بكارئینانا مادێن هۆشبەر گەهشتیە ئاستەكێ مەترسیدار
هەولێر، قائید میرۆ:
بەرپرسەكێ حوكمەتا هەرێما كوردستانێ لدۆر بكار ئینان و بازرگانیێ ب مادێن هۆشبەر هۆشداریێ ددەت و ئاماژەكر، بكار ئینان و بازرگانی كرن ب مادێن هۆشبەر بوویە مەترسی لسەر جڤاكێ هەرێما كوردستانێ و نێزیكە ژ دەستدان دەركەڤیت و بشێوەیەكێ زۆر مەترسیدار بەر بەلاڤ ببیت هەروەسا دبێژیت، خەلكەكێ زۆر بووینە قوربانی و پێدڤی ب چارەسەركرنێ هەیە ژلایێ حوكمەتا هەرێما كوردستانێ.
ئەمیر عوسمان، رێڤەبەرێ پێكڤەژیانێ ل حوكمەتا هەرێما كوردستانێ بۆ رۆژناما ئەڤرۆ دیاركر” بكار ئینانا مادێن هۆشبەر بابەتەكێ جیهانیە و نوكە ل هەموو جیهانێ دهێتە بكارئینان، مخابن مە دخواست بكار ئینان و بازرگانی كرن ب مادێن هۆشبەر ل هەرێما كوردستانێ حالەت هەبن نەك ببیتە دیاردە، ب رێیا دەزگەهێن ئەمنی و ئاسایش و پۆلیسانڤە خەلك دهێتە دەستەسەركرن و هژمارا كەسێن مادێن هۆشبەر بكار دئینن و بازرگانیێ دكەن د زێدەبوونێ دایە، ئەم هەموو دزانین جڤاكێ كوردستانێ جڤاكەكێ پاقژ بوویە و دویربوویە ژ هندەك تاوانێن وەكی بكار ئینانا مادێن هۆشبەر خەلكێ مە هەتا رادەیەكی رەوشت و تیتالێن خوە پاراستینە و پێگیری هندەك بنەمایێن ئاینی و جڤاكیە، هەتا مە وەكی حكوومەت نەڤیایە لسەر ئەڤی بابەتی پاخڤین، بەلێ ئەم دبینین مادێن هۆشبەر مەترسیە لسەر جڤاكێ مە وەكی هەرێما كوردستانێ و ئەركێ هەموو كەسەكیە كار بكەت بۆ نەهێلانا ئەڤێ تاوانا ب رێیا مادێن هۆشبەر دهێتە ئەنجامدان، چونكە ئەگەر بەری نوكە و سالێن بۆری هەرێما كوردستانێ تنێ وەكی ترانزێت بۆ ڤەگوهاستنا مادێن هۆشبەر هاتبیتە بكار ئینان، لێ نوكە مە بڤێت و نەڤێت بوویە دیاردە و هژمارەكا زۆرا خەلكی تووشی مادێن هۆشبەر بووینە، ئەم دەستخۆشیێ ل دەزگەهێن ئاسایشێ دكەین، كو رۆلەكێ مەزن هەیە بۆ پاراستنا خەلكێ كوردستانێ و دەستەسەركرنا وان كەسێن مادێن هۆشبەر بكار دینن یانژی بازرگانیێ دكەن، ئەگەر ئەو رێگریێن دەزگەهێن پەیوەندیدار نەبان ئەڤە گومان تێدا نینە رێژە دا گەهیتە ئاستەكێ مەترسیدار.
ئەمیر عوسمان گۆتژی” وەلاتیێن هەرێما كوردستانێ ژی هاریكاربووینە دگەل دەزگەهێن ئەمنی بۆ گرتنا مادێن هۆشبەر، بەرۆڤاژی دیاردەیا بكار ئینان و بازرگانیێ ب مادێن هۆشبەر یا بەرەف زێدەبوونێ دچیت و شێم بێژم نێزیكە ژ دەست دەركەڤیت و بشێوەیەكی زۆرێ مەترسیدار بەر بەلاڤ ببیت دناڤا جڤاكی دا، ئەركێ وەزارەتا ساخلەمیە ژبۆی كەسێن مادێن هۆشبەر بكار د ئینن سەنتەرێن چارەسەركرنێ ڤەكەت و خەلك بهێتە دویركرن ل مادێن هۆشبەر، ژبەركو هندەك خەلك بێی حەزا تووشی بكارئینانا مادێن هۆشبەر بووینە، ئەو كەسێن تووشی مادێن هۆشبەر دبن ب پلا ئێكێ دبنە قوربانی و پێدڤی ب ڤەدیتنا چارەسەریێ هەیە ژلایێ حوكمەتا هەرێما كوردستانێ، ئەگەر سینورەك بۆ نەهێتە دانان ئەڤە پاشە رۆژا مللەتێ دێ بكەڤیتە مەترسیەكا مەزندا، بەلێ نابیت حوكمەتا ل وان كەسانژی بۆریتی ێن بازرگانیێ ب مادێن هۆشبەر دكەن و بەرۆڤاژی دڤێت سزایێن دژوار یێن قانوونی بۆ هەبن.
