بلا وانەیا وەرزشێ نەبیتە یەدەك
نەهلا ئەحمەد
پشتی دەرگەهێن قوتابخانەیان هاتینە ڤەكرن و قوتابی بەر ب قوتابخانێ چووین ئەم دزانین وانەیا وەرزشی ئێك ژ وانەیێن گرنگە لێ مخابن هەر لدەستپێكا دروستكرنا خشتەیێ حەفتییانە ژلایێ هندەك ڕێڤەبەران ڤە وانەیا ناڤهاتی یان دێ كەنە وانەیا ئێكێ یان ژی وانەیا دووماهیێ ئانكۆ گرنگیێ پێ نادەن ژبەركۆ ل وانەیا ئێكێ تاكو قوتابی هەمی خۆ بگۆهڕن و جلوبەرگێن وەرزشی بكەنە بەرخۆ نێزیكی 10 خۆلەك دەربازبن و وانە 40 خۆلەكە ئانكو 30 خۆلەك دمینن، براستی د 30 خۆلەكان دا مفایەكێ زورێ كێم دێ گەهیتە قوتابیان، ل وانەیا دووماهیێ ژی دڤێت ماموستایێ وەرزشی نێزیكی 10 خۆلەكێن دووماهیێ بدەتە قوتابیان كو خۆ بەرهەڤبكەن بۆ چووونا ماڵ ئانكو د وێ وانەیێ ژی دا هیچ مفایەك ناگەهیتە قوتابیان ئەڤچا لڤێرێ یا پێدڤیە ڕێڤەبەرییا پەروەردێ دۆڤچوونا خشتەیێ هەر قوتابخانەیەكێ بكەت و نەهێلن وانەیا وەرزشی ل وانەیا ئێكێ و دووماهیێ بهێتە دانان، دیسان پێدڤیە ماموستایێ بابەتێ وەرزشی رولێ خو ببینیت و چ رەنگا رازی نەبیت وانەیا ناڤهاتی ل وانەیا ئێكێ و دووماهیێ بهێتە دانان یان ژی وەك یەدەك بهێتە هژمارتن، ئەگەر ماموستا خۆ نەرازیبكەت رێڤەبەر وێ خەلەتیێ ناكەن، خالەكا دی یا گرنگ كو ماموستایێ وەرزشێ دڤێت گرنگیێ ب وانەیا خۆ بدەت نە هەر ماموستایێ وانەیەكا دیتر بێژیتێ تو وانەیا خۆ نەكە ئەز دێ وانەیا تەكەم ژ بەركۆ وانەیا من یا گرنگە یان ئەز گیرو بوویمە دڤێت پەرتوكێ بدووماهیك بینم ژ بەر ئەزمۆنان، دڤێت ماموستایێ وەرزشی گرنگیێ بدەتە پەرتوكا وەرزشی و وانەیا خۆ نەدەتە ماموستایێ وانەیەكا دی ژبەركو وانە و بابەتێن وەرزشی چ وانە و بابەتێن دی كێمتر نینە. ب خوشحالیڤە ژ لایێ وەزارەتا پەروەردێ ڤە پەرتوكا وەرزشی ب جوانترین شێوە هاتیە دروستكرن وئەگەر ئەم بهێن و دووڤچوونەكێ بكەین ل وەلاتێن پێشكەفتی وانەیا ناڤبری ژ هەمی وانەیان گرنگترە و پتری هەمیان گرنگی پێ دهێتەدان ئەڤچا بلا لدەفمە ژی گرنگ بیت و مامۆستا ب شێوەیەكێ باش راهێنانێن هەر یاریەكێ نیشا قوتابیان بدەت و قوتابیان بشێوەیەكێ ئەكادیمی فێری هەر یارییەكا وەرزشی بكەت بەلكو نەك ببیتە وانا وی ئەو بێژیتە قوتابیان دێ قوتابخانێ پاقژ كەین بەروڤاژی دشێت دگەل راهێنانێت خو گەرمكرنێ ئێك خولەك بكاربینیت بۆ پاقژییا گورەپانا قوتابخانێ، ئەگەر گورەپانا قوتابخانێ یا بویاغكری ژی نەبیت دشێت لدووڤ شیانێن خۆ دگەل هندەك ماموستایێن دی جوانترین شێوە بویاغ بكەت، ئەڤچا مەرەما من ژڤی بابەتی ئەوە دڤێت ماموستایێ وانەیا وەرزشی ب هەمی شیانێن خۆ قوتابیان ب جوانترین شێوە فێری وەرزشێ بكەت، هەر یارییەكا نیشا قوتابیان بدەت دگەل وان بكەت ژ بەركو ئەگەر ماموستای گرنگی دا وانەیا خۆ هەمی كەس دێ گرنگیێ دەنە وانەیا وی و باوەرم دێ ژ لایێ پەروەردێ و و قوتابخانەیا وی دەستخۆشی بۆ چن.
