بـەردەوامیا بـزاڤـا ڕزگـاریخوازیا كـوردی
هـۆشمەنـد جـەوهـەر
پرۆسێسا ستاندنا مافێن گەلان ژ داگیركەران ب دو ئاوایان دهێتە ئەنجام دان، پرۆسێسەكا سیاسی ب رێكێن یاسایی، یان پرۆسێسەكا سیاسی ب رێكێن چەكداری، هەلبەتە ژ بۆ گەهشتن ب ئارمانجێ هەردو رێك دهێنە بكارئینان، ل گۆرەیی قۆناغێ و پێدڤیێن دەمی، هەروەسا هەردو رێك رەوا و دروستن، رێكەك یا دن ژناڤنابەت.
هەرێما كوردستانێ دەستپێكی ب خەباتا چەكداری دەسپێكرد پشتی چەندین شۆرش و خەباتێن ئێك ژ دویڤ ئێك دەست ب ڕێكێن یاساییكرن ژ بۆی گەهشتن ب ئارمانجێ ب دەستڤەئینانا كوردستانەكا ئازاد، هەروەسا ل رۆژئاڤایێ كوردستانێ ژی پشتی بزاڤ و خەباتێن چەكداریا كوردی كار دهێتەكرن ب رێكێن یاسای و دانوستاندنا مافێن كوردان بهێتە بدەستڤە ئینان.
د سەد سالیا بیستێ دا ب شێوەیەكی بەردەوام بزاڤا رزگاریخوازیا كوردی هەبوویە ب تایبەتی ل باشۆرێ كوردستانێ كار دهاتەكرن بۆ ب دەسڤەئینانا مافێ ڕەوا یێ كوردان، هەروەسا ب چەندین هەول و فشارێن بەردەوام پێكۆل دهاتنەكرن بۆ ئەڤێ چەندێ كو قەوارەیەكا سیاسی یا كوردی بهێتە بدەستڤەئانین.
د ڤی دەمی دا چەندین شۆڕش هاتنەكرن كو شیان كوردستانەكا ئازاد دروست بكەن، چەندین شۆرش و خەباتێن چەكداری هاتنە كرن هەتا ئازادی ب دەست ڤا ئانیە ئەوژی شۆرشا ئەیلول و گولان بوو، چەندین كارەسات ب سەر كوردان هاتن وەك كۆم كوژی و ئەنفال و چەندین كارەساتێن دیترێن كوردان بوون، ئەڤ هەمی قوربانییە بوونە ئەگەرێ دروستبوونا هەرێما كوردستانێ ب ئازادی، خەباتا چەكداری ڕۆلەكێ مەزن هەبوو بۆ بدەستڤەئینانا ئازادیێ، هەروەسا دوژمنێن كوردان گرنگی ب ژمارەیا قوربانی و زەرەرمەندبوونا گەلێ كوردان نەددا ئەو د بەرهەڤ بوون ب جینۆسایدكرن و راگوهاستنا كوردان بۆ باشورێ ئیڕاقێ بۆ نەهێلانا شۆناسێ كوردی ئەوا گرنگ ل دەف وانا نەهێلانا كورد و بزاڤێن كوردان بوون، هەروەسا بزاڤا ڕزگاریخوازییا كوردی، خەباتا بەردەواما كوردان ئەنجامەكا باش هەبوو بۆ بدەستڤەئینانا هەرێمەكا كوردی یا ئازاد كو ب شێوەیەكێ سەرەكی ل دەستوورێ ئیراقێ مافێ كوردان یا هاتیە دەستەبەركرن، هەروەسا كوردان دەسهەلاتەكا تەمام یا هەی بۆ بڕێڤەبرنا هەرێما كوردستانێ.
رۆژئاڤایێ كوردستانێ پشتی چەندین سالێن شۆرش و خەباتان د دەمێ نوكە دا خەباتا چەكداری یا بۆراندی تشتەكێ دروستبووی ل فۆرمێ حوكمڕانییا ناڤچەیی ل ناڤ سیستەمەكێ سیاسی نەمەركەزی، كو دەسهەڵاتا سێنتەر ب تەمامی یا لاواز و بێهێزە.
بەلێ هەیا نها ژی پێدڤی ب هێزەكا سەربازیا تۆكمە هەیە بۆ بەرگریكرن ل هەر بۆیەرەكا سەربازی.
ئەوا ل سەر پارتێن كوردی پێدڤیە لە رۆژئاڤایێ كوردستانێ نیشادانا مۆدێلەكا حزبایەتی و دەسهەڵاتداری و كاركرن و ڕێڤەبرنەكا دیموكراسی و دادپەروەر و مافپارێز و ئەخلاقییە، كو ل سەرجەم ناڤچەیێن كوردی كار بكەت.
هەر وەسا ل ٢٦ نیسانێ كۆنفرانسا ئێكریزی و ئێك هەلوەستیا كوردان هاتە گرێدان و كار بۆ دروستكرنا چارەسەرەكا دادپەروەر دهێتە كرن بۆ پرسا كوردێن سووریێ، پالپشتیا دەستوورەكی بكەن كو پالپشتیا ئاسایش و ئارامی و پێكڤەژیانێ بكەت، پێكئینانا شاندەكا هەڤپشك بۆ دانوستاندنی ل گەل دیمەشقێ بۆ بدەسڤەئینانا مافێ كوردان.
ئەڤە ژی ڕۆناهییەكا دیترە بۆ كوردان بۆ هندێ ل ڕۆژئاڤایێ كوردستانێ ب شێوەیەكێ ئازادانە بژین و مافێن خۆ بدەستڤە بئینن.
هەروەسا یا گرنگە ل رۆژئاڤایێ كوردستانی مفا ژ ئەزموونێ باشورێ كوردستانێ بهێتە وەرگرتن، كار بهێتەكرن بۆ زامنكرنا مافێ كوردان ل سووریێ، پێدڤیە مافێ كوردان د دەستووری دا بهێتە دان، پارێزگاری ل دەسهەڵاتا نوكە بهێتە كرن، گرنگە زمان و كولتۆر و شۆناسێ كوردان بهێتە پاراستن، سێكتەرێن خزمەتگوزاریا گشتی وەك ساخلەمی و پەروەردە بۆ كوردان بهێنە دابین كرن.
گرنگە ژی كورد ئێكگرتی و ئێك هەلوەست بن هەتا خزمەت ب بزاڤا كوری بكەن، كورد ب دروستی كار بكەت بۆ پاراستنا دەسهەلاتا خۆ، پێدڤییە هەمی لایەنێن كوردی ئێك هەلوەست بن و گرنگ نیە ئێك ئایدۆلۆژیەت بن گرنگ ئەوەیا قەوارەیەكا سیاسی یا كوردیا گرنگ دروست بكەن.
دەسهەلاتا كوردی یا ڕۆژئاڤا كار بكەتن بۆ پاراستنا سامانێ سروشتی پاراستنا كێلگەهێن نەفتێ دبن دەسهەلاتا خوەدا هەروەسا گرنگی دان ب كەرتێ كشتوكالی كو ژێدەرێ سەرەكی خوارنا سووریێ یە ژ لایێ سیاسەتا ئابووری جهێ گرنگیدانێ یە.
