بلند شه‌فیق: دێ سیسته‌مێ نوو د رێكخستنا یاریگه‌هێ دا دانین
ئه‌ڤرۆ، عه‌لی حاجی:
د داخویانیه‌كێ دا سه‌رۆكێ یانا زاخۆ یا وه‌رزشی دیاركر بۆ وه‌رزێ هاڤیتنا بهێت دێ هنده‌ك پێنگاڤا هاڤێژن ژوانا دروشمێ دناڤ پشته‌ڤانان بهێته گوهۆڕن و رێكخستنا دناڤ یاریگه‌هێ دا بكه‌ن ژبۆ دووباره ئه‌و روودانێن نه چاڤه‌ڕێ كری په‌یدا نه‌بن.
زێده‌تر بلند شه‌فیق بۆ رۆژناما ئه‌ڤرۆ گۆت: لدووڤ رێنمایێن ئێكه‌تیا ته‌پا پێی یا ئیراقێ دڤێت ئێمناهیا یاریگه‌هێ بهێته پاراستن تایبه‌ت بۆ وه‌رزێ بهێت یێ خولا پلا نایابا دێ چه‌ندین رێنمایێن نوو هێنه ده‌ڕكرن ژوانا شێوازێ خولی یێ پیشه‌كاران له‌ورا وه‌كو یانا زاخۆ دێ چه‌ندین كۆمبوون و گه‌نگه‌شه هێنه كرن ژبۆ دانانا سیسته‌مه‌كێ نوو یێ رێكخستنا یاریگه‌هێ و چه‌ند گوهۆڕین هێنه ئه‌نجامدان و دێ ل گه‌ل گوهدار شێخۆ سه‌رپه‌رشتێ ئیدارا زاخۆ كومبین ژبۆ رازیبوون و دووڤچوونا ڤی بابه‌تی، ژبه‌ركۆ پێدڤی یه بهێته چاره‌سه‌كرن پێخه‌مه‌ت پاراستنا ئێمناهیا یاریگه‌هێ و ئه‌و كه‌سێن دناڤ یاریگه‌هێ دا و دووباره روودانێن نه چاڤه‌ڕێ كرن په‌یدا نه‌بن.
ناڤهاتی ئه‌وچه‌نده ژی دیاركر كو هنده‌ك كێماسی هه‌نه دێ هێنه چاره‌سه‌ركرن ژوانا نزمبوونا په‌رژانێ یاریگه‌هێ كو هنده‌ك بناڤێ جه‌ماوه‌رێ یانێ ب سانه‌هی هاتنه دناڤ یاریگه‌هێ دا و كه‌لوپه‌لان هاڤێتنه د یاریگه‌هێ دا، له‌ورا د پلان دایه ئه‌و به‌رژانه بهێته بلندكرن و دیسان پشتی بدووماهی هاتنا خولێ بڕێیا ده‌سته‌یا پشته‌ڤان هنده‌ك دوریشم و هۆزانێن جودان یێن پشته‌ڤانیێ بهێنه دانان بۆ وه‌رزێ بهێت و گۆت: مه پێ نه‌خووشه ئه‌ڤ پێنگاڤه بهێنه كرن لێ نه‌چارین ژبه‌ركو دووباره یانه تووشی سزایێن گران نه‌بن و یاریگه‌ها مه بهێته پاراستن.
