بلا ئه‌ڤ ئاخه نه ئه‌ڕنیت، دێ ڤان پیرۆزیا بۆ كێ هێلن!
بێ خش، تشتێ ژ هه‌میان خرابتر كو مرۆڤ د ژیانا خۆ دا هه‌ڤرویش دبیتێ شه‌ڕه، شه‌ڕ ژی یێ بێ مروه‌ته، گه‌له‌ك جارا به‌ری ل سه‌ر به‌ری ناهێلیت. داعش ژی مۆدێله‌كا نوی یا شه‌ڕییه، كو خه‌لكێ كوردستانێ ب هه‌می ته‌خێن خۆ هه‌ڤرویش بوویێ، ده‌رده‌سه‌ری ب سه‌رێ ڤی خه‌لكی هاتینه، چیرۆكێن دلئێش خه‌لكی دناڤ بیردانكا خۆ دا قه‌یدكرینه.
به‌ری داعش بهێت، ل وێ رێڤه‌به‌ریا ئه‌ز لێ شۆل دكه‌م، (7) برا و خوشكێن كریستیان د گه‌ل مه دا بوون، هه‌رئێكی ژی ل دویڤ شیان و سالۆخه‌تێن خۆ شۆل دكر، ئانكو ژیان ل رێڤه‌به‌ریا مه وه‌كی پێكڤه‌ژیانا ل كوردستانێ بوو. چ پێڤه نه‌چوو دیتنا من دیتی ئه‌ڤه چوو، وێهه‌نێ چوو ده‌رڤه، ئه‌وێ هه‌نێ ژی چوو فره‌نسا، نوكه ژ وان هه‌ر حه‌فتا، بتنێ سێ یێن ماین، هیڤیدارم بنه‌تارا وان ژی وه‌كی یێن دی لێ نه‌هێت.
مه‌زن دبێژن: هه‌ر به‌ره‌ك ل جهێ خۆ یێ ب قه‌دره. به‌لێ هه‌روه‌كی مرۆڤێ ڤێ ئاخێ زوی ب زوی ب قه‌درێ خۆ ناحه‌سیێت یان ژی مۆدێلێن وه‌كی داعشێ ناهێلن ئه‌ڤ مرۆڤه ب خوشی و له‌زه‌ت دناڤ ئه‌ردێ خۆ دا بژیت. ژلایه‌كیڤه مرۆڤ دبێژیت بلا حه‌قێ وانه بلا بچن، ده‌مێ هزرا مرۆڤی ل وان ده‌رده‌سه‌ری و خۆلیسه‌ریێ دهێت ئه‌وا بسه‌رێ وان هاتی، مانێ مرۆڤی عه‌مره‌كێ هه‌ی، دڤێت هه‌ر چ نه‌بیت ته‌نا بژیت، ژلایه‌كێ دیڤه ژی مرۆڤ دبێژیت: ما دێ ڤێ ئاخێ بۆ كێ هێلن!.
به‌لێ هنده‌ك تشت یێن هه‌ین، دڤێت مرۆڤ هه‌ڤڕكیێ ل سه‌ر بكه‌ت، ده‌ستا نه‌داهێلیت، نه‌خاسمه ده‌مێ تشته‌ك ژ مرۆڤی دهێت. پرسیار ئه‌وه ئه‌رێ كریستیان د حه‌قن ڤی واری بهێلن، ئه‌رێ د حه‌قن وان پیرۆزیا ئه‌ڤێن ل سه‌ر ڤێ ئاخێ هه‌ین پشتگوهڤه پاڤێن!، ئه‌زێ ل هزرێ هه‌ڤڕكیێ ل ڤێرێ رامانا خۆ یا هه‌ی، به‌لێ چاوا و بۆچی.
هه‌كه ئه‌م چاڤخشاندنه‌كێ د دیرۆكا كریستیانان ل ڤێ ده‌ڤه‌رێ بكه‌ین، دێ بینین كو هه‌ر ژ سه‌روه‌ختێن كه‌ڤن كریستیان ل ڤێرێ هه‌بوون، دیرۆكا وان بۆ هزاره‌ها سالا دزڤریته‌ڤه، په‌رستگه‌هـ و باژێر و گوندێن كه‌ڤن ل سه‌ر ڤێ ئاخێ هه‌نه، مینا گوندێن كریستیانان ئه‌وێن ل ده‌ڤه‌را به‌هدینا هه‌ین، زێده‌باری په‌رستگه‌هێن وان ئه‌وێن ل ده‌ڤه‌رێ پێشچاڤێ مرۆڤی دكه‌ڤن، مینا: دێرا مارهورمزی ل ئه‌لقۆشێ، كو دێره‌كا مه‌زن و به‌ركه‌تییه، گه‌له‌ك ژ كه‌ڤن وه‌ره كریستیانان په‌رستن و رێوره‌سمێن دینی لێ برێڤه‌برینه، جهه‌كێ گه‌له‌ك پیرۆزه ل ده‌ڤ وان. به‌ری نوكه ژی كریستیانێن ده‌ڤه‌رێ هه‌ڤرویشی ئێرش و كۆته‌كیێ بووینه، مینا ئێرشێن میرێ كوره بۆ سه‌ر ئه‌لقۆشێ، زێده‌باری ئێرشێن هێرڤه و هۆڤه. به‌لێ كریستیانێن وێ ده‌ڤه‌رێ هزر د به‌ردانا وارێ خۆ دا نه‌كربوو، به‌رده‌وام ئه‌و وارێ دهاته وێرانكرن، ب زند و باسكێن خۆ ئاڤادكرڤه.
نوكه و پتر ژ هه‌روه‌خته‌كێ دی، كریستیان یێ مشه‌ختی ده‌رڤه دبن، هه‌رۆژ چه‌ند مالباته‌ك یێ ژ تخویبی ده‌رباس دبن، ئه‌م لۆمه ناكه‌ین، چنكی دوژمنێ وان گه‌له‌كێ پیسه!. به‌لێ هه‌كه هاتوو چ كریستیان ل ڤێرێ نه‌مان، دێ چ چێبیت، ئه‌رێ هه‌كه سوبه‌هی ته‌ڤپرسی هاته كرن، ئه‌و ده‌ڤه‌ره دێ چ بریارێ ده‌ن، ئه‌رێ كریستیان پشكه‌كا ره‌سه‌نن ژ خه‌لكێ كوردستانێ ب نه‌بوونا وان دێ ته‌ڤنێ مرۆڤاهیێ ل كوردستانێ چ لێ هێت، ئه‌رێ ما جانیا كوردستانێ د ته‌ڤنێ وێ یێ مرۆڤاهی و پێكڤه‌ژیانێ دا نینه. ژبه‌ر ڤێ چه‌ندێ دڤێت ب چ ره‌نگا كریستیان مشه‌ختی ده‌رڤه نه‌بن، ڤان پیرۆزیا ئه‌وێن هزاره‌ها ساله د پارێزن، به‌رده‌وام ب پارێزن، وان گوند و باژێركا بۆ كه‌سێ نه‌هێلن و نه‌هێلنه به‌ردای، هه‌ڤڕكیێ ل سه‌ر پیرۆزیێن خۆ بكه‌ن، به‌ردانا ڤێ ئاخێ به‌ردانا دیرۆك و كه‌لتۆر و ژیانا هزاره‌ها سالایه.
