بـابـێ كـوڕ و بـابـێ كچان
زهێر كـۆرەمـاركـی
زارۆكێن فێقیێ ناڤ مالێنە، مال ب هاتنا زارۆكا شاد و بەختەوەر دبیت و خۆشی دكەڤیتە ناڤ وێ مالا زارۆك لێ هەین.
ئەڤچاچ ئەو زارۆكە كۆڕ بن یان كچ بن؟ هەر چەندە د خێزان و جڤاكێن مەدا با راپتر حەتا ژن ب خۆ ژی حەز ژ زارۆكێ كور دكەن ژ زارۆكا كچ، هەر چەندە ئەڤە نە ب دەستێ ژن و مێرایە، بەلكو ب دەستێ یەزدانی یە ئەو كۆڕ و كچان ددەت هندەكان ژ هەژی كۆران دبینیت و هندەكان ژی هەژی كچا و هندەكا ژی هەژی كۆڕ و كچان دبینیت و هندەكا ژی دهێلیتە بێ زڕیەت. ئەڤەژی ژ دان و كەرەما خودێ یە. لێ گەلەك زەلام یێن هەیین كرۆمۆسماتێن وی هەمی د مێنە بەس كچ دبن.
راستە زانست یێ پێشكەفتی نوكە دشێت بۆ ژنا زارۆكێن كۆڕ یان كچ پەیدا بكەت، لێ چێدبیت هندەك پرسێن حەرام و حەلالی و گەلەك تێچوونا پارەی تێدا هەبن، لەوا ژن و زەلام خۆ ژێ دوور دكەن. ئەمما كیژ باشترن كۆر یان كچ ئەو ل سەر رۆژگاری و پەروەردا دایك و باب و خێزان و قوتابخانێ و جڤاكێ دمینن! گەلەك جاران كۆڕ باشترن گەلەك جارێن دی ژی كچ باشترن هندەك جاران ئەو ناڤێ بابێ خۆ رادكەن، بەرز رادگرن هندەك جاران ژی كچ گەلەك باشتر ناڤێ بابێ رادكەن رادگرن. دێ باش بیت ئەگەر هوین گوهێ خۆ بدەنە ڤێ سەرهاتیێ:
دبێژن دو خێزان جیرانێن ئێكبوون، ئێكا بابێ حەفت كۆڕا بوو یا دی بابێ حەفت كچا بوو، بابێ كۆڕان دبێژیتە جیرانێ خۆ بابێ كچا ڤێ جارێ خێزانا تە چ بوو؟ ئەو دبێژیتی كچەك بوو، یێ دی دبێژیتێ پا خێزانا من كۆڕەك بوو، گۆتێ: ئەڤە تە حەفت كچ بوون من ژی حەفت كۆڕ، ئانكو (خێزانێن) مە. بابێ كۆڕان خۆ گەلەك قەبەدكر ب كۆڕێن خۆ، چەند بابێ كچا دیتبا دا بێژیتێ ها بابێ كچا.. تۆ چ دكەی؟ جیرانێ وی بابێ كچا گەلەك ب ڤێ گۆتنا وی توورەدبوو، لێ خۆ بێدەنگ دكر.
رۆژ هاتن و رۆژ چوون یێن زارۆكێن هەردوكا مەزن بوون، هەر ئێك چوو سەر ئاڤ و رزقێن خۆ، باب ژی بەر ب پیریێ ڤە چوون، هەر ئێكی ژ وان زارۆكێن خۆ دانە شوی و یێن دی ژن بۆ كۆڕێن خۆ ئینان، ئەو هەردو باب مانە د خانیێن خۆڤە، بتنێ كۆڕ جودابوون كچێن ئەڤێ دی ژی شوی ب هندەكا كرن و ژێك ڤەقەتیان. شەڤەكێ بابێ كۆڕان سەرا بابێ كچا دا چوو دەف ب گوندی ڤە، بەرێ خۆ ددەتێ یێ روونشتییە و خوارنەكا خۆش یا ل بەر و یێ دخۆت و جلكێن پاقژ و ب سەروبەر یێن ل بەر و مالا وی ب سەروبەر و لكێدای و گەلەكا پاقژە، حەسویدی پێ بر و گۆتێ: ئەڤە كی هۆسا چاڤێ خۆ ددەتە تە؟ ئەوی ژی گۆتێ: هەر رۆژ كچەكا من دهێتە دەف من سەرێ من دشۆت و ڤەدشۆت و كار و كۆكێ من دكەت و مالا من پاقژ دكەت و خوارنەكا خۆش بۆ بەرهەڤ دكەت و ئامانێن من دشۆت و پاشی دچیتە مالا خۆ، ئینا بابێ كچان گۆتێ: پا چاوا ئەو ڤێڕا دگەهیت؟ سەروبەرێ تەو زارۆكێن خۆ و مالا زەلامێ خۆ و تە ژی بكەت؟ وی گۆتێ :هەر حەفت كچێن من یا د ناڤبەرا خۆ دا لێكڤەكری، هەر حەفتییەكێ ئێك ژ وان بهێتە مالا من و چاڤدێریا من بكەن و خزمەتا من هۆسا دكەن.. ب راستی كچێن من نموونەنە.
ئینا بابێ كۆڕان ل دەف روونشتەخار و گۆت: بابێ كچان دنڤیت یێ گەرم و تێر و پاقژ و بابێ كۆڕان دنڤیت یێ برسی و ساڕ و جلك پیس، راستە كۆڕێ تە ناڤێ تە هەلدگریت، لێ كچا تە، تە ژی هەلدگریت و ناڤێ تە ژی ئها ئەڤە ژیانا بابێن كۆڕ و بابێن كچانە.
ڤێجا كەس ژ هەوە سەر خودێ كچ داینێ توورە نەبیت كو چ كچ نەداینێ؟ چ تشتێ خودێ بدەت یێ باشە، لێ پەروەردە دویڤچوون و تەعلیم لازمە دا ببنە كەسانێن باش و خزمەتا دایك و باب و خێزان و جڤاك و مللەتێ خۆ بكەن.
