بلا قوربانی ل به‌ر چاڤێن وه بن
مله‌تێ كورد د دیروَكێدا به‌رده‌وام كه‌ڤتیه به‌ر لێهمشتێن تورك و عه‌ره‌ب و فارسان، ئه‌ڤ هه‌ر سێ نه‌ته‌وه ل دژی ئێكن، لێ به‌رامبه‌ر كوردان برایێن ده‌یبابینه چ ب رێیا پیلانان بیت، یان ب هه‌ر ره‌نگه‌كێ بیت، ده‌مێ كورد دگه‌هنه قووناغێن سه‌ركه‌ڤتنێ و ئێك دگرن و دبنه ئێك ده‌نگ، گه‌له‌ك ب ساناهی ئه‌ڤ هه‌رسێ وه‌لاته دێ ئێكده‌نگیا ئێك ده‌ن.
گه‌له‌ك جاران ب هێزا چه‌كی و گه‌له‌ك جاران ژی هه‌ر سێ وه‌لات د ناڤ خوه دا وه‌كو فلمه‌كی ئه‌كته‌ران دروست دكه‌ن و هه‌ر ئێكی ده‌ورێ وی دده‌نێ كا ب چ ره‌نگ بچیته د ناڤ ناخێ ڤان پارتیێن سیاسی یێن كوردستانێ و دوبه‌ره‌كیێ د ناڤبه‌را وان دروست بكه‌ن، هه‌ر وه‌لاته‌ك ژی پشتا لایه‌كی بگریت. ب نه‌په‌نی ڤه ژی پلان یا هه‌رسێیان پێكڤه‌یه.
بۆ میناك ده‌مێ شه‌رێ ئیرانێ و عیراقێ كو رۆژانه ب هه‌زاران كه‌س دهاتنه كوشتن، هه‌روه‌سا به‌عسیێن عیراق و سووریێ ژی دژاتیه‌كا مه‌زن هه‌بوو، لێ توركیا و ئیران و سووری و عیراقێ كو كۆمبوونێن وان یێن چار قۆلی د به‌رده‌وام بوون ل سه‌ر كوردان و هه‌ر چار وه‌لات ئێكده‌نگ بوون، نوونه‌رێ عیراقێ بوَ ڤان كۆمبوونان نه‌شیان ل گه‌ل ئیرانێ كۆم ببیت ژبه‌ركو شه‌رێ وان بوو، دا نوونه‌رێ به‌عسیێن سووری كه‌ته یێن خوه ژی بۆ وان كۆمبوونان و مله‌تێ مه‌ژی وه‌كو پارتێن سیاسی ڤان كاران هه‌میان دزانن، به‌لێ بخوه ناكه‌نه خه‌م و خوه تێناگه‌هینن و سه‌ربوَران ژی ژبیر دكه‌ن، ڤان كاودانێن نوكه مله‌تێ كورد تێدا دژین و ڤان ده‌لیڤێن زێرین بۆ مله‌تێ هه‌لكه‌ڤتین كو مه‌زنترین هێزێن دونیایێ پشته‌ڤانیا مله‌تێ كورد دكه‌ن ئه‌ڤرۆ ناڤێ كوردان د ناڤ وه‌لاتێن دونیایێ دا ب شرینی به‌لاڤ بوویه.
لێ جهێ داخێ یه سه‌ركردێن سیاسی یێن كوردستانێ ژبۆ به‌رژه‌وه‌ندیا پارتایه‌تیا به‌رته‌نگ جاره‌كا دی ڤان ده‌ستكه‌ڤتان مه‌ترسیدار دكه‌نه ڤه و هه‌كه به‌ری خوه بده‌ینه دیروَكێ ژی هه‌ر جار گه‌هشتینه قووناغێن دووماهیێ دوباره ب پلانێن دوژمنان مله‌تێ مه ته‌به‌سه‌ر كریه ڤه.
ئه‌ڤا نوكه د ناڤبه‌را پارتێن سیاسی یێن كوردستانێ دا دبیت ئه‌جیندایێن سیاسی یێن ئه‌قلیمی ل پشتن و دیسا پارتیێن كوردێن باكۆر و رۆژئاڤا وانژی خوه كریه پشكه‌ك بوَ تێكدانا ره‌وشا كوردستانێ.
هه‌ر لایه‌ك یێ دیتر گونه‌هبار دكه‌ت و هه‌می پارتی دگونه‌هبارن، بلا چ پارت ژی وه‌سا حساب نه‌كه‌ن كو دێ د سه‌ركه‌ڤتی بن د ڤان كاودانان دا ب تنێ و ب تنێ یێ سه‌ركه‌ڤتی فارس و تورك و عه‌ره‌بن، ئه‌ڤ قوربانیێن هاتینه دان د ناڤ سالێن بۆریدا دێ هه‌می ب هه‌ر وه چن و دوباره پرتووك ل سه‌ر ڤان كاودانا بهێنه چێكرن و ببنه بیرهاتن وه‌كو شۆره‌شێن كه‌ڤن.
ئه‌ڤجا هه‌كه سه‌ركردێن سیایێن كوردستانێ دوور ژ به‌رژه‌وه‌ندیێن پارتایه‌تی هزر بكه‌ن و ب تنێ پێنج ده‌قیقان چاڤێن خوه بنقینن و گوندێن وێرانكری و ئه‌نفال و كیمیاباران و هزار قه‌هره‌مانان گیانێ خوه گۆری ڤی وه‌لاتی كری و ڤان پێشمه‌رگێن زه‌ندك پیلا كو ل گه‌رم و سه‌رمایێ، ل به‌ر سینگێ مه‌زنترین دڕنده شه‌ڕی دكه‌ت بیننه پێش چاڤێن خوه، باوه‌ردكه‌ین دێ هه‌می پێ ل به‌رژه‌وه‌ندیێن پارتایه‌تی دانن و دێ به‌رژه‌وه‌ندیا مله‌تی ل سه‌ر هه‌میان بیت وی ده‌می پیلانێن دوژمنان فایده ناكه‌ن دێ ئێكده‌نگ بین و دێ گه‌هینه وێ ئارمانجا كو گه‌نجێن كوردستانێ خوه بۆ كریه قوربانی.
