ کاروبارێن رۆژهەلاتا ناڤین دیار دکەت، ئاخڤتنێن بەری چەند رۆژان یێن نوونەرێ ترامپی بۆ کاروبارێن سووریێ وەسا کر هێزێن سەر ب ئەحمەد شەرعی بزاڤا ژناڤبرنا دورزیان بدەن و نها رەوشەکا نوو هاتیە پێش و ئەمریکا نەچارە سیاسەتا خوە بگوهۆڕیت.
فەهیم تاشتەکین بسپۆرێ کاروبارێن رۆژهەلاتا ناڤین د داخویانیەکێ دا دیار کر، داخویانیا بەری چەند رۆژان یا تۆم باراکێ نوونەرێ ترامپی رێ ل بەر ئالۆزیێن ڤێ دووماهیێ ل سووریێ ڤەکر، چونکی نوونەرێ ئەمریکا وەسا دیار کر ئەو پشتەڤانیێ ل سیستەمەکێ فیدرالی ناکەن و دڤێت کورد و دورزی بەرێ خوە بدەنە شامێ، ئەو یەک ژی وەسا کر ئەحمەد شەرع و چەکدارێن گرێدای وی بێ دو دلی ئێرشی دورزیان بکەن و ژ بەر ڤێ یەکێ ژی رەوشا ناڤخوەیی یا سووریێ ب تایبەتی ژی ل پارێزگەها سوەیدا گەلەک ئالۆز بوو و گۆت: (هەر کەس دزانیت ئسرائیل رێ نادەت ل سووریێ دەستهەلاتەکا ناڤەندی یا بهێز هەبیت، ئسرائیل ب سالانە چاڤەرێی سووریایەک لاواز بوو، ل ئالیێ دی دورزی ل ئسرائیلێ ژی دژین و هەبوونا وان ل سووریێ ژ بۆ ئسرائیلێ گەلەک گرنگە، ژ بەر هندێ ژی بێی دو دلی ئسرائیلێ ئێرشی هێزێن ئەحمەد شەرعی کر و نها رەوشا ناڤخوەیی یا سووریێ گەلەک ئالۆز بوویە).
بسپۆرێ کاروبارێن رۆژهەلاتا ناڤین ئەو یەک ژی دیار کر، هێزێن ئەحمەد شەرع سڤکاتی ب خەلکێ دورزی کرن، ژ بەر هندێ ژی وەلاتێن ئێکەتیا ئۆرۆپا هەر زوو ژ رەفتارێن چەکدارێن شەرعی توورە بوون، ئەو یەک رەواتیێ ددەتە ئسرائیلێ، کو ب هەموو شیانێن خوە ئێرشی چەکدارێن سەر ب ئەحمەد شەرعی بکەت و گۆت: (ئێدی بابەتێ سووریایەکا ناڤەندی گەلەک یا زەحمەتە، پشتی روودانێن ڤێ دووماهیێ ئەمریکا ژی نەچارە سیاسەتا خوە بگوهۆڕیت و بێگومان ئەو یەک هەری زێدە د بەرژەوەندیا کوردان دایە، چونکی کوردان باش دزانی پشتی دورزیان دێ چەکدارێن ئەحمەد شەرعی ئێرشی رۆژئاڤایێ کوردستانێ کەن، لێ نها رەوشەکا دی هاتە پێش و دڤێت ئێدی ئەمریکی بەحسێ سووریایەک ئێکگرتی نەکەن، چونکی ئاشکرا بوو یێن ل شامێ حوکمێ دکەن هێشتا ژی کەسێن توندرەون و ب هەموو رەنگەکێ ل دژی مافێن مرۆڤی نە).
ناڤهاتی د دووماهیا ئاخڤتنا خوە دا ئەو یەک ژی دیار کر، دڤێت تورکیا ژی ڤێ یەکی قەبوول بکەت ئەحمەد شەرع ب هزرا خوە یا توندرەو نەشێت ببیتە هەڤپەیمانەک باش بۆ تورکیا، گرنگە تورکیا ژی پێداچوونێ د سیاسەتا خوە دا بکەت، دەم یێ هاتی تورکیا پەیوەندیێن خوە ل گەل کوردێن سووریێ باش بکەت، چونکی کوردێن سووریێ چو دەمەکێ نابنە مەترسی بۆ تورکیا، بەلکو تورکیا دشێت ب دروستکرنا پەیوەندیێن باش ل گەل کوردان پێگەهێ خوە ل سووریێ ژی بهێزتر بکەت.
