بشار رەمەزان: دەستڤەئینانا رێزا دویێ بەلگەیا پێشكەفتنا ڤێ یاریێ یە
د داخویانیەكێ دا راهێنەرێ تیما هەلبژارتیێ پارێزگەها دهۆكێ یێ یارییا تەپا مێزێ بۆ رۆژنامەیا ئەڤرۆ دیار كر ئەوان شیان ب سەرفەرازی رێزا دویێ ل سەر ئاستێ ئیراقێ بۆ هەڤڕكیێن كچان ب دەستڤە بینن ئەڤە ژی بەلگەیە ل سەر پێشكەفتنا ئاستێ ڤێ یاریێ ل پارێزگەهێ.
زێدەتر بشار رەمەزان گۆت: هەرچەندە د دەمەكێ كێم دا بەرهەڤیێن مە بۆ قارەمانییا ئیراقێ هاتنە كرن، هەشت هەلبژارتیێن پارێزگەهێن ئیراقێ و كوردستانێ ل بەغدا پشكداربوون، هەلبژارتیێ پارێزگەها دهۆكێ پێكهاتی بوون ژ سارا بشار رەمەزان، دلڤین محەمەد ئەمین و رۆزان محەمەد جەمیل شیان هەڤڕكییەكا بهێز بكەن و بچنە یارییا دووماهیێ دگەل خودانێن ئەردی هەلبژارتیێ بەغدا تووشی خوسارەتیێ بووین و رێزا دویێ ب دەستڤە ئینان.
هەروەسان ناڤهاتی كو هەڤدەم دا راهێنەرێ تیما یانەیا دهۆك ئەوچەندە دیاركر بنیاتەكێ باش یێ یاریزانان بۆ ژیێن جودا ل دهۆكێ هەیە و پێدڤی ب پشتەڤانییا بەردەوامن پێخەمەت ئاست و شیانێن وان زێدەتر بهێتە پێشئێخستن و گۆت: تەپا مێزێ یا دهۆكێ چەندین قارەمانێن ل سەر ئاستێ كوردستانێ و ئیراقێ هەنە و هەتا نوكە ژی پشكداریان دكەن، گەشبینم هەكە چاڤدان بۆ یاریزانێن ژیێن جودا بهێتە كرن ب شێوەكێ باشتر دێ كۆمەكا باش یا قارەمانان هێنە دیتن.
