بلا كۆچا ملیۆنی بمینیت ئەو ئاگر و چرایێ هەردەم گەش
محەمەد ئیبراهیم ئامێدی
ل ٢٨/٣/١٩٩١ پشتی سەرهلدانا مللەتێ كورد یا پیرۆز، ل ٥/٣/١٩٩١ كۆچا ملیۆنی دەستپێكر و چریسكێن وێ ڤەدان و هەلدان ل سەرانسەری هەرێما كوردستانێ، و ژبەر غەدر و تاوانان و ستەمكاریا رژێما گۆر ب گۆر و مەترسیا بكارئینانا چەكێ كیمیاوی ل دژی كوردان ل دەڤەرێ وەكو باژێرێ حەلەبجەیا شەهید. هێزێن سۆپایێ ئیراقێ دەست ب هێرشان كرن ل سەر باژار و باژێركێن كوردستانێ، بكارئینانا فرۆكەیێن هێلیكۆپتەر و دەبابە و تۆپخانەیان، جەماوەرێ كوردی ئانكو مللەتێ كورد نەچاربوو بەر ب دەولەتێن هەڤسوی ڤە بچن، ب ملیۆنان كەس و ب سەدان كیلۆمتران وەك پەیادە ل ژێر سەقایەكێ سەقەم و بارینا بەڤر و بارانان و ب سەدان بوونە قوربانی هەتا گەهشتینە جهێن پێدڤی و تایبەت و ئارام. كۆچا ملیۆنی وژدانا خەلكێ جیهانێ هەژاند و لڤاند و هشیاركرن، ب هیڤیا سەركەفتنێ و ئاشتیێ بۆ مللەتێ كورد، لەورا خەلكێ وان دەولەتا هاتنە هەوارێ و دەستێ هاریكاریێ بلندكر و درێژكر و رێكخراوێن مرۆڤایەتی ژی و پزیشكێن بێ سنوور ب رۆلێ خۆ یێ مرۆڤایەتی رابوون و فرۆكەیێن تایبەت یێن هەڤپەیمانا ئاهێن خوارنێ و كەل و پەلێن پێدڤی ل ئەسمانان بۆ هاڤێتن و خەلكانەك ل سەر ئاستێ جیهانێ سەرەدانا كۆچبەران و خیڤەتگەها كرن ل وان دەولەتا وەك تركیا و ئیرانێ و سووریا. و بریارا ژمارە ـ (٦٨٨ ) ل ٥/٤/ ١٩٩١) ـ ژ جڤاتا ئاسایشا نەتەویێن ئێكگرتی دەركەفت، ل پەی بڕگەیا حەفتێ ژ مادێ سێ یێ میساقێ نەتەویێن ئێكگرتی و یا پێكهاتی بوو ژ (٧) حەفت خالان كو هەمی كارێن نەمرۆڤایەتی یێن رژێما ئیراقێ رسواكرن و ل زووترین دەم بەرنامەیێ هەوارهاتنی و هاریكاریێ دەستپێكەن و ل سەر ئاستێ جیهانێ دەنگوباسێن ڤێ كۆچا ملیۆنێ ل سەر شاشەیێن تەلەفزیۆنان و بنگەهێن راگەهاندنێ و گۆڤار و رۆژنامەیان هاتنە بەلاڤەكرن. ئەڤرۆ (٣٥) سال بۆرین ل سەر كۆچا ملیۆنی، بلا ئەو سال ببنە سەربۆر و پالدەر بۆ بەرەف مۆكۆمكرنا ئێكگرتنا مللەتێ كورد ب ئێكرێزی و ئێك دەنگ ل بەرانبەری هەر قەیرانەكێ و ئاریشەكێ و بارودۆخەكی، كو ئەم سەرفەرازین و سەربلندین ب رۆلێ سەرۆك مەسعود بارزانێ یێ مێژوویی و پیرۆز و بەردەوام یێ دیار و ئاشكەرایە د ڤی بیاڤی دا. كۆچا ملیۆنێ بلا ببیتە پەرتۆك و وانە وەك شۆرەشەكا كوردی سەركەفت و ئەنجام ئینان ب تەڤایا تەخ و جینێنن كورد و كوردستانیان ڤە. ل دوایی و ب ڤێ هەلكەفتا پیرۆز هیڤیدارین كوردستان د ڤێ قووناغا نوكە دا یا شەڕێ سێ قۆلی ـ ئەمەریكا ـ ئیسرائیل ـ ئیران، ب سەركەفتن و سەرفەراز دەركەڤیت و پاراستنا دەستكەفتیێن مللەت و حوكمەتا هەرێما كوردستانێ. سەخمەراتی كوردستانەكا ئازاد و سەربەخۆ و سەربەست، ئەڤجا بلا كۆچا ملیۆنی بمینیت، ئەو ئاگر و چرا یێ هەردەم هەل و گەش د ناڤ مە دا.
