بكڕێن گولان ل هەموو وەرزێن سالێ هەنە
سندس سالح سلێڤانەیی:
میلاد خان، خانمەكا گولفرۆشا خەلكا دهۆكێ یە، ژ سالا 2017 وەرە كارێ فرۆتنا گولان دكەت و ب گۆتنا وێ ل هەموو وەرزێن سالێ بكڕێن گولان هەنە، ب تایبەت ژی ل هەیڤا شواتێ و هەرسێ وەرزێ بهارێ و خەلكێ دهۆكێ گەلەك حەزژ گولا رۆز دكەن.
ناڤهاتیێ، د دیدارەكێ دا بۆ رۆژناما ئەڤرۆ گۆت: پتریا دەستكێن گولان ل دووف داخوازیان دهێنە چێكرن و گول هەنە ب پازدە خۆلەكان حازردبن و هەنە پتر ژی و ئەڤ چەندە ل دووف جۆرێ دیزاینێ دمینیت.
هەروەسا گۆت: ژبەركو من حەزژ چاندن و چاڤدانا گولان دكر، هەروەسا بۆ من وەكی كارەكی ژی بوون و داهاتەك بۆ مالا من ژێ دهێت، لەورا من دەستپێكر و گول و كەرستەیێن وان بۆمە ژ (هولەندا و چینێ) دهێن و هەردەم ئەز دبێژم هەركەسەكێ یان كەسەكا حەزژ كارێ فرۆتنا گولان بكەت پێدڤیە ل دەستپێكێ د ناخێ خوە دا یێ جوان بیت، هەروەسا یێ شارەزابیت د دیزاینێ دا دا بشێت بەردەوامیێ پێ بدەت و سەركەڤیت.
