بـه‌لێ هنارتیێ ئـه‌مـریكا راست دبێژیت
غیاس خـالد زێباری
(سه‌رۆك مه‌سعود بارزانی بۆ من مینا بابی یه)، ئه‌ڤه نەگۆتنا ئێتیمه‌كی یان هه‌ژاره‌كێ كورده كو ب دلۆڤانیا سه‌رۆك مه‌سعود بارزانی هه‌ست ب ئێتیمیێ یان هه‌ژاریێ نه‌كه‌ت، ئه‌ڤه گۆتنا هنارتیێ ئه‌مریكا(مارك ساڤایا) یه ده‌رباره‌ی سه‌رۆك مه‌سعود بارزانی، راسته ئه‌ڤه رسته‌یه‌كا زۆرا كۆرته لێ رامانه‌كا هندا مه‌زن دده‌ت كۆ رۆمانه‌ك ل سه‌ر بهێته نڤیسین. چونكی ئه‌مریكا زلهێزترین وه‌لاتێ جیهانێ یه و باندۆڕه‌كا كاریگه‌ر ل سه‌ر ئیراقێ و ده‌ڤه‌رێ هه‌یه، هنارتیێ ئه‌مریكا ژی بۆ ئیراقێ د ڤان كاودانان دا بریاره‌كا جهێ پسیارێ یه و نیشانێ ده‌سپێكا گوهۆرینێن سیاسی یه ل ئیراقێ، دیاره باندۆڕا راسته‌وخوه یا وه‌لاته‌كێ هه‌رێمی ل سه‌ر ئیراقێ ئه‌مریكا دلته‌نگ و بێزار كریه و ب ڤی هنارتیه‌ی ئه‌مریكا دڤێت بله‌ز ئیراقێ ژبن ڤێ باندۆرێ ده‌ربینیت و سه‌روه‌ریا وێ بزڤڕینیت. یا ژ ڤێ هه‌میێ گرنگتر ده‌مێ هنارتیێ ئه‌مریكا گۆتی (سه‌رۆك مه‌سعود بارزانی بۆ من مینا بابی یه و ئه‌ز زۆر حه‌ز ژێ دكه‌م) ئاماژه و دانپێدانا بهێزترین وه‌لاتێ جیهانێ یه ب سیاسه‌ت و پرۆژه و به‌رنامێن سه‌رۆك بارزانی یه ل سه‌ر ئاستێ ده‌ڤه‌رێ و ئیراقێ و كوردستانێ، رامانێ هندێ یه كو ب سیاسه‌ت و پلانێن سه‌رۆك بارزانی هه‌رێما كوردستانێ ژلایێ سیاسی و كارگێری و دبلۆماسی لسه‌ر ئاراسته‌یه‌كێ راسته و ب مرۆڤایه‌تیه‌كا پڕ دلۆڤانیێ هه‌می تاكێن جڤاكی دبینیت و ب چاڤێ بابینیێ سه‌ره‌ده‌ریێ ل گه‌ل دكه‌ت. د ڤێره‌دا دبێژینه به‌رێز هنارتیێ ئه‌مریكا بۆ ئیراقێ سۆپاس بۆ ڤێ تێگه‌هشتنێ ل سیاسه‌ت و به‌رنامێن سه‌رۆك بارزانی و ئه‌گه‌ر بۆ ته مینا بابی بیت بۆ خه‌لكێ كوردستانێ باب و په‌روه‌رده‌كار و رێبه‌ر و سه‌روه‌ره .
ژلایه‌كێ دیتر ئه‌ڤ داخۆیانیا مارك ساڤایا بانگه‌وازیه‌كه كۆ گه‌لێ كورد ب هه‌بوونا سه‌رۆك بارزانی خودان پشته‌ڤانیه‌كا مه‌زنه و پاشه‌رۆژه‌كا گه‌ش چاڤه‌رێیه. پێدڤی یه ئالیێن سیاسی یێن كوردستانێ ب تایبه‌ت هه‌ڤڕێن پارتی خوه دڤێ گۆتنا هنارتیێ ئه‌مریكا بگه‌هینن و مه‌زناهیا سه‌رۆك بارزانی و پارتی دیموكراتی كوردستان بگه‌هینن و بزانن كۆ ئه‌و فاكته‌رێن مانه‌ڤه و بهێزبوونا كوردستانێ نه و خه‌لكێ كوردستانێ زێده‌تر ل هه‌ر جاره‌كێ ل ڤان هه‌لبژارتنا ده‌نگ ب لیستا 275 یا پارتی دیموكراتی كوردستان بده‌ت، داكو ببیته په‌یامه‌ك بۆ هنارتیێ ئه‌مریكا كو سه‌رۆك بارزانی بۆ مه هه‌میان مینا بابه‌كێ دلۆڤانه و ب هه‌بوون و ژبن سێبه‌را وی هه‌ست به‌خته‌وه‌ریێ و ئارامیێ و پێكڤه ژیانێ دكه‌ین.